ஈரானுடன் போர் நிறுத்த உடன்பாடு எட்டப்பட வாய்ப்பு! டிரம்ப் நம்பிக்கை

ஈரானுடனான போரை முடிவுக்குக் கொண்டுவருவதற்கான ஒப்பந்தம் ஒன்றில் கையெழுத்திட ஈரான் விருப்பம் தெரிவித்துள்ளதாகவும், அதற்கேற்ப அத்தகைய உடன்பாட்டை எட்டுவதற்கான சாத்தியக்கூறுகள் உள்ளதாகவும் அமெரிக்க ஜனாதிபதி டொனால்ட் டிரம்ப் தெரிவித்துள்ளார்.

தனது சமூக ஊடகப் பக்கத்தில் பதிவிட்டுள்ள டிரம்ப், ஈரான் கூடிய விரைவில் பேச்சுவார்த்தை மூலம் தீர்வை எட்ட எதிர்பார்ப்பதாகக் குறிப்பிட்டுள்ளார்.

மேலும், ஈரானுடன் போர் ஏற்படாது என்ற மக்களின் நம்பிக்கை காரணமாக, உலக சந்தையில் கச்சா எண்ணெய் விலை ஒரு பீப்பாய்க்கு அமெரிக்க டொலர் 10 வரை வரலாறு காணாத அளவிற்கு சரிவடைந்து வருவதாகவும் அவர் சுட்டிக்காட்டியுள்ளார்.

இருப்பினும், அத்தகைய ஒப்பந்தம் குறித்த மேலதிக விபரங்களை டிரம்ப் இதுவரை வெளியிடவில்லை.

இதற்கிடையில், வொஷிங்டனுடன் மறைமுகப் பேச்சுவார்த்தைகள் நடைபெற்று வருவதாக தெஹ்ரான் வெளிப்படுத்தியுள்ளது.

அத்துடன், கடுமையான நிபந்தனைகளின் கீழ் ஹோமுஸ் நீரிணையை மீண்டும் திறக்கவும் ஈரான் யோசனை தெரிவித்துள்ளது.

ஈரானுடன் உடன்பாட்டை எட்டுவது குறித்து ஜனாதிபதிப் போலவே தானும் சாதகமான நம்பிக்கையைக் கொண்டுள்ளதாக அமெரிக்க துணை ஜனாதிபதி ஜே.டி. வான்ஸும் தெரிவித்துள்ளார்.

கடந்த வாரம், துணை ஜனாதிபதி வான்ஸ் ஈரானின் பாதுகாப்புப் படைத் தலைவர் மொஹ்சென் ரெசாய் என்பவருக்குக் கடிதம் ஒன்றை அனுப்பியிருந்தபோதிலும், அதன் உள்ளடக்கங்கள் குறித்து வெள்ளை மாளிகை இதுவரை கூடுதல் விபரங்களை வெளிப்படுத்தவில்லை.

இருப்பினும், அந்தக் கடிதம் ஈரானுக்கு மருத்துவப் பொருட்கள் உட்பட பல்வேறு உதவிகளை வழங்குவது தொடர்பாக அனுப்பப்பட்டது என ஜனாதிபதி டிரம்ப் செய்தியாளர்களிடம் தெரிவித்துள்ளார்.

இதற்கிடையில், குறித்த கடிதம் தொடர்பாக செய்தியாளர்கள் எழுப்பிய கேள்விக்கு பதிலளித்த துணை ஜனாதிபதி வான்ஸ், அமெரிக்காவிற்கும் ஈரானுக்கும் இடையே உடன்பாட்டை எட்டுவதற்கான சாத்தியக்கூறுகள் குறித்து நம்பிக்கை உள்ளதாகக் கூறினார்.

“நாங்கள் ஈரான் தரப்புடன் சில நல்ல பேச்சுவார்த்தைகளை நடத்தியுள்ளோம். இது குறித்து சுமார் ஒரு மணி நேரத்திற்கு முன்பும் அமெரிக்க ஜனாதிபதியுடன் கலந்துரையாடினேன். பேச்சுவார்த்தை மூலம் உடன்பாட்டை எட்டுவதற்கான எதிர்பார்ப்புகள் குறித்து ஜனாதிபதியும் நானும் சாதகமான நம்பிக்கையுடன் உள்ளோம். அதற்காக நாங்கள் தொடர்ந்து பணியாற்றுவோம்” என அவர் தெரிவித்தார்.