நான் வெற்றி பெற்றால் நாட்டை விட்டு வெளியேறுவது தவறு; முஸ்லிம் மக்களுக்கு மரீன் லூ பென் பதில்

2027ஆம் ஆண்டு நடைபெறவுள்ள பிரெஞ்சு ஜனாதிபதித் தேர்தலில் தீவிர வலதுசாரிக் கட்சியான Rassemblement National (RN) இன் தலைவர் மரீன் லூ பென் வெற்றி பெற்றால், நாட்டை விட்டு வெளியேறத் தயாராக இருப்பதாகப் பலர் தெரிவித்துள்ள நிலையில், அவ்வாறு நினைப்பது தவறு என அவர் குறிப்பிட்டுள்ளார்.

“நான் வெற்றி பெற்றால் அனைத்துப் பிரெஞ்சு மக்களுக்குமான ஜனாதிபதியாக இருப்பேன். பிரான்ஸை விட்டு வெளியேற வேண்டும் என அவர்கள் நினைப்பது தவறானது” என மரீன் லூ பென் தெரிவித்துள்ளார்.

Marianne வார இதழுக்காக Ifop நிறுவனம் நடத்திய சமீபத்திய கருத்துக்கணிப்பின்படி, லூ பென் ஜனாதிபதியாகத் தெரிவுசெய்யப்பட்டால், பிரெஞ்சு மக்களில் 21 சதவீதத்தினர் நாட்டை விட்டு வெளியேறி வேறொரு நாட்டில் குடியேறத் தயாராக இருப்பதாகக் கூறியுள்ளனர்.

குறிப்பாக, பிரெஞ்சு முஸ்லிம்களில் 46 சதவீதத்தினரும், யூத மதத்தைச் சேர்ந்தவர்களில் 44 சதவீதத்தினரும், ஜீன்-லூக் மெலன்சோனின் La France Insoumise (LFI) கட்சி ஆதரவாளர்களில் 43 சதவீதத்தினரும் இத்தகைய கருத்தைக் கொண்டுள்ளதாகக் கருத்துக்கணிப்புத் தரவுகள் தெரிவிக்கின்றன.

இந்த முடிவுகள் தொடர்பாக CNews தொலைக்காட்சியில் கருத்துத் தெரிவித்த லூ பென், பிரான்ஸ் என்பது சம்பந்தப்பட்ட மக்களின் தாய்நாடு என்றும், அவர்கள் பிரெஞ்சுக் குடிமக்கள் என்றும் சுட்டிக்காட்டினார்.

“அவர்கள் நாட்டை விட்டு வெளியேற நினைப்பது முற்றிலும் தவறு. நமக்கு ஒரேயொரு நாடுதான் உள்ளது. எனது அரசியல் கொள்கைகளுடன் அவர்கள் முரண்படலாம். இருப்பினும், நான் ஜனநாயகத்தையும் அனைத்து அரசியல் கருத்துகளையும் மதிக்கிறேன்” என அவர் தெரிவித்தார்.

மேலும், மதச் சுதந்திரத்தையும் மனசாட்சிச் சுதந்திரத்தையும் முழுமையாக மதிப்பதாகக் குறிப்பிட்ட அவர், இஸ்லாம் பிரெஞ்சுக் குடியரசின் கொள்கைகளுடன் இணக்கமாக இருக்க முடியும் எனத் தான் பலமுறை கூறியுள்ளதாகவும் தெரிவித்தார்.

“குடியரசுக்கு எதிரானது ஷரியத் சட்டமும் இஸ்லாமிய அடிப்படைவாதமும்தான். அவற்றில் ஈடுபடுபவர்களுக்கு எதிராகவே எனது நடவடிக்கைகள் அமையும். சாதாரண முஸ்லிம் மக்கள் அச்சப்படுவதற்கு எந்தக் காரணமும் இல்லை.

அவர்கள் தங்களது மதச் சடங்குகளைத் தடையின்றித் தொடர்ந்து பின்பற்றலாம்” என்றும் அவர் கூறினார். எவ்வாறாயினும், பொது இடங்களில் பெண்கள் பர்தா அணிவதைத் தடைசெய்வது தொடர்பாகப் பொதுவாக்கெடுப்பு நடத்தத் திட்டமிட்டுள்ளதாகவும் லூ பென் தெரிவித்துள்ளார்.

தான் ஆட்சிக்கு வந்தால் இந்தத் தடையை ஒரே கட்டமாக நடைமுறைப்படுத்தாமல் படிப்படியாக அமல்படுத்துவதாகவும், முதற்கட்டமாகப் பல்கலைக்கழகங்கள், விளையாட்டு அமைப்புகள் மற்றும் பொதுக் கட்டடங்களில் அதனை அறிமுகப்படுத்தத் திட்டமிட்டுள்ளதாகவும் அவர் விளக்கமளித்துள்ளார்.

2027ஆம் ஆண்டு ஜனாதிபதித் தேர்தலை முன்னிட்டு, குடியேற்றம், மதச்சார்பின்மை மற்றும் தேசிய அடையாளம் தொடர்பான விவகாரங்கள் பிரான்ஸின் அரசியல் விவாதங்களில் முக்கிய இடம்பிடித்துள்ள நிலையில், லூ பென்னின் இந்தக் கருத்துகள் கவனத்தை ஈர்த்துள்ளன.