பக்தர்கள் கூட்டத்திற்குள் புகுந்த லொரி; 13 பேர் உயிரிழப்பு!

மத்தியப் பிரதேசத்தின் குவாலியரில், இன்று (18) அதிகாலை, நெல் மூட்டைகளை ஏற்றிச் சென்ற லொரி ஒன்று காவல் துறையின் தடுப்புகளை உடைத்துக்கொண்டு ஷீட்லா மாதா கோயிலுக்குச் சென்று கொண்டிருந்த பக்தர்கள் கூட்டத்திற்குள் புகுந்ததில், குறைந்தது 13 பேர் உயிரிழந்தனர்.

இந்த விபத்தில் மேலும் 26 பேர் காயமடைந்தனர். இந்த விபத்து சின்னர் சாலையில் அதிகாலை 1.30 மணியளவில் நிகழ்ந்தது.

இப்பகுதியில் செங்குத்தான சரிவு இருப்பதால், கனரக வாகனங்களின் போக்குவரத்திற்குத் தடை விதிக்கப்பட்டிருந்தது.

கிடைக்கப்பெற்ற தகவல்களின்படி, சாலையில் நிறுத்தப்பட்டிருந்த அந்த லொரி, தடுப்புகளை உடைத்துக்கொண்டு, கட்டுப்பாட்டை இழந்து சரிவான பாதையில் வேகமாகச் சென்று, கோயிலின் வெளிச்சுவர் மற்றும் நுழைவு வாயிலின் மீது மோதியது.

அப்போது சாலையில் நடந்து சென்றுகொண்டிருந்த பக்தர்கள் வாகனத்திற்கு அடியில் சிக்கி நசுங்கினர்.

நகரத்தின் மூத்த பொலிஸ் அதிகாரி ஒருவரின் தகவல்படி, இந்தச் சம்பவத்தைத் தொடர்ந்து மொத்தம் 39 பேர் மருத்துவமனையில் அனுமதிக்கப்பட்டனர்.

அவர்களில் 13 பேர் உயிரிழந்துள்ளனர்.

காயமடைந்தவர்களில் ஐந்து முதல் ஆறு பேர் எலும்பு முறிவுகளுடன் ஆபத்தான நிலையில் உள்ளனர்.

ஏனையவர்கள் இலகுவான காயங்களுடன் சிகிச்சை பெற்று வருகின்றனர்.

சம்பவ இடத்தில் பணியில் இருந்த பொலிஸ் அதிகாரிகள் இருவருக்கும் காயம் ஏற்பட்டுள்ளது.