குடிநீரில் மைக்ரோபிளாஸ்டிக்கை அகற்றும் முருங்கை விதைகள்

“அதிசய மரம்” என்று அழைக்கப்படும் முருங்கை மரம், பூமியில் உள்ள மிகவும் சத்தான தாவரங்களில் ஒன்றாகும் என்பதுடன் அதன் மருத்துவ குணங்களுக்காக பெரிதும் மக்கள் மத்தியில் போற்றப்படுகிறது.

இது குடிநீரில் உள்ள மைக்ரோபிளாஸ்டிக்குகளை அகற்றுவதில் சிறந்த வல்லமை கொண்டது என்ற மற்றொரு பெரிய நன்மையையும் கொண்டுள்ளதாக ஒரு புதிய ஆராய்ச்சியில் தெரியவந்துள்ளது.

பிரேசில் மற்றும் பிரித்தானிய விஞ்ஞானிகள் குழு, வேகமாக வளரும் இந்த மரங்களின் விதைகளிலிருந்து எடுக்கப்படும் சாறுகள், குடிநீரிலிருந்து மைக்ரோபிளாஸ்டிக்குகளை அகற்றுவதில், பொதுவாகப் பயன்படுத்தப்படும் இரசாயனங்களைப் போலவே பயனுள்ளதாக இருக்கும் என்பதைக் கண்டறிந்துள்ளது.

இந்த கண்டுபிடிப்பு ஏப்ரல் மாதம் வெளியிடப்பட்டது.

முருங்கை மரங்கள் ஆயிரக்கணக்கான ஆண்டுகளாக நீரைச் சுத்திகரிக்கப் பயன்படுத்தப்படுகின்றன. பண்டைய கிரேக்கர்கள், ரோமானியர்கள் மற்றும் எகிப்தியர்கள் இதைப் பயன்படுத்தியதற்கான சான்றுகள் உள்ளன என்று சாவ் பாலோ மாநில பல்கலைக்கழகத்தின் அறிவியல் மற்றும் தொழில்நுட்பக் கழகத்தின் பேராசிரியரும் ஆய்வின் ஆசிரியருமான அட்ரியானோ கோன்சால்வ்ஸ் டோஸ் ரெய்ஸ் கூறினார்.

அவரும் அவரது சக ஊழியர்களும் ஒரு தசாப்தமாக மரத்தின் விதைகளை ஆய்வு செய்து வருகின்றனர். குறிப்பாக நீரில் உள்ள சிறிய துகள்கள் ஒன்றாக ஒட்டிக்கொண்டு வடிகட்டப்படும் பொருளாக அவை எவ்வாறு செயல்படுகின்றன என்பதைப் பற்றி ஆய்வு செய்து வருகின்றனர்.

குடிநீரில் உள்ள மைக்ரோபிளாஸ்டிக் பற்றிய கவலைகள் அதிகரித்து வருவதால், அவற்றை அகற்றுவதில் முருங்கையின் திறனைப் பார்க்க அவர்கள் முடிவு செய்தனர்.

மைக்ரோபிளாஸ்டிக் என்பது ஒரு அங்குலத்தின் 1/25,000 (1 மைக்ரோமீட்டர்) அளவுள்ள மிகச்சிறிய துண்டுகள். மேலும் அவை பிளாஸ்டிக் மாசுபாட்டின் ஒரு பகுதியாகும்.

அவை ஆழமான கடல்கள் முதல் உயரமான மலைகள் வரை எல்லா இடங்களிலும் காணப்படுகின்றன. அவை நமது உணவு மற்றும் நீரை மாசுபடுத்துகின்றன

2024 ஆம் ஆண்டு நடத்தப்பட்ட ஆய்வில், உலகம் முழுவதும் சோதனை செய்யப்பட்ட குழாய் நீரில் 83 சதவீதம் மைக்ரோபிளாஸ்டிக் இருப்பது கண்டறியப்பட்டது

மேலும் அவை நமது மூளை, இனப்பெருக்க உறுப்புகள் மற்றும் இருதய அமைப்புகள் உள்ளிட்ட நமது உடல்களுக்குள் நுழைந்துள்ளன.

விஞ்ஞானிகள் இன்னும் மனித ஆரோக்கியத்தில் அவற்றின் தாக்கங்களை அவிழ்க்க முயல்கின்றனர். ஆனால் விலங்கு ஆராய்ச்சிகள் அவற்றை இனப்பெருக்க பிரச்சினைகள் மற்றும் ஹார்மோன் சீர்குலைவுடன் இணைத்துள்ளன.

அவர்களின் ஆய்வுக்கு, ஆராய்ச்சியாளர்கள் குறிப்பாக PVC மைக்ரோபிளாஸ்டிக்கில் கவனம் செலுத்தினர். ஏனெனில் இவை மிகவும் அபாயகரமானவை மற்றும் குடிநீரில் அதிகமாக உள்ளன என்று கோன்சால்வ்ஸ் டோஸ் ரெய்ஸ் கூறினார்.

அவர்கள் சராசரியாக 18.8 மைக்ரோமீட்டர் அளவுள்ள மைக்ரோபிளாஸ்டிக்கை சோதித்தனர். இது சராசரி மனித தலைமுடியின் தடிமனில் நான்கில் ஒரு பங்கு – மற்றும் வடிகட்டுதல் அமைப்புகளில் பயன்படுத்தும்போது, விதைகளின் சாறுகள் குழாய் நீரிலிருந்து அவற்றை அகற்றுவதில் 98.5 சதவீதம் பயனுள்ளதாக இருக்கும் என்பதைக் கண்டறிந்தனர்.

இந்த செயல்திறன் பொதுவாகப் பயன்படுத்தப்படும் இரசாயன அலுமினியம் சல்பேட்டுடன் ஒப்பிடத்தக்கது. முருங்கை விதைகள் அதிக கார நீரில் அலுமினியம் சல்பேட்டை விட சிறப்பாக செயல்பட்டன என்று விஞ்ஞானிகள் கண்டறிந்தனர்.

அலுமினியம் சல்பேட்டுடன் ஒப்பிடும்போது விதைகளைப் பயன்படுத்துவதன் ஒரு பெரிய நன்மை என்னவென்றால், அவை புதுப்பிக்கத்தக்கவை, இயற்கையாகவே மட்கக்கூடியவை, அதிக அளவு வண்டல்களை உருவாக்காது மற்றும் நச்சுத்தன்மையைப் பற்றிய கவலைகள் குறைவு என்று கோன்சால்வ்ஸ் டோஸ் ரெய்ஸ் கூறினார்.

அலுமினியம் அதிக அளவில் நச்சுத்தன்மையுடையதாக இருக்கும் மற்றும் நரம்பியல் சிதைவு நோய்களுடன் இணைக்கப்பட்டுள்ளது.

அலுமினியம் அடிப்படையிலான வடிகட்டுதல் அமைப்புக்கு பதிலாக இயற்கையான பொருளைப் பயன்படுத்துவது “PVC மைக்ரோபிளாஸ்டிக்கை அகற்றுவதற்கு மலிவான மற்றும் நிலையான தீர்வை வழங்கக்கூடும் என்று நியூ மெக்ஸிகோ ஹெல்த் சயின்ஸ் சென்டர் பல்கலைக்கழகத்தின் மருந்தியல் அறிவியல் பேராசிரியரான மேத்யூ கேம்பன் கூறினார்.

இது அலுமினிய சுரங்கத்தின் தேவையையும் தவிர்க்கும் என்று அவர் மேலும் கூறினார். இது எதிர்மறையான சுற்றுச்சூழல் விளைவுகளை ஏற்படுத்தும்.

இருப்பினும், இதில் சில வரம்புகள் உள்ளன. ஒரு முருங்கை விதை மூலம் சுமார் 10 லிட்டர் நீரை சுத்திகரிக்க முடியும் என்று விஞ்ஞானிகள் கண்டறிந்தனர்.

இது நம்பிக்கையளிப்பதாக இருந்தாலும், அதிக ஓட்டத்தைக் கையாளும் பெரிய நகர்ப்புற சுத்திகரிப்பு ஆலைகளுக்கு மிக அதிக அளவு விதைகள் தேவைப்படும் என கோன்சால்வ்ஸ் டோஸ் ரெய்ஸ் கூறினார்.

உலகெங்கிலும் குழாய் நீரில் 83 சதவீதம் மைக்ரோபிளாஸ்டிக் உள்ளது என்று 2024 ஆம் ஆண்டு நடத்தப்பட்ட ஆய்வில் தெரிய வந்துள்ள நிலையில், இதுபோன்ற இயற்கையான தீர்வைக் கண்டுபிடிப்பது சுகாதாரத் துறையில் ஒரு பெரிய சாதனையாகக் கருதப்படுகிறது.

எதிர்கால ஆராய்ச்சிகள் மற்ற பிளாஸ்டிக் வகைகள் மற்றும் மிகச்சிறிய ‘நானோபிளாஸ்டிக்குகளை’ (Nanoplastics) அகற்றும் திறன் குறித்து ஆராயும் என்று எதிர்பார்க்கப்படுகிறது.