கவிதைகள்
எங்குமே அச்சமே எழுகிறதே இருளாய்!….. ( கவிதை )…. கவிஞர்மகாதேவ ஐயர் ஜெயராமசர்மா
தும்மலொடு இருமல் தொடர்ந்து வரும்வேளை
எம்மருகே இருப்பார் எமைவெறுத்துப் பார்ப்பார்
கைபேசி எடுத்து காவல்துறை அழைத்து
கொரனாவின் காவி அருகிருப்பார் என்பார் !
சாதாரண தும்மல் வந்தாலும் துன்பம்
சளிகாய்ச்சல் சேர்ந்து வந்தாலும் துன்பம்
பக்கத்து நின்று கதைத்தாலும் துன்பம்
பார்க்கவே பயமே பரந்திருக்கு எங்கும் !
விருந்துண்ண வந்தாலும் விலகிநிற்ற வேண்டும்
விழாவனைத்தும் இப்போ இணையவழி ஆச்சு
வருவிருந்தும் உள்ளே வரவச்சம் கொண்டு
வாசல்வரை என்று வரையறையும் ஆச்சு !
வாங்கிவரும் அனைத்தும் வாசலிலே வைத்து
மருந்ததனைத் தெளித்தே மனைக்குள்ளே செல்லும்
வங்கிசென்று பணத்தை எடுத்துவந்த போதும்
பயமுடனே பணத்தைப் பார்க்கும் நிலையாச்சு !
சென்றாலும் பயமே நின்றாலும் பயமே
எடுத்தாலும் பயமே கொடுத்தாலும் பயமே
சிங்காரச் சீனாவின் சிறப்பான பரிசால்
எங்குமே அச்சமே எழுகிறதே இருளாய் !
