தமிழக வரலாற்றை புரட்டிப்போட்ட விஜய்யின் வெற்றி! ; இலங்கைத் தலைவர்கள் வாழ்த்து

2026 தமிழக சட்டப்பேரவைத் தேர்தலில் யாரும் எதிர்பாராத வகையில் மிகப்பெரிய தாக்கத்தை ஏற்படுத்தியுள்ள தமிழக வெற்றிக் கழகத்தின் (தவெக) தலைவர் விஜய்க்கு, இந்தியப் பிரதமர் நரேந்திர மோடி மற்றும் இலங்கை அரசியல் தலைவர்கள் தங்களது வாழ்த்துகளைத் தெரிவித்துள்ளனர்.

தமிழகத் தேர்தல் முடிவுகள் குறித்து தனது அதிகாரப்பூர்வ ‘எக்ஸ்’ (X) பக்கத்தில் பதிவிட்டுள்ள பிரதமர் நரேந்திர மோடி,

தேசிய ஜனநாயகக் கூட்டணிக்கு ஆதரவளித்த வாக்காளர்களுக்கு முதலில் நன்றி தெரிவித்தார். அதனைத் தொடர்ந்து, தவெக-வின் சிறப்பான செயல்பாட்டைப் பாராட்டிய அவர், “தமிழக வெற்றிக் கழகத்தின் சிறப்பான செயல்பாட்டுக்கு எனது வாழ்த்துகள். தமிழ்நாட்டின் முன்னேற்றத்திற்கும், மக்களின் நல்வாழ்விற்கும் மத்திய அரசு தொடர்ந்து தனது முழுமையான ஒத்துழைப்பை வழங்கும்,” எனத் தெரிவித்துள்ளார்.

இலங்கை நாடாளுமன்ற உறுப்பினர் நாமல் ராஜபக்ச, விஜய்யின் இந்த மகத்தான வெற்றியைப் பாராட்டியுள்ளார்.

அவர் தனது வாழ்த்துச் செய்தியில்:

“உண்மையான மக்கள் பணி இப்போதுதான் தொடங்குகிறது. சவால்களை வென்று மக்களுக்கு அர்த்தமுள்ள நன்மைகளை வழங்க எனது வாழ்த்துகள். இரு நாட்டு மக்களையும் பாதிக்கும் விவகாரங்களில், இலங்கையுடன் ஒரு வலுவான மற்றும் நேர்மறையான உறவை தவெக அரசு உருவாக்கும் என நம்புகிறேன்,” எனக் குறிப்பிட்டுள்ளார்.

இலங்கைத் தமிழரசுக் கட்சியின் பொதுச்செயலாளர் சுமந்திரன் விடுத்துள்ள வாழ்த்துச் செய்தியில்,

விஜய்யின் வரலாற்றுச் சாதனைக்கு வாழ்த்து தெரிவித்ததோடு ஒரு முக்கிய கோரிக்கையையும் முன்வைத்துள்ளார்.

“இலங்கைத் தமிழ் மக்களுக்குத் தமிழ்நாட்டு மக்களினதும், புதிய அரசினதும் ஆதரவு தொடர்ந்து இருக்க வேண்டும் என்று உரிமையோடு எதிர்பார்க்கின்றோம்,” என அவர் தெரிவித்துள்ளார். தமிழகத்தில் ஏற்பட்டுள்ள இந்த அரசியல் மாற்றம், ஈழத் தமிழர்கள் விவகாரத்தில் ஒரு சாதகமான திருப்பத்தை ஏற்படுத்தும் என்ற நம்பிக்கையையும் அவர் வெளிப்படுத்தியுள்ளார்.

திராவிடக் கட்சிகளுக்கு மாற்றாகப் பார்க்கப்படும் தவெக-வின் வெற்றிக்கு, அண்டை நாடான இலங்கையிலிருந்தும், மத்திய அரசிடமிருந்தும் கிடைத்துள்ள இந்த வாழ்த்துகள், விஜய் அவர்களின் அரசியல் வருகை தேசிய மற்றும் சர்வதேச அளவில் கவனிக்கப்படுவதை உறுதிப்படுத்தியுள்ளது.

2026 தமிழ்நாடு சட்டமன்ற தேர்தலில் த.வெ.க. 108 தொகுதிகளில் வெற்றி பெற்று, தனிப்பெரும் கட்சியாக உருவெடுத்துள்ளது. ஆளும் கட்சியாக இருந்த தி.மு.க. 73 எதிர்க்கட்சியாகியுள்ளமை குறிப்பிடத்தக்கது.