மாவீரர் துயிலுமில்லங்களை இடித்துவிட்டு நல்லிணக்கத்தை எதிர்பார்க்க முடியுமா?

தமிழர்கள் கோயில்களாகப் போற்றும் மாவீரர் துயிலுமில்லங்களை இடித்தழிப்புச் செய்துவிட்டு, நாங்கள் தெய்வங்களாக மதிக்கின்ற மாவீரர்களின் மேல் இராணுவத்தினர் சப்பாத்துக் கால்களுடன் உதை பந்து விளையாடும்போது, இந்த நாட்டில் இனங்களுக்கிடையில் நல்லிணக்கம் ஏற்படும் என எவ்வாறு எதிர்பார்க்கின்றீர்கள்?

எனவே விடுவிக்கப்படாதுள்ள மாவீரர்துயிலுமில்லங்களை விடுவிப்பதற்கு நடவடிக்கை எடுப்பதுடன், இடித்தழிப்புச்செய்யப்பட்ட மாவீரர்துயிலுமில்லங்களை மீள நிர்மாணிப்பதற்கும் இந்த அரசு ஒத்துழைப்பு நல்கவேண்டும் என வன்னி மாவட்ட எம்.பி துரைராசா ரவிகரன் வேண்டுகோள் விடுத்தார்

பாராளுமன்றத்தில்  இடம் பெற்ற நம்பிக்கைப் பொறுப்புக்கள் (திருத்தச்) சட்டமூலம் மீதான விவாதத்தில் உரையாற்றுகையிலேயே இவ்வாறு வேண்டுகோள் அவர் மேலும் பேசுகையில்,

இது நவம்பர் மாதம்,தமிழ்தேசிய இனத்தின் விடிவிற்காக தமது இன்னுயிரை ஈகம்செய்து எமது இதயமெல்லாம் நிறைந்து நிற்கும் எம்முயிர் வீரர்களை நாம் போற்றி வணங்கும் புனித மாதம்.

எம்மினத்தின் விடுதலைக்காக ஈடிணையற்ற ஈகங்களைப் புரிந்த எம் மாவீரச் செல்வங்களுக்கு இந்த பேரவையிலே தலைசாய்த்து அஞ்சலிகளைத் தெரிவித்துக்கொள்கின்றேன்.

நவம்பர் மாதம் தொடங்கியதும் தமிழர் தாயகம் எங்கும் மாவீரர்களின் நினைவால் எழுச்சிகொள்கின்றது. மாவீரர் துயிலுமில்லங்கள் வழிபாடுகளுக்காகத் தயார்ப்படுத்தப்படுகின்றன.

எனினும் சில மாவீரர்துயிலுமில்லங்கள் இதுவரை விடுவிக்கப்படாத நிலையில் காணப்படுகின்றன.மாவீரர் துயிலுமில்லங்கள் இராணுவ முகாம்களாகப் பயன்படுத்தப்படுகின்றன.குறிப்பாக முல்லைத்தீவு மாவட்டத்தில் முள்ளியவளை மாவீரர் துயிலுமில்லம், அளம்பில் மாவீரர் துயிலுமில்லம் உள்ளிட்ட மாவீரர் துயிலுமில்லங்கள் தற்போது இராணுவ முகாம்களாகப் பயன்படுத்தப்படுகின்றன.

எனவே மாவீரர்களை விதைத்த இடத்தில், மலர்தூவி, சுடரேற்றி அஞ்சலி செலுத்த முடியாமல் மாவீரர்களின் பெற்றோரும் உறவினர்களும் தவிக்கின்றனர்.

யுத்தம் மௌனிக்கப்பட்ட கையோடு தமிழர் தாயகப்பரப்பிலிருந்த அனைத்து மாவீரர் துயிலுமில்லங்களும் இடித்தழிப்புச் செய்யப்பட்டன.நாங்கள் கோயில்களாகப் போற்றும் துயிலுமில்லங்களை இடித்தழிப்புச் செய்துவிட்டு, நாங்கள் தெய்வங்களாக மதிக்கின்ற மாவீரர்களின் மேல் இராணுவத்தினர் சப்பாத்துக் கால்களுடன் உதை பந்து விளையாடும்போது, இந்த நாட்டில் இனங்களுக்கிடையில் நல்லிணக்கம் ஏற்படும் என எவ்வாறு எதிர்பார்க்கின்றீர்கள்?

எனவே இனவாதத்திற்கு முற்றுப்புள்ளி வைக்கின்றோம், இனங்களுக்கிடையில் நல்லிணக்கத்தை எற்படுத்துகின்றோம் எனக் கூறிக்கொண்டு ஆட்சிக்கு வந்த இந்த அரசாங்கம், விடுவிக்கப்படாத மாவீரர்துயிலுமில்லங்களை விடுவிப்பதற்கு நடவடிக்கை எடுப்பதுடன், இடித்தழிப்புச்செய்யப்பட்ட மாவீரர்துயிலுமில்லங்களை மீள நிர்மாணிப்பதற்கும் ஒத்துழைப்பு நல்கவேண்டுமென கேட்டுக்கொள்கின்றேன் என்றார்.