ஆயுதக் களைவா? ராணுவ ஆக்கிரமிப்பா? – காசா அமைதி ஒப்பந்தத்தில் தொடரும் குழப்பங்கள்

எகிப்து தலைநகர் கெய்ரோவில் மத்தியஸ்தர்களுக்கும் ஹமாஸ் தலைவர்களுக்கும் இடையே நடைபெற்ற பேச்சுவார்த்தை, காசாவில் கட்டம் கட்டமாக ஆயுதக் களைவு செய்வதற்கான ஒப்பந்தத்திற்கு வழிவகுத்துள்ளதாக அமெரிக்க ஜனாதிபதி டொனால்ட் டிரம்ப் தெரிவித்துள்ளார்.

இருப்பினும், இது வெறும் ‘வரைவுத் திட்டம்’ (Draft) மட்டுமே என்று ஹமாஸ் அதிகாரி ஒருவர் கூறியுள்ளார். மேலும், பாலஸ்தீன ஆயுதக் குழுவான ஹமாஸ் தனது ஆயுதங்களை ஒப்படைக்கும் என்பதில் இஸ்ரேல் சந்தேகத்துடன் இருப்பதாக அமெரிக்க அதிகாரிகள் தெரிவித்துள்ளனர்.

“இன்று, அமைதி வாரியம் (Board of Peace) காசாவில் உள்ள ஹமாஸ் மற்றும் பிற ஆயுதமேந்திய குழுக்களின் முழுமையான ஆயுதக் களைவுக்கான ஒரு வரலாற்றுச் சிறப்புமிக்க ஒப்பந்தத்தை எட்டியுள்ளது” என்று டிரம்ப் தனது சமூக ஊடகப் பதிவில் குறிப்பிட்டுள்ளார்.

இந்த ஆயுதக் களைவு பல கட்டங்களாக நடைபெறும் என்று கூறிய அவர், “இது நிலையான அமைதி மற்றும் பாதுகாப்பை நோக்கிய ஒரு பிரம்மாண்டமான படியாகும்” என்றும் தெரிவித்தார்.

காசாவில் அமைதி வாரியத்துடன் இணைந்து நெருக்கமாகப் பணியாற்றும் ஒரு புதிய பாலஸ்தீன அரசாங்கம் உருவாக்கப்படுவதற்கு இந்த ஒப்பந்தம் ஒரு முக்கியமான கட்டமாகும் என்று டிரம்ப் கூறினார்.

“அதே நேரத்தில், காசா இனி பயங்கரவாதத் தாக்குதல்களுக்கான தளமாகப் பயன்படுத்தப்படாது என்பதால், இஸ்ரேல் பெற வேண்டிய பாதுகாப்பைப் பெறும்” என்றும் அவர் மேலும் தெரிவித்தார்.

டிரம்பின் இந்த அறிவிப்பு குறித்து வாஷிங்டனில் உள்ள இஸ்ரேலிய தூதரகம் உடனடியாக எந்தக் கருத்துரையும் தெரிவிக்கவில்லை.

ஹமாஸ் செய்தி வட்டாரம் ஒன்று ராய்ட்டர்ஸ் செய்தி நிறுவனத்திடம் கூறுகையில், இந்த ‘வரைவு ஒப்பந்தத்தின்படி’ கனரக ஆயுதங்கள் பாலஸ்தீன நிர்வாகத்தின் கட்டுப்பாட்டின் கீழ் மட்டுமே சேமித்து வைக்கப்படும் என்றும், அந்த ஆயுதங்களை இஸ்ரேலிடம் ஒப்படைக்க முடியாது என்றும் தெரிவித்தது.

“காசாவில் இருந்து இஸ்ரேலியப் படைகள் முற்றிலுமாக வெளியேறும் வரை ஆயுதக் களைவு தொடர்பான எந்த நடவடிக்கையையும் நாங்கள் எடுக்க மாட்டோம்” என்று ஹமாஸ் பேச்சுவார்த்தைக் குழுவின் உறுப்பினரான காசி ஹமத் (Ghazi Hamad) அல் ஜசீராவிடம் தெரிவித்தார்.

ஹமாஸ் ஆயுதக் களைவுக்கான வழித்தடம்?

டிரம்பின் அமைதி வாரியம் வழங்கிய காசா திட்டத்தின் இரண்டாவது கட்டம் குறித்து எகிப்து, கதார் மற்றும் துருக்கியைச் சேர்ந்த மத்தியஸ்தர்களுடன் ஹமாஸ் தலைவர்கள் பேச்சுவார்த்தை நடத்தினர்.

காசாவில் இஸ்ரேலின் போரை முடிவுக்குக் கொண்டுவரவும், பேரழிவிற்குள்ளான பகுதியை மறுசீரமைக்கவும் டிரம்ப் இந்த அமைதி வாரியத்தை உருவாக்கினார்.

“இஸ்ரேலுடனான போருக்குப் பிந்தைய காசாவை மறுசீரமைத்தல், பாலஸ்தீனர்களின் ஆட்சி மற்றும் இஸ்ரேல்-பாலஸ்தீன மோதலுக்கு ஒரு அர்த்தமுள்ள தீர்வை எட்டுவதற்கான அரசியல் சூழலை உருவாக்குவது ஆகியவை தான் நமது இலக்கு” என்று டிரம்பின் காசாவுக்கான அமைதி வாரியத் தூதர் நிக்கோலே ம்லேடனோவ் (Nickolay Mladenov) தெரிவித்தார்.

இருப்பினும், பேச்சுவார்த்தையில் ஈடுபட்ட அதிகாரிகள் காசாவை மறுசீரமைக்கும் திட்டங்கள் குறித்த விரிவான தகவல்கள் எதையும் வெளியிடவில்லை.