புறநிலையை மனமிருத்தி பொறுப்புடனே நடந்திடுவோம்!…. கவிஞர் மகாதேவ ஐயர் ஜெயராமசர்மா.
ஆலையிட்ட கரும்பாக அவதியுற்ற மக்களெலாம்
சாலையெலாம் திறந்ததென்று தாம்மகிழ்வு எய்துகிறார்
கோலோச்சும் கொரனோவோ கொன்றொழிக்கும் எண்ணமுடன்
அடுத்தகட்ட நிலையபற்றி ஆளமாய் நினைக்கிறது !
திறந்துவிட்ட காரணத்தால் திசைமாறிப் போகின்றார்
நிறுத்திவிட்ட அத்தனையும் நெஞ்சமதில் நிறைக்கின்றார்
சுயநினைவு இல்லாமல் செய்கின்றார் யாவருமே
நமைமறந்து இயங்கிவிடில் நம்மியக்கம் மழுங்கிவிடும் !
அளவுடனே நடப்பதால் ஆபத்து எமையணுகா
அளவுதனை மீறிவிடின் ஆபத்து வீடுவரும்
அரைகுறையாய் அறிந்துவிட்டு ஆட்டமெலாம் போடுவது
அரைகுறாய் ஆக்கியெமை அடங்கிவிடச் செய்திடுமே !
விடுதலை கிடைத்ததாய் வெற்றிவிழா நடத்துகிறார்
வேதனைகள் சோதனைகள் விலகியெங்கும் ஓடவில்லை
உலகத்தின் ஒருமூலை உணர்விழந்தே கிடக்கிறது
உணர்விழந்து நாமிருந்தால் ஓலமிடும் நிலைமைவரும் !
வெளிச்சம் வந்துவிட்டதென குதித்தெழுதல் குறைத்திடுவோம்
சுயவுணர்வை மனமிருத்தி செயற்படநாம் நினைந்திடுவோம்
அகமதிலே நற்கருத்தை அனைவருமே இருத்திடுவோம்
புறநிலையை மனமிருத்தி பொறுப்புடனே நடந்திடுவோம் !
