யாழ். மாவட்ட ஒருங்கிணைப்புக் குழுக் கூட்டத்தில் டோக்கன் முறை அறிமுகம்!
யாழ்ப்பாண மாவட்ட ஒருங்கிணைப்புக் குழுக் கூட்டத்தில் பங்கேற்பவர்களுக்காக டோக்கன் முறை புதிதாக அறிமுகப்படுத்தப்பட்டுள்ளது.
யாழ்ப்பாண மாவட்டச் செயலக மாநாட்டு மண்டபத்தில் நேற்று (14-10-2026) நடைபெற்ற மாவட்ட ஒருங்கிணைப்புக் குழுக் கூட்டத்தின்போதே இப்புதிய நடைமுறை நடைமுறைப்படுத்தப்படடுள்ளது.
கடந்த முறை நடைபெற்ற மாவட்ட ஒருங்கிணைப்புக் குழுக் கூட்டங்களில் அழைக்கப்படாதவர்களும் கலந்துகொண்டமை அவதானிக்கப்பட்டுள்ளது.
இதையடுத்து, அழைக்கப்பட்டவர்கள் மாத்திரம் கூட்ட மண்டபத்திற்குள் நுழைவதை உறுதிப்படுத்தும் நோக்கில் இம்முறை அறிமுகப்படுத்தப்பட்டுள்ளதாக யாழ்ப்பாண மாவட்ட அரசாங்க அதிபர் மருதலிங்கம் பிரதீபன் தெரிவித்துள்ளார்.
இதனடிப்படையில், கூட்டத்தில் பங்கேற்க அழைக்கப்பட்டவர்களுக்கு மண்டப நுழைவாயிலில் டோக்கன்கள் வழங்கப்பட்டதுடன் அவற்றின் அடிப்படையில் இருக்கைகளுக்கும் இலக்கங்கள் ஒதுக்கப்பட்டிருந்தன.
இந்த நடைமுறையின் மூலம் அழைக்கப்படாதவர்கள் கூட்டத்தில் பங்கேற்பதைத் தவிர்ப்பதுடன் கூட்டத்தின் ஒழுங்குமுறையைப் பேணவும் முடியும் என அரசாங்க அதிபர் தெரிவித்துள்ளமை குறிப்பிடத்தக்கது.
