பாகிஸ்தானின் இரட்டை வேடத்தை ஐ.நா வில் தோலுரித்துக் காட்டிய இந்தியா

ஐக்கிய நாடுகள் சபையில் பாகிஸ்தான் முன்வைத்த ஆதாரமற்றக் குற்றச்சாட்டுகளுக்கு இந்தியா தகுந்த பதிலடி கொடுத்துள்ளதுடன், பயங்கரவாதம் தொடர்பாக அந்நாட்டின் இரட்டை வேடத்தையும் அம்பலப்படுத்தியுள்ளது.

ஐ.நா பொதுச்சபையின் ஆறாவது குழுக்கூட்டத்தில் (சட்ட விவகாரங்கள்) பாகிஸ்தானின் துணை நிலைப்பிரதிநிதி உஸ்மான் ஜாடூன் முன்வைத்த உரையாடலுக்குப் பதிலளிக்கும் வகையில், ஐ.நா-விற்கான இந்திய தூதரகத்தின் முதன்மைச் செயலாளர் ரகூ பூரி (Raghoo Puri) ‘பதிலளிக்கும் உரிமை’ (Right of Reply) மூலம் உரையாற்றினார்.

பயங்கரவாதத்திற்கு எதிராகப் போராடும் முன்னணி நாடாகவும், அதனால் பாதிக்கப்பட்ட நாடாகவும் பாகிஸ்தான் உலகிற்குத் தன்னைக் காட்டிக்கொள்ள முயல்கிறது.

ஆனால், அண்டை நாடுகளில் அழிவை ஏற்படுத்த பாகிஸ்தான் அரசு உருவாக்கிய பயங்கரவாத அமைப்புகள், தற்போது அந்நாட்டின் கட்டுப்பாட்டை மீறி பாகிஸ்தானிலேயே அதே அழிவை ஏற்படுத்தி வருவதை மறைப்பதாக இந்தியா சாடியுள்ளது.

“வேட்டையாடும் நாய்களுடனும் ஓடி, தப்பிக்கும் முயல்களுடனும் ஓட முடியாது. உண்மை எப்போதுமே அப்படிச் செயல்படுவதில்லை” என்று கூறிய ரகூ பூரி, பாகிஸ்தான் உருவாக்கிய பயங்கரவாதம் எனும் அரக்கன் தற்போது அதனையே அச்சுறுத்தத் தொடங்கியுள்ளதைச் சுட்டிக்காட்டினார்.

பாகிஸ்தான் அரசியல் தலைவர்களின் முரண்பாடான கூற்றுக்களையே சான்றாக முன்வைத்த இந்தியா, பஞ்சாப் மாகாண முதலமைச்சர் மரியம் நவாஸ் தமது மாகாணத்திற்கு அண்டை நாடுகளை விட அண்டை மாகாணங்களிலிருந்தே அதிக அச்சுறுத்தல் இருப்பதாக ஒப்புக்கொண்டதையும், முன்னாள் பிரதமர் நவாஸ் ஷெரீப் 2018-இல் அளித்த பேட்டியில் 26/11 மும்பை தாக்குதலில் பாகிஸ்தான் பயங்கரவாதிகளின் பங்களிப்பை வெளிப்படுத்தியதையும் ஐ.நா-வில் நினைவுகூர்ந்தது.

பஹல்காம் பயங்கரவாதத் தாக்குதலுக்குப் பதிலடியாக இந்தியா நடத்திய ‘ஒபரேஷன் சிந்தூர்’ (Operation Sindoor) தொடர்பில் பாகிஸ்தான் பரப்பும் போலிப் பிரச்சாரங்களையும் இந்தியா நிராகரித்தது.

மேலும், ஐ.நா-வால் தடைசெய்யப்பட்ட ஜெய்ஷ்-ஏ-முஹம்மது அமைப்பின் தலைவர் மசூத் அசாரைப் பிடிப்பதற்கான பரிசுத் தொகையை பாகிஸ்தான் உயர்த்தியிருப்பது ஒரு கண் துடைப்பு நடவடிக்கை என்றும், ஊடகங்களால் தொடர்புகொள்ள முடிகின்ற மசூத் அசார் இருக்கும் இடத்தை பாகிஸ்தான் அரசு அறியாமல் இருக்க முடியாது என்றும் இந்தியா சுட்டிக்காட்டியது.

9/11 தாக்குதலின் சூத்திரதாரி ஒசாமா பின் லேடன் பாகிஸ்தானில் பிடிபட்டதையும், 26/11 மும்பைத் தாக்குதல் மற்றும் பஹல்காம் தாக்குதல்களையும் உலகம் இன்னும் மறக்கவில்லை என வலியுறுத்திய இந்தியா, அரசு ஆதரவுடன் செயல்படும் பயங்கரவாத அமைப்புகளுக்கு எதிராகச் சர்வதேச சமூகம் தீர்க்கமான நடவடிக்கை எடுக்க வேண்டும் எனக் கேட்டுக்கொண்டது