இளம் வயதினரிடையே மாரடைப்பு மரணங்கள் அதிகரிப்பு: ஓர் அதிர்ச்சி தரும் புள்ளிவிவரப் பார்வை!

மாரடைப்பு இன்று உலகம் முழுவதும் பரவலாகக் காணப்படுகிறது. இதுவரை முதியவர்களிடையே மட்டுமே காணப்பட்ட இந்த நோய், இப்போது இளம் வயதினரிடையேயும் வேகமாகப் பரவி வருகிறது. புதிய ஆய்வுகளின்படி, 20 முதல் 40 வயதுக்குட்பட்ட இளம் வயதினரிடையே மாரடைப்பு மற்றும் இருதய நோய்களால் ஏற்படும் இறப்பு விகிதம் கணிசமாக அதிகரித்துள்ளது.

சமீபத்திய தரவுகளின்படி, 2000 முதல் 2016 வரையிலான 16 ஆண்டு காலப் பகுதியில், 40 வயதிற்குட்பட்டவர்களில் மாரடைப்பு விகிதம் ஆண்டுக்கு 2% வீதம் அதிகரித்துள்ளது. மேலும், தற்போது ஏற்படும் மாரடைப்புகளில் சுமார் 1ல் 5 பங்கு, 40 வயது அல்லது அதற்கும் குறைவானவர்களுக்கு ஏற்படுகிறது. ஒரு தசாப்தத்திற்கு முன்பு இது 10ல் 1 ஆக மட்டுமே இருந்தது என்பது குறிப்பிடத்தக்கது.

இதற்கான முக்கிய காரணங்களாக, தினசரி எடுத்துக்கொள்ளும் ஊட்டச்சத்து குறைந்த உணவுகள், உடல் பயிற்சி இன்மை, பதற்றம் நிறைந்த பரபரப்பான வாழ்க்கை முறை, போதைப்பொருள் பாவனை, புகைபிடித்தல் மற்றும் முறையற்ற தூக்கம் ஆகியவை குறிப்பிடப்படுகின்றன. குறிப்பாக, 2009 முதல் 2020 வரை, 18-44 வயதுக்குட்பட்ட இளம் வயதினரிடையே நீரிழிவு நோய் 3% இலிருந்து 4.1% ஆகவும், உடல் பருமன் விகிதம் 32.7% இலிருந்து 40.9% ஆகவும் அதிகரித்துள்ளது என ஆய்வுகள் தெரிவிக்கின்றன. மேலும், நவீன தொழில்நுட்ப சாதனங்களுக்கு அடிமையாதல் மற்றும் சமூக வலைத்தளங்களில் அதிக நேரம் செலவிடுதல் ஆகியவையும் இளம் தலைமுறையினரின் ஆரோக்கிய நிலையை அச்சுறுத்தி வருகின்றன.

பல இளைஞர்களுக்கு இருதய நோய் இருப்பதை உணர்த்தும் தெளிவான அறிகுறிகள் வெளிப்படுவதில்லை. பெரும்பாலும், முதல் முறையாக மாரடைப்பு ஏற்படும்போதே மரணம் நிகழ்கிறது. சுவாசிப்பதில் சிரமம், இதயத்துடிப்பு அதிகரித்தல், கை, கால்கள் குளிர்ந்து போதல், மூச்சுத் திணறல் போன்ற அறிகுறிகள் இறுதிக் கட்டத்திலேயே வெளிப்படுகின்றன.
இந்த நிலையை கட்டுப்படுத்த மக்கள் தொடர்ந்து சுகாதாரப் பரிசோதனைகளை மேற்கொள்வது அவசியம் என்று மருத்துவ நிபுணர்கள் கூறுகின்றனர். அதனுடன், முறையான உணவுப் பழக்கம், உடற்பயிற்சி நிறைந்த வாழ்க்கை, மன அமைதி மற்றும் சரியான வாழ்க்கை முறையை பின்பற்றுவதும் அத்தியாவசியமானது.