உக்ரேனியப் போரில் வட கொரிய வீரர்கள்… ரஷ்யாவிற்கு செலுத்தும் நன்றிக் கடனா ?…  ஐங்கரன் விக்கினேஸ்வரா

உக்ரைனிய போரில் ரஷ்யாவும், வட கொரியாவும் தங்கள் இராணுவ ஒத்துழைப்பை அதிகரித்துள்ளன. இது மேற்கத்திய நட்பு நாடுகளையும் கிழக்கு ஆசியாவில் உள்ள அவர்களின் கூட்டாளி நாடுகளையும் தீவிரமாக கவலையடையச் செய்துள்ளது. குறிப்பாக வடகொரிய அரசு அணு ஆயுதத் திட்டத்தைத் தொடரும்போது இந்த இராணுவ ஒத்துழைப்பு மேலும் அபாயம் என்று மேற்குலக நாடுகள் கருதுகின்றன.

இதேவேளை நவீன கலப்பினப் போர் பற்றிய அறிவை அவர்கள் பெறுவது மிகவும் ஆபத்தானது என்று ஜெலென்ஸ்கி கூறியுள்ளார். உக்ரைன் தலைவர் கருத்துக்களின்படி நீண்டதூர ஏவுகணைகள் , ஃபைபர்-ஆப்டிக் ட்ரோன்கள் உட்பட பல்வேறு வகையான ட்ரோன்கள் – FPV முதல் நீண்ட தூர ட்ரோன்கள் வரை – எவ்வாறு பாவிப்பது என்பது குறித்த வடகொரிய படைகள் அறிந்து வருகின்றனர் என அவர் தெரிவித்துள்ளார். ரஷ்யாவின் தாக்குதல்களுக்கு உக்ரேனிய படைகள் பதிலளிப்பதால், அவர்கள் இப்போது ரஷ்யாவின் பிரதேசத்தில் பல போரியல் கல்வியை கற்றுக்கொள்கிறார்கள். இதுவே வட கொரியா படைகளுக்கு பாரிய வாய்ப்பாக உள்ளது.

இந்த படையியல் அறிவை வைத்து அவர்கள் என்ன செய்வார்கள்? குறைந்தபட்சம், அவர்கள் இந்த அறிவையும் அனுபவத்தையும் வட கொரியாவிற்கு கொண்டு செல்வார்கள் என்பது உறுதி என்று ஜெலன்ஸ்கி தெரிவித்துள்ளார்.

2024 ஆம் ஆண்டில் இருந்து உக்ரேனியப் படைகளுக்கு எதிராக வட கொரிய வீரர்கள் ரஷ்யாவிற்காக போரிட்டு வருகின்றனர். அந்த ஆண்டு ஜூன் மாதம் ரஷ்யாவிற்கும் வட கொரியாவிற்கும் இடையே ஒரு புதிய பரஸ்பர பாதுகாப்பு ஒப்பந்தம் கையெழுத்தானது. இதனை தொடர்ந்து இரு நாடுகளுக்கும் இடையேயான பாதுகாப்பு ஒப்பந்தம் வெற்றிகரமாக நிறைவேற்றப்பட்டது.

உக்ரைன் தொடர்ந்து இரத்தம் சிந்தும் வேளையில், வட கொரியாவின் செயல்பாடு குறித்து ஜெலென்ஸ்கி எச்சரித்து இருக்கிறார். வட கொரியா ரஷ்யாவிடமிருந்து முக்கியமான இராணுவ அறிவைப் பெற்று வருவதாகவும் எச்சரித்துள்ளார். அங்கு வடகொரிய 10,000 துருப்புக்களை அனுப்பியுள்ளதாக அவர் மேலும் கூறியுள்ளார். வடகொரிய படைகள் கற்றுக்கொள்கிறது மிகவும் ஆபத்தானது உக்ரைன் ஜனாதிபதி விலோடிமிர் ஜெலென்ஸ்கி தனது ஆதங்கத்தை வெளிப்படுத்தி உள்ளார்.

உக்ரைனுக்கு எதிராகப் போராட துருப்புக்களை அனுப்புவதற்கான மாற்றீடாக, வட கொரியாவின் பாலிஸ்டிக் ஏவுகணை ஆராய்ச்சிக்கு ரஷ்ய இராணுவ தொழில்நுட்ப ஆதரவைப் பெற்றுள்ளதாக கூறப்படுகிறது. அமெரிக்கா மற்றும் தென் கொரியா உளவுத்துறை சேவைகள் மூலம் இந்த தகவல்கள் வெளியாகியுள்ளன.

ரஷ்ய ஜனாதிபதி விளாடிமிர் புட்டினும் வட கொரிய தலைவர் கிம் ஜாங் உன்னும் முதலில் துருப்புக்கள் ஏப்ரல் 2025 இல் ரஷ்யாவிற்காகப் போராடியதை உறுதிப்படுத்தினர். இதேவேளை அவர்களில் பலர் போர்க்களத்தில் இறந்தனர் என்பதையும் ஒப்புக் கொண்டனர்.

கடந்த ஆண்டு மே மாதத்தில், மேற்குலக 11 நட்பு நாடுகளால் நிறுவப்பட்ட அவர்களின் உளவுத்துறையைப் பயன்படுத்தும் பலதரப்பு தடைகள் கண்காணிப்புக் குழு (MSMT), ரஷ்யாவிற்கும் வட கொரியாவிற்கும் இடையிலான உறவு குறித்து அதன் முதல் அறிக்கையை வெளியிட்டது. ரஷ்ய அரசு வட கொரியாவிற்கு ஒரு பான்ட்சிர் மொபைல் வான் பாதுகாப்பு அமைப்பை உருவாக்கி உள்ளது என்று தெரிவித்துள்ளது.

இது நிலையான மற்றும் சுழலும் இறக்கை விமானங்கள், கப்பல் ஏவுகணைகள், துல்லியமான வெடிமருந்துகள் மற்றும் ஆளில்லா வான்வழி வாகனங்களை குறிவைக்கும் வகையில் வடிவமைக்கப்பட்டுள்ளது என்பது கவனிக்கத்தக்கது. மேலும்

வட கொரியாவிற்கு அதன் தற்போதைய பாரம்பரிய இராணுவத்திற்கு ரஷ்ய ஆதரவு மிகுந்த நவீன மயமாக்கப்பட்ட வான் பாதுகாப்பு அமைப்பை உருவாக்கி உள்ளது.

ரஷ்யா வட கொரியாவிற்கு மேம்பட்ட மின்னணு போர் அமைப்புகளை வழங்குகிறது. இதில் ஜாமிங் உபகரணங்கள் அடங்கும். மேலும் பியோங்யாங்கின் பாலிஸ்டிக் ஏவுகணை திட்டங்களுக்கு பாலிஸ்டிக் ஏவுகணைகள் குறித்த ஆராய்ச்சி தரவுகளை வழங்குவதன் மூலம் ரஷ்ய ஆதரவளித்துள்ளது. இது ஏவுகணை வழிகாட்டுதல் செயல்திறனில் வடகொரிய முன்னேற்றத்திற்கு வழிவகுத்து உள்ளது.

உக்ரைன் மீதான ரஷ்யாவின் போருக்கு உதவியதன் மூலம் வட கொரியா தனது பொருளாதாரத்திற்கு 20 பில்லியன் டாலருக்கும் அதிகமாக ஈட்டியதாக தென் கொரியா பாதுகாப்பு பகுப்பாய்வு நிறுவன (KIDA) சிந்தனைக் குழு

தெரிவித்துள்ளது.

600 மில்லிமீட்டர் , வட கொரியாவின் KN-25 மல்டிபிள் ராக்கெட் லாஞ்சர் மிகப்பெரிய பீரங்கி ராக்கெட் அமைப்பாகக் கருதப்படுகிறது. அமெரிக்காவின் HIMARS ஐ விட அதிக தூரம் செல்லும் திறன் கொண்டதாகும். இது பியோங்யாங் தந்திரோபாய அணு ஆயுதங்களை சுமந்து செல்லும் திறன் கொண்டது என்று கூறுகிறது.

இராணுவ ஆய்வாளர்கள் இதை ராக்கெட் பீரங்கி மற்றும் குறுகிய தூர பாலிஸ்டிக் ஏவுகணைக்கு இடையிலான கலப்பினமாக விவரிக்கின்றனர். இது ஆழமான தாக்குதல் பணிகளுக்காக வடிவமைக்கப்பட்ட மல்டி-டியூப் வழிகாட்டப்பட்ட அமைப்பாகும்.

வட கொரிய அதிபர் கிம் உடல்நலப் பிரச்சினைகளால் பாதிக்கப்பட்டுள்ளதாக தென் கொரிய உளவுத்துறை தெரிவித்துள்ளது.

கிம் ஜு ஏவுக்கு சுமார் 13 வயது என்று நம்பப்படுகிறது. மாநில ஊடகங்களால் அவர் ஒருபோதும் பகிரங்கமாக பெயரிடப்படவில்லை, முன்னாள் NBA நட்சத்திரம் டென்னிஸ் ரோட்மேன் 2013 இல் தலைநகர் பியோங்யாங்கிற்கு விஜயம் செய்த பின்னர், அப்போதைய குழந்தைக்கு அவர் அறிமுகப் படுத்தப்பட்ட பிறகு உலகம் முதன்முதலில் இந்தப் பெயரைக் கற்றுக்கொண்டார். சமீபத்தில் கிம்மின் மகள் கிம் ஜு ஏ, அவருக்குப் பிறகு யார் வருவார்கள் என்பது குறித்த ஊகங்களின் மையமாக மாறியுள்ளார்.

2022 ஆம் ஆண்டு ஏவுகணை ஏவுதலில் தனது தந்தையின் பக்கத்தில் தோன்றியதிலிருந்து, அவர் அவருடன் இணைந்து அதிக அளவில் நிகழ்வுகளில் கலந்து கொண்டுள்ளார். ஊகங்களுக்கு மேலதிகமாக, அரசு ஊடகங்கள் அவரை “மிகவும் முக்கியத்துவம் வாய்ந்த நபர்” என்று குறிப்பிட்டுள்ளன.

உக்ரைன் போர் நான்கு ஆண்டுகளுக்கும் மேலாக இழுத்துச் செல்லப்படுகிறது. தெளிவான போர் முடிவு எடுக்க இரு நாடுகளின் நிலைப்பாடு தெளிவாக இல்லை. ஐரோப்பிய நாடுகள் உக்ரைன் மீது டிரில்லியன் கணக்கான டாலர்களை கொட்டியுள்ளன. ஆனாலும் உக்ரைன் ரஷ்யாவிடம் தொடர்ந்து நிலப்பரப்பை இழந்து வருகிறது. ரஷ்யா மெதுவாக, சீராக நகர்ந்து வருகிறது. இன்னும் பல பகுதிகளில் சண்டை தொடர்கிறது.

உக்ரைன் போரில் போலந்து, இங்கிலாந்து மற்றும் பிரான்ஸ் தொடர்ந்து ஆதரவு அளித்து வருகின்றன. மேலும் அமெரிக்க போர் விமானங்கள் உக்ரைனின் வான் பாதுகாப்பிற்கு உதவுகின்றன.

எனவே வட கொரியா ரஷ்யாவை ஆதரிப்பதில் எந்த அடிப்படையில் வேறுபட்டதாக கருத முடியும்?

உண்மையில் வாஷிங்டனில் அரசியல் அதிகாரம் மாறும் வரை இந்தப் போரை இழுப்பது என்பது வெறுமனே வேடிக்கையாகவே இருக்கும். அல்லது உக்ரைன் வேறு உத்தியை கையாள வேண்டிய கட்டாயத்தில் உள்ளது. அல்லது அமெரிக்காவின் இன்னும் பெரிய ஆதரவை எதிர்பார்த்து வேறு நிர்வாகத்திற்காகக் காத்திருப்பதா?

அதுதான் இப்போதய நிலைமையாக இருக்கலாம். ஆனால் போர் களத்தில் உள்ள உண்மை ஒரு கடுமையான சூழ்நிலையை வெளிப்படுத்துகிறது. உக்ரைன் அங்குலம் அங்குலமாக அதன் நிலப்பரப்பை இழந்து வருகிறது என்ற உண்மையை மறைக்க முடியாது.

உக்ரைன் அரசின் நன்கொடையாளர்கள் அல்லது அரசியல் கூட்டாளிகள் கடுமையான போக்கை விரும்புவதால் பேச்சுவார்த்தைகளை மறுப்பது போரை நீடிக்கச் செய்யும். பாரிய விளைவுகளுடன், இந்த போர் காலவரையின்றி தொடரும் என்றும் சில மேற்குலக நாடுகள் எச்சரிக்கை விடுத்துள்ளன. போர்கள் இலகுவாக முடிவதில்லை என்பதே வரலாற்று உண்மையாகும்.

மேலும் தற்போதைய காலகட்டத்தில், இந்த போர் ரஷ்யாவிற்கு சாதகமாக மாறிக்கொண்டு வருகிறது. களத்தில் முன்னணி வரிசைகள் மாறுகின்றன. இதன் தொடர் விளைவுகள் உக்ரைன் அரசையே ஆட்டங்காணச் செய்யும் வகையில் ஆபத்தை நோக்கி நகர்வதாக கூறப்படுகிறது. இதேவேளை உக்ரைனிய போரில் ரஷ்யாவும், வட கொரியாவும் தங்கள் இராணுவ ஒத்துழைப்பை அதிகரித்துள்ளன. ஆயினும் உக்ரேனியப் போரில் வட கொரிய வீரர்களின் பங்களிப்பு என்பது ரஷ்யாவிற்கு செலுத்தும் நன்றிக் கடனா என்றுங்கூட கருத இடமுண்டு.