17 முறை தேர்தலில் தோற்றும் அரசியலில் தொங்கும் ரணில்

பொது மக்களால் பல தடவைகள் நிராகரிக்கப்பட்டு தொடர்ச்சியாக பல தேர்தல்களில் தோல்வியடைந்தவராகவும் நீதித்துறையை மீறி செயற்பட்ட ஒருவரான முன்னாள் ஜனாதிபதி ரணில் விக்ரமசிங்கவிடமிருந்து அரசியலமைப்பை கற்றுக்கொள்ள வேண்டிய அவசியமில்லையென பிரதமர் ஹரிணி அமரசூரிய தெரிவித்துள்ளார்.

17 முறை தேர்தலில் தோல்வியடைந்த போதிலும், ரணில் விக்ரமசிங்க விலகுவதாகத் தெரியவில்லை, மேலும் தனது அரசியல் வாழ்க்கையில் தொங்கிக் கொண்டிருப்பதாகவும் பொதுமக்கள் மாறிவிட்டார்கள், அவரை நிராகரித்தார்கள் என்பதை அவரால் புரிந்து கொள்ள முடியவில்லை போலும். எனினும், நாங்கள் ஒரு புதிய பயணத்தை தொடங்கியுள்ளோம் எனவும் குறிப்பிட்டுள்ளார்.

அரசியலமைப்பின் அடிப்படையானது மக்களின் ஆணையாகும். இந்த அடிப்படை விடயத்தை புரிந்து கொள்ளாத ரணில் விக்கிரமசிங்க எவ்வாறு அரசியலமைப்பை கற்பிக்க முடியும் என கேள்வி எழுப்பினார்.

அரசியலமைப்பின் அடிப்படைகளை அறிந்த ஒருவர் தேர்தலை ஒத்திவைக்க மாட்டார், அல்லது அரசியலமைப்புச் சபை அல்லது நீதித்துறையின் முடிவுகளில் தலையிட மாட்டார். அரசியலமைப்பைப் பற்றி எனக்குக் கற்பிக்க குறைந்த பட்சம் இந்த அடிப்படைகளை அவர் அறிந்திருக்க வேண்டும் என்று நான் நினைக்கிறேன்.

தமக்கு எல்லாம் தெரியும், மற்றவர்கள் அறியாதது போன்று கருதி செயற்பட்ட தலைவர்களின் செயற்பாடுகளினால் இலங்கை நாசமடைந்துள்ளதாகவும் அநுரகுமார திஸாநாயக்க தலைமையிலான அரசாங்கம் தற்போது நாட்டில் இவ்வாறானதொரு அரசியல் கலாசாரத்திற்கு முற்றுப்புள்ளி வைக்கும் முயற்சியில் ஈடுபட்டு வருவதாகவும் அவர் தெரிவித்துள்ளார்.

அமைச்சரவை தீர்மானம் எடுப்பதற்கு அதிகாரிகளின் அனுமதி தேவையில்லை என ரணில் விக்கிரமசிங்க அண்மையில் தெரிவித்த கருத்துக்கு கடும் கண்டனம் தெரிவித்த பிரதமர் ஹரிணி அமரசூரிய, அது தனது ஆட்சி முறை எனவும், ஆனால் புதிய அரசாங்கம் வேறு அணுகுமுறையை பின்பற்றுவதாகவும் தெரிவித்தார்.

முடிவெடுப்பதற்கு முன் மக்களின் தேவைகள் மற்றும் சம்பந்தப்பட்ட அதிகாரிகளின் ஆலோசனைகளை கணக்கில் எடுத்துக் கொள்கிறோம். எங்களின் முடிவுகள் பொதுமக்களுக்கு நன்மை செய்வதில் கவனம் செலுத்துவதாக அவர் தெரிவித்தார்.

அரச ஊழியர்களின் சம்பளத்தை அதிகரிப்பதற்கான அனுமதி தொடர்பில் முன்னாள் அரசாங்கம் பின்பற்றிய நடைமுறைகள் தொடர்பில் முன்னாள் ஜனாதிபதி ரணில் விக்ரமசிங்கவுக்கும் பிரதமர் ஹரிணி அமரசூரியவுக்கும் இடையில் அண்மையில் மோதல் ஏற்பட்டது.

முன்னாள் அரசாங்கம் முறையான நடைமுறைகளை பின்பற்றவில்லை என பிரதமர் அமரசூரிய கூறியதற்கு பதிலளித்த ரணில் விக்கிரமசிங்க, அமைச்சரவை தீர்மானங்களுக்கு திணைக்கள அதிகாரிகளின் அங்கீகாரம் தேவையில்லை எனவும், அரசியலமைப்பு குறித்து பிரதமருக்கு பயிற்சி தேவையா எனவும் கேள்வி எழுப்பியிருந்தார்.