அச்சத்தில் உறையும் வல்லரசு நாடுகள்; கடலுக்கு அடியில் ரஷ்யாவின் அசுரன்

ரஷ்யா தனது கடற்படையில் ‘பெல்கோரோட்’ (Belgorod) என்ற புதிய அதிநவீன அணு ஆயுத நீர்மூழ்கிக் கப்பலை இணைத்துள்ளது.

இது ‘பொசைடன்’ என்ற அணு ஆயுதம் தாங்கிய ட்ரோன்களையும் ஏவுகணைகளையும் சுமந்து செல்லும் திறன் கொண்டது. இந்த நீர்மூழ்கிக் கப்பல் மேற்கத்திய நாடுகளுக்குப் பெரும் அச்சுறுத்தலாக உள்ளது.

‘பெல்கோரோட்’ சுமார் 184 மீட்டர் (604 அடி) நீளம் கொண்டது, இது உலகின் மிக நீளமான நீர்மூழ்கிக் கப்பலாகக் கருதப்படுகிறது.

இது நீர்மூழ்கி ஆய்வு மற்றும் இரகசிய நடவடிக்கைகளுக்காக வடிவமைக்கப்பட்டது என்றாலும், அதன் முக்கிய நோக்கம் ‘பொசைடன்’ ட்ரோன்களைச் சுமந்து செல்வதே ஆகும்.

இதில் நவீன இயந்திர மனிதர்களும், சிறப்பு ஆய்வு உபகரணங்களும் உள்ளன. ‘பொசைடன்’ என்பது ஒரு அணு ஆயுதம் தாங்கிய தன்னாட்சி நீர்மூழ்கி வாகனம் (Autonomous Underwater Vehicle – AUV). இது கடற்கரை நகரங்கள் மற்றும் கடற்படைத் தளங்களைத் தாக்கும் திறன் கொண்டது.

இது மிக அதிக சக்தி வாய்ந்த அணு ஆயுதங்களைச் சுமந்து சென்று, கதிரியக்க சுனாமியை உருவாக்கும் திறன் கொண்டது என்று ரஷ்யா கூறுகிறது. இது நீர்மூழ்கிக் கப்பல்களிலிருந்து ஏவப்பட்டு, எதிரிகளின் கடற்கரை நகரங்களை ஊடுருவி, மிகப்பெரிய அழிவை ஏற்படுத்தும் என்று ரஷ்யா தெரிவித்துள்ளது.

எந்தவிதமான பாதுகாப்பாலும் இதைத் தடுக்க முடியாது என்றும் அது கூறுகிறது. ரஷ்யாவின் இந்த புதிய ஆயுதம் மேற்குலக நாடுகளுக்கு, குறிப்பாக அமெரிக்காவுக்கு, ஒரு புதிய அச்சுறுத்தலாகப் பார்க்கப்படுகிறது.

ரஷ்யாவின் ஜனாதிபதி விளாடிமிர் புடின், இந்த ஆயுதம் ரஷ்யாவின் பாதுகாப்பை வலுப்படுத்தும் என்றும், எதிரிகளை அச்சுறுத்தும் என்றும் தெரிவித்துள்ளார். ‘பெல்கோரோட்’ நீர்மூழ்கிக் கப்பல் மற்றும் ‘பொசைடன்’ டிரோன், ரஷ்யாவின் கடற்படைத் திறனை வெகுவாக அதிகரிக்கும் என்று பாதுகாப்பு ஆய்வாளர்கள் கருதுகின்றனர்.