நவநீதம் பிள்ளைக்கு நோபல் அமைதிப் பரிசு ; ட்ரம்ப் வெளியிட்ட தகவல்

போர்க் குற்றங்கள் மற்றும் மனித குலத்துக்கு எதிரான குற்றங்களுக்கு எதிராகக் குரல் கொடுத்த தென்னாப்பிரிக்க நீதிபதியும் தமிழ் வம்சாவளியைச் சேர்ந்தவருமான நவநீதம் பிள்ளைக்கு 2026ஆம் ஆண்டுக்கான நோபல் அமைதிப் பரிசு அறிவிக்கப்பட்டுள்ளதாகக் கூறப்படும் நிலையில், அமெரிக்க ஜனாதிபதி டொனால்டு ட்ரம்ப் அதனை விமர்சித்துள்ளார்.

இந்த முடிவு அவமானகரமானது மற்றும் வெட்கக்கேடானது என அவர் தெரிவித்துள்ளார்.

நோர்வே நோபல் குழு, 9ஆம் திகதி ஆஸ்லோவில் அமைதிப் பரிசு வெற்றியாளரை அறிவித்தபோது, நவநீதம் பிள்ளையைப் பாராட்ட அங்கு கூடியிருந்தவர்கள் கைதட்டினர்.

அப்போது நகைச்சுவையாகப் பேசிய அவர், “இன்னும் கொஞ்சம் கைதட்டினால், இந்தப் பரிசை ட்ரம்புடன் பகிர்ந்துகொள்வேன்” என்று குறிப்பிட்டார்.

கடந்த ஆண்டு நோபல் அமைதிப் பரிசைப் பெற்ற வெனிசுலா எதிர்க்கட்சித் தலைவர் மரியா கொரினா மச்சாடோ, தனது தங்கப் பதக்கத்தை ட்ரம்புக்கு வழங்கிய நிகழ்வைக் குறிப்பிட்டே நவநீதம் பிள்ளை இவ்வாறு கூறியதாகக் கருதப்படுகிறது.

இந்நிலையில், அதே நாளில் நியூயொர்க்கில் நடைபெற்ற ஆதரவாளர்கள் பேரணியில் பேசிய ட்ரம்ப், “இந்த நபரைப் பற்றி நான் கேள்விப்பட்டதே இல்லை. இருந்தாலும் வாழ்த்துகள்” என்று தெரிவித்தார். மேலும், “என்னால் பிரதிநிதித்துவப்படுத்தப்படும் அமெரிக்காவுக்கே அமைதிப் பரிசு கிடைத்திருக்க வேண்டும். ஆனால் அது கிடைக்கவில்லை” என்றும் கூறினார்.

நவநீதம் பிள்ளையைத் தேர்ந்தெடுத்த முடிவு நார்வே நாட்டுக்கு அழியாத களங்கம் எனக் குறிப்பிட்ட ட்ரம்ப், சில தீவிர சித்தாந்தவாதிகளால் நோபல் அமைதிப் பரிசின் மதிப்பு நிரந்தரமாகக் குறைந்துவிட்டதாகவும் விமர்சித்தார்.

2025 ஜனவரியில் மீண்டும் வெள்ளை மாளிகைக்குத் திரும்பியதிலிருந்து, நோபல் அமைதிப் பரிசைப் பெற வேண்டும் என்ற தனது விருப்பத்தை ட்ரம்ப் தொடர்ந்து வெளிப்படுத்தி வந்துள்ளார்.

எனினும், ஈரானுக்கு எதிரான போர், கிரீன்லாந்து உள்ளிட்ட பகுதிகளை இணைப்பது தொடர்பான அவரது விருப்பம், புலம்பெயர்ந்தோருக்கு எதிரான கடுமையான நடவடிக்கைகள் மற்றும் சர்வதேச அமைப்புகள், ஊடகங்கள் மீதான விமர்சனங்கள் ஆகியவை அவரைப் பரிசுக்குத் தகுதியற்றவராக்குவதாக, விருது அறிவிப்புக்கு முன்னர் ஆஸ்லோவில் கருத்துத் தெரிவித்த நிபுணர்கள் குறிப்பிட்டிருந்ததாக அந்தச் செய்தியில் தெரிவிக்கப்பட்டுள்ளது.