சுவிட்சர்லாந்தில் கடும் வறட்சி: தண்ணீரைச் சிக்கனமாகப் பயன்படுத்த பொதுமக்களுக்கு அழைப்பு

சூரிச்: சுவிட்சர்லாந்தில் நீடித்து வரும் கடும் வறட்சி காரணமாக நாட்டின் பல பகுதிகளில் தண்ணீர் தட்டுப்பாடு ஏற்பட்டுள்ள நிலையில், தண்ணீரைச் சிக்கனமாகப் பயன்படுத்துமாறு பல நகராட்சிகள் பொதுமக்களுக்கு வேண்டுகோள் விடுத்துள்ளன.

புல்வெளிகளுக்கு தண்ணீர் பாய்ச்சுதல், வாகனங்களை கழுவுதல் மற்றும் தனியார் நீச்சல் குளங்களை மீண்டும் நிரப்புதல் போன்ற நடவடிக்கைகளுக்கு பல பகுதிகளில் கட்டுப்பாடுகள் விதிக்கப்பட்டுள்ளன.

வறட்சியால் அதிகம் பாதிக்கப்பட்டுள்ள துறைகளில் விவசாயமும் ஒன்று. போதிய நீர் இல்லாததால் காய்கறி உள்ளிட்ட பல பயிர்களின் வளர்ச்சி கடுமையாக பாதிக்கப்பட்டுள்ளதாக சுவிஸ் விவசாயிகள் சங்கம் தெரிவித்துள்ளது.

நீர்நிலைகளிலிருந்து பாசனத்திற்காக நீரைப் பெற முடியாத சூழல் உருவானால், விவசாயிகளுக்கு பெரும் பொருளாதார இழப்பு ஏற்படும் என்றும் அந்த அமைப்பு எச்சரித்துள்ளது. மேலும், பாசன வசதிகளை அமைப்பது அதிக செலவாக இருப்பதால், அனைத்து பயிர்களுக்கும் அதை நடைமுறைப்படுத்த முடியாத நிலை உள்ளதாகவும் தெரிவிக்கப்பட்டுள்ளது.

இந்த நிலையில், வீடுகளில் பயன்படுத்தப்படும் குடிநீரில் பெரும் பகுதி கழிவறை நீரிறக்கத்திற்கே செலவாகிறது என்ற தகவல் கவனத்தை ஈர்த்துள்ளது. சுவிட்சர்லாந்தில் வீடுகளில் பயன்படுத்தப்படும் தண்ணீரில் சுமார் மூன்றில் ஒரு பங்கு கழிவறை பயன்பாட்டிற்காகவே செலவிடப்படுவதாக நிபுணர்கள் கூறுகின்றனர்.

ஒவ்வொரு முறையும் கழிவறை நீரிறக்கும்போது 6 முதல் 9 லிட்டர் வரை சுத்தமான குடிநீர் பயன்படுத்தப்படுவதாகவும், இதற்கு மாற்றாக தண்ணீர் தேவையில்லாத கம்போஸ்ட் கழிவறைகள் (Compost Toilets) சிறந்த தீர்வாக அமையக்கூடும் என்றும் சுற்றுச்சூழல் நிபுணர்கள் கருத்து தெரிவிக்கின்றனர்.

ஒரு நான்கு பேர் கொண்ட குடும்பம் இத்தகைய கழிவறையைப் பயன்படுத்தினால், நாளொன்றுக்கு 100 முதல் 150 லிட்டர் வரை குடிநீரைச் சேமிக்க முடியும் என்றும், ஆண்டுக்கு பல ஆயிரம் லிட்டர் தண்ணீர் மிச்சப்படுத்த இயலும் என்றும் அவர்கள் சுட்டிக்காட்டுகின்றனர்.

இதனிடையே, நாடாளுமன்ற உறுப்பினர் ஸ்டெபன் முல்லர்-ஆல்டர்மாட், பள்ளிகள், வணிக வளாகங்கள் மற்றும் மக்கள் அதிகம் கூடும் இடங்களில் தண்ணீர் இல்லாத கழிவறை அமைப்புகளைப் பயன்படுத்துவது குறித்து பரிசீலிக்கலாம் என தெரிவித்துள்ளார்.

அதேவேளை, குடிநீர் பற்றாக்குறை மேலும் தீவிரமடைந்தால், தனியார் நீச்சல் குளங்களை புதியதாக நிரப்புவதற்கு தடை விதிக்கப்படலாம் என்றும் அவர் எச்சரித்துள்ளார். குடிநீர் முதன்மையாக மக்களின் அத்தியாவசிய தேவைகளுக்கே பயன்படுத்தப்பட வேண்டும் என்பதே அரசின் முன்னுரிமை என்றும் அவர் வலியுறுத்தியுள்ளார்.

சுவிட்சர்லாந்து குடிநீர், எரிவாயு மற்றும் வெப்பத் துறை சங்கத்தின் தகவலின்படி, நாட்டில் ஆண்டுதோறும் சுமார் ஒரு பில்லியன் கன மீட்டர் குடிநீர் விநியோகிக்கப்படுகிறது. அதில் பாதி வீடுகளுக்கும் சிறு தொழில்களுக்கும் செல்கிறது. இந்த அளவில் சுமார் 30 சதவீதம் கழிவறை நீரிறக்கத்திற்காகவே பயன்படுத்தப்படுவதாக மதிப்பிடப்பட்டுள்ளது.

இருப்பினும், தற்போதைய வறட்சி சூழலில் தண்ணீரை விரைவாகச் சேமிப்பதற்கு தனியார் நீச்சல் குளங்களை நிரப்புவதைத் தவிர்ப்பது, புல்வெளிகளுக்கு தண்ணீர் பாய்ச்சுவதை நிறுத்துவது மற்றும் வாகனங்களை கழுவுவதை ஒத்திவைப்பது போன்ற நடவடிக்கைகளே மிகவும் பயனுள்ளதாக இருக்கும் என்று நீர்வள நிபுணர்கள் தெரிவித்துள்ளனர்.