AI முதல் அணுவாயுதம் வரை – அச்சுறுத்தலுக்கு உள்ளாகும் மனித இருப்பு

அணு ஆயுதப் போரும், செயற்கை நுண்ணறிவின் (AI) தவறான பயன்பாடும் மனிதகுலத்தின் எதிர்காலத்தை ஆபத்தில் ஆழ்த்தக்கூடும் என்று ‘தி லான்செட்’ வெளியிட்ட புதிய அறிக்கையில் எச்சரிக்கப்பட்டுள்ளது.

இந்த அச்சுறுத்தல்கள் 2100-ஆம் ஆண்டிற்குள் மனிதகுலத்தை முற்றிலுமாக அழித்துவிடக்கூடும் என்று சுட்டிக்காட்டப்பட்டுள்ளது. இருப்பினும் அவ்வாறு நடப்பதற்கான வாய்ப்புகள் குறைவாகவே உள்ளன.

அடுத்த 75 ஆண்டுகளில் மனித ஆரோக்கியத்திற்குத் தீங்கு விளைவிக்கக்கூடிய 17 முக்கிய அச்சுறுத்தல்களை அந்த அறிக்கை பட்டியலிடுகிறது.

அணு ஆயுதப் போர், செயற்கை நுண்ணறிவின் தவறான பயன்பாடு, காலநிலை மாற்றம், காற்று மாசுபாடு, குழந்தைப் பருவ ஊட்டச்சத்துக் குறைபாடு, உடல் பருமன் மற்றும் சர்வதேச உதவிகளில் ஏற்படும் குறைப்புகள் ஆகியவை இதில் அடங்கும்.

இந்தப் பிரச்சினைகள் ஒன்றோடொன்று தொடர்புடையவை என்றும், அவற்றை ஒன்றாகவே கையாள வேண்டும் என்றும் கூறியுள்ளது. இருப்பினும், இந்த அபாயங்களைக் குறைக்கவும், எதிர்கால சந்ததியினரைப் பாதுகாக்கவும் அரசாங்கங்கள் இன்னும் நடவடிக்கைகளை எடுக்க முடியும் என்று நிபுணர்கள் கூறியுள்ளனர்.

“உயிரியல் ஆயுதங்கள் உட்பட, செயற்கை நுண்ணறிவின் தீங்கிழைக்கும் பயன்பாடு மற்றும் அணு ஆயுதப் பஞ்சத்துடன் கூடிய அணு ஆயுத மோதல் ஆகியவை அடுத்த 75 ஆண்டுகளில் இன அழிவின் அபாயங்களைக் கொண்டுள்ளன,” என்றும் அவ் அறிக்கையில் சுட்டிக்காட்டப்பட்டுள்ளது.

தீங்கு விளைவிக்கக்கூடிய உயிரியல் ஆயுதங்களை உருவாக்க செயற்கை நுண்ணறிவு தவறாகப் பயன்படுத்தப்படலாம் என்று அந்த அறிக்கை எச்சரிக்கிறது. அத்தகைய ஆயுதங்கள் மில்லியன் கணக்கான உயிர்களை ஆபத்தில் ஆழ்த்தக்கூடும், மேலும் தீவிரமான நிலையில், மனித உயிர்வாழ்விற்கே அச்சுறுத்தலாகவும் அமையலாம் எனக் குறிப்பிடப்பட்டுள்ளது.

அதேசமயம் அணுபோர் ஒன்றும் உலகத்திற்கு அச்சுறுத்தலாக அமையும் எனக் குறிப்பிடப்பட்டுள்ளது.

அது அதிக அளவிலான துகள்களை வளிமண்டலத்தின் மேல் அடுக்குக்கு அனுப்பி, சூரிய ஒளியைத் தடுத்து, உணவு உற்பத்தியைப் பாதிக்கக்கூடும். இது பரவலான பஞ்சத்திற்கு வழிவகுத்து, மனித உயிர்வாழ்விற்கு அச்சுறுத்தலாக அமையலாம்.

அணுப் போர் மற்றும் செயற்கை நுண்ணறிவின் தவறான பயன்பாடு தவிர, மனித ஆரோக்கியத்திற்கு மேலும் 15 முக்கிய அச்சுறுத்தல்களை இந்த ஆணையம் அடையாளம் கண்டுள்ளது.

இவற்றில் காற்று மாசுபாடு, காலநிலை மாற்றம், நுண்ணுயிர் எதிர்ப்பி எதிர்ப்புத் திறன் (antimicrobial resistance), குழந்தைப் பருவ ஊட்டச்சத்துக் குறைபாடு, வழக்கமான போர்கள், சர்வதேச உதவி குறைப்பு, அதிக மதுப் பயன்பாடு, உயர் இரத்த அழுத்தம், வருமான ஏற்றத்தாழ்வு, குறைந்த கல்வி நிலை, இயற்கையான பெருந்தொற்றுகள், உடல் பருமன், மோசமான மனநலம், புகைபிடித்தல் மற்றும் ஆரோக்கியமற்ற முதுமை ஆகியவை அடங்கும்.