முடிவுக்கு வருகிறதா மத்திய கிழக்கு போர்?.. அமெரிக்கா – ஈரான் அமைதி ஒப்பந்தம்…  ஐங்கரன் விக்கினேஸ்வரா

மூன்று மாதங்களாக உலக அரசியலின் மையப் புள்ளியாக இருந்த அமெரிக்கா – ஈரான் மோதல் தற்போது முக்கியமான திருப்புமுனையை எட்டியுள்ளது. இரு நாடுகளுக்கும் இடையே அமைதி ஒப்பந்தம் இறுதியானதாக அறிவிக்கப்பட்டுள்ள நிலையில், சுவிட்சர்லாந்தின் ஜெனீவா நகரில் வெள்ளிக்கிழமை ஜீன் 19ம் திகதியில் அந்த ஒப்பந்தம் கையெழுத்தாகும் என தெரிவிக்கப்பட்டுள்ளது. இந்த முன்னேற்றம், மேற்காசியப் பிராந்தியத்தில் நீடித்து வந்த பதற்றத்தையும், உலக பொருளாதாரத்தில் ஏற்பட்டிருந்த அச்சத்தையும் குறைக்கும் ஒரு முக்கிய நிகழ்வாகக் கருதப்படுகிறது.

வளைகுடாவில் தற்போதைக்கு போர் முடிவுக்கு வந்துவிட்டது. மத்திய கிழக்கில் இருந்த அமெரிக்கத் தளங்கள் பலவும் தாக்கப்பட்டன. ஈரானுக்கு பில்லியன் கணக்கில் பணம் வழங்கப்படுகிறது. ஈரான் இனி ஹோர்முஸ் நீரிணையில் சுங்க வரிகளை வசூலிக்கும். இஸ்ரேல் லெபனானிலிருந்து வெளியேற நிர்பந்திக்கப்பட்டு வருகிறது.

வாஷிங்டன் அரசு இந்த சமாதான நடவடிக்கைகளை எப்படித் திரித்துக்கூற முயன்றாலும், ஈரான் ஒரு தோற்ற நாடாக வெளியேறப் போவதில்லை. ஈரான் பாரிய குண்டுவீச்சுகளில் இருந்து தப்பித்தது. ஈரான் தனது அரசாங்கத்தை அப்படியே தக்க வைத்துக் கொண்டது. ஈரான் ஹோர்முஸை ஒப்பந்தத்தின் மையத்தில் வைத்திருந்தது. முடக்கப்பட்ட சொத்துக்களும், பொருளாதாரத் தடைகள் நீக்கமும் இப்போது பேச்சுவார்த்தை மூலம் முடிவுக்கு வந்துள்ளன.

லெபனான் போர்நிறுத்தக் கட்டமைப்பிற்குள் இழுத்துவரப்பட்டது. மேலும், இஸ்ரேல், எவ்வளவு கடுமையான பேச்சுக்கள் பேசினாலும், லெபனானில் அதன் நடவடிக்கைகள் காரணமாக இப்போது அழுத்தத்தை எதிர்கொள்கிறது. உண்மையில்

அமெரிக்கா எதிர்பார்த்த முடிவு அல்ல.

முக்கியமாக ஈரான் நசுக்கப்படும் என்று மேற்குலகும் அமெரிக்கர்களும் கூறினார்கள். தெஹ்ரான் சரணடைய நிர்பந்திக்கப்படும் என்று அவர்கள் கூறினார்கள். அதிகபட்ச அழுத்தம் அதிகபட்ச கீழ்ப்படிதலை உருவாக்கும் என்று அவர்கள் கூறினார்கள். ஆனால் ஈரான் தனது புவியியல் அமைப்பு, பொறுமை மற்றும் பிராந்திய செல்வாக்கை பேரம் பேசும் சக்தியாக மாற்றிக்கொண்டது.

தற்போது புகழ்ச்சிக்காக அமெரிக்கா ஒரு தலைப்புச் செய்தியைப் பெறுகிறது. டிரம்ப் ஒரு வெற்றி உரையை நிகழ்த்துவார். இஸ்ரேல் பாரிய விரக்தியைப் பெறுகிறது. ஆனால் ஈரான் சர்வதேச அரசியலில் மிகவும் முக்கியமான ஒன்றைப் பெறுகிறது. உயிர் பிழைத்தல், செல்வாக்கு மற்றும் பேச்சுவார்த்தையில் ஓர் இடம் வகிக்கிறது.

கடந்த பிப்ரவரி 28 ஆம் தேதி அமெரிக்கா மற்றும் ஈரான் இடையே நேரடி ராணுவ மோதல் வெடித்தது. ஆரம்பத்தில் கடற்படை நடவடிக்கைகள் மற்றும் வான்வழித் தாக்குதல்களாகத் தொடங்கிய இந்த மோதல், பின்னர் பிராந்திய அளவிலான பாதுகாப்பு நெருக்கடியாக வளர்ந்தது. குறிப்பாக ஹார்முஸ் நீரிணை வழியாகச் செல்லும் சர்வதேச கப்பல் போக்குவரத்து பாதிக்கப்பட்டதால், உலக எண்ணெய் சந்தைகளும் கடுமையான அதிர்வுகளைச் சந்தித்தன.  இந்த சூழ்நிலையில் கடந்த ஏப்ரல் 8 ஆம் தேதி இடைக்கால போர் நிறுத்த உடன்படிக்கை எட்டப்பட்டது. அதன் பின்னர் கத்தார், சவுதி அரேபியா, துருக்கி மற்றும் பாகிஸ்தான் ஆகிய நாடுகளின் மத்தியஸ்த முயற்சிகளின் மூலம் இரு தரப்பினருக்கும் இடையே பல கட்ட பேச்சுவார்த்தைகள் நடைபெற்றன. ஆரம்பத்தில் சில முக்கிய விடயங்களில் கருத்து வேறுபாடுகள் காணப்பட்டாலும், நீண்டகால பேச்சுவார்த்தைகளின் பின்னர் தற்போது அமைதி ஒப்பந்தம் இறுதி செய்யப்பட்டுள்ளதாக அறிவிக்கப்பட்டுள்ளது.

இந்த வரலாற்றுச் சிறப்புமிக்க முன்னேற்றத்தை முதன்முதலில் அறிவித்தவர் பாகிஸ்தான் பிரதமர் ஷெபாஸ் ஷெரீப் ஆவார். தனது சமூக வலைத்தளப் பதிவில், அமெரிக்காவும் ஈரானும் தீவிர பேச்சுவார்த்தைகளின் பின்னர் அமைதி ஒப்பந்தத்தில் இணக்கம் கண்டுள்ளதாக அவர் தெரிவித்தார். மேலும், இரு தரப்பும் உடனடியாக ராணுவ நடவடிக்கைகளை நிறுத்த ஒப்புக்கொண்டுள்ளதுடன், ஜெனீவாவில் நடைபெறவுள்ள நிகழ்வில் ஒப்பந்தம் கையெழுத்தாகும் என நம்பிக்கை வெளியிட்டார்.

இதனைத் தொடர்ந்து அமெரிக்க அதிபர் டொனால்டு ட்ரம்பும் அமைதி ஒப்பந்தம் இறுதியானதை உறுதிப்படுத்தினார். உலக வர்த்தகத்திற்கு முக்கியத்துவம் வாய்ந்த ஹார்முஸ் நீரிணை மீண்டும் திறக்கப்படவுள்ளதாகவும், சர்வதேச கப்பல்கள் எந்தத் தடையுமின்றி அந்தப் பாதையைப் பயன்படுத்த முடியும் என்றும் அவர் குறிப்பிட்டார். அதேவேளை, அமெரிக்க கடற்படை மேற்கொண்டிருந்த முற்றுகை நடவடிக்கைகளும் படிப்படியாகத் திரும்பப் பெறப்படும் என அறிவிக்கப்பட்டுள்ளது.

இந்த ஒப்பந்தத்தின் முக்கிய அம்சங்களில் ஒன்று ஹார்முஸ் நீரிணையின் முழுமையான மீள்திறப்பாகும். உலகின் மிக முக்கியமான கடல் வர்த்தகப் பாதைகளில் ஒன்றாக விளங்கும் இந்த நீரிணை வழியாக தினசரி மில்லியன் கணக்கான பீப்பாய் எண்ணெய் மற்றும் எரிவாயு ஏற்றுமதி செய்யப்படுகிறது. எனவே, இந்தப் பாதை திறக்கப்படுவது உலக பொருளாதாரத்திற்கு மிகுந்த நிம்மதியை வழங்கும் என்று பொருளாதார நிபுணர்கள் கருதுகின்றனர்.

அதேபோல், ஈரானின் கடற்பகுதியில் முகாமிட்டிருந்த அமெரிக்க ராணுவப் படைகள் முப்பது நாட்களுக்குள் படிப்படியாக விலக்கிக் கொள்ளப்படும் எனவும் தகவல்கள் தெரிவிக்கின்றன. இதன் மூலம் ஈரான் தனது கடற்பாதுகாப்பு மற்றும் இறையாண்மை தொடர்பான முக்கிய கோரிக்கைகளில் ஒன்றை நிறைவேற்றியுள்ளதாகக் கருதப்படுகிறது.

ஈரான் தரப்பும் இந்த ஒப்பந்தத்தை வரவேற்றுள்ளது. அமெரிக்க ராணுவ முற்றுகையிலிருந்து தங்கள் கடற்பகுதி விடுவிக்கப்படுவதாகவும், லெபனான் உள்ளிட்ட பல போர் முனைகளிலும் ராணுவ நடவடிக்கைகள் முடிவுக்கு வரும் என்றும் ஈரானின் தேசிய பாதுகாப்பு கவுன்சில் அறிவித்துள்ளது. இது மேற்காசியப் பிராந்தியத்தில் பரவலாக இருந்த பதற்றத்தை குறைக்கும் முக்கிய நடவடிக்கையாக பார்க்கப்படுகிறது.

மேலும், ஒப்பந்தத்தில் 14 முக்கிய அம்சங்கள் இடம்பெற்றுள்ளதாக கூறப்படுகிறது. அவற்றில் முக்கியமானதாக, அமெரிக்கா மற்றும் அதன் கூட்டாளிகளால் முடக்கப்பட்டிருந்த சுமார் 12 பில்லியன் அமெரிக்க டொலர் மதிப்பிலான ஈரானின் சொத்துக்களை விடுவிப்பது இடம்பெற்றுள்ளதாக தகவல்கள் தெரிவிக்கின்றன. இந்த நடவடிக்கை ஈரானின் பொருளாதார மீட்சிக்கு உதவக்கூடிய முக்கிய காரணியாக அமையலாம்.

எனினும், இந்த அமைதி ஒப்பந்தம் முழுமையான தீர்வா என்ற கேள்வி இன்னும் எழுந்துகொண்டே இருக்கிறது. குறிப்பாக அணுசக்தித் திட்டம் தொடர்பான விவகாரங்களில் எதிர்காலத்தில் மீண்டும் கருத்து வேறுபாடுகள் உருவாகும் சாத்தியம் இருப்பதாக சில ஆய்வாளர்கள் எச்சரிக்கின்றனர். இதனாலேயே, ஒப்பந்த நிபந்தனைகள் மீறப்பட்டால் அமெரிக்கா மீண்டும் ராணுவ நடவடிக்கைகளைத் தொடங்கலாம் என அதிபர் ட்ரம்ப் எச்சரித்துள்ளார்.

அதே நேரத்தில், இந்த ஒப்பந்தம் வெற்றிகரமாக நடைமுறைக்கு வந்தால், அது அமெரிக்கா–ஈரான் உறவுகளில் மட்டுமல்லாமல் முழு மேற்காசியப் பிராந்தியத்தின் அரசியல் மற்றும் பாதுகாப்பு சூழலிலும் புதிய அத்தியாயத்தைத் தொடங்கக்கூடும். பல ஆண்டுகளாக மோதல்கள், பிரதிநிதிப் போர்கள் மற்றும் பொருளாதாரத் தடைகளால் பாதிக்கப்பட்டிருந்த இந்தப் பிராந்தியத்திற்கு இது ஒரு புதிய நம்பிக்கையை அளிக்கிறது.

அமெரிக்காவுடன் அமைதி ஒப்பந்தம் இறுதியானதை ஈரானும் உறுதி செய்துள்ளது. இந்த ஒப்பந்தத்தின் மூலம் தங்கள் நாட்டின் கடற்பகுதி அமெரிக்க ராணுவ முற்றுகையில் இருந்து விடுவிக்கப்பட்டுள்ளதாக ஈரான் தெரிவித்துள்ளது. அதேவேளை லெபனான் உள்ளிட்ட பிராந்தியத்தின் அனைத்து பகுதிகளிலும் போர் முடிவுக்கு வந்துள்ளதாக ஈரானின் தேசிய பாதுகாப்பு கவுன்சில் தெரிவித்துள்ளது. இதை ஈரானின் அரசு செய்தி நிறுவனமும் உறுதி செய்துள்ளது.

14 முக்கிய அம்சங்களை முன்வைத்து இந்த ஒப்பந்தம் கையெழுத்தாக உள்ளதாக தகவல் கிடைத்துள்ளது. இதில் முடக்கப்பட்ட ஈரானின் 12 பில்லியன் டாலர் சொத்துகளை உடனடியாக விடுவிக்க வேண்டும் என்பது முக்கிய அம்சமாக இடம்பெற்றுள்ளதாக தகவல். அதேபோல ஒப்பந்தம் கையெழுத்தான பின்னர் வெள்ளிக்கிழமை முதல் கப்பல் போக்குவரத்துக்கு ஹார்முஸ் ஜலசந்தி திறக்கப்படும் என்றும், ஈரான் கடற்பகுதியில் முகாமிட்டுள்ள அமெரிக்க ராணுவம் முப்பது நாட்களுக்குள் படிப்படியாக விலக்கிக் கொள்ளப்படும் என்றும் ஒப்பந்தத்தில் தெரிவிக்கப்பட்டுள்ளதாக தகவல் வெளியாகியுள்ளது.

மொத்தத்தில், ஜெனீவாவில் கையெழுத்தாகவுள்ள அமெரிக்கா–ஈரான் அமைதி ஒப்பந்தம், சமீபகால மேற்காசிய அரசியலில் மிக முக்கியமான நிகழ்வாகக் கருதப்படுகிறது. இந்த ஒப்பந்தம் நிலையான அமைதிக்கான அடித்தளமாக அமையுமா அல்லது தற்காலிக அரசியல் சமரசமாக மட்டுமே மாறுமா என்பதை எதிர்வரும் மாதங்களே தீர்மானிக்கும். இருப்பினும், போரை விட பேச்சுவார்த்தையைத் தேர்ந்தெடுத்துள்ள இரு தரப்பினரின் இந்த முடிவு, உலக அமைதிக்கான ஒரு நேர்மறையான முன்னேற்றமாகப் பார்க்கப்படுகிறது.