மகளை கொள்ள சதித்திட்டம்: ChatGPT முறைப்பாடு

தனது எட்டு வயது மகனைக் கொல்லத் திட்டமிட்டதாகக் கூறப்படும் விவகாரத்தில், ChatGPT-உடன் குறுஞ்செய்திகள் மூலம் உரையாடிய 36 வயதான விவசாயி ஒருவர் பிரேசில் பொலிஸாரால் கைது செய்யப்பட்டுள்ளார்.

ChatGPT-ஐ உருவாக்கிய OpenAI நிறுவனம், அந்த நபர் அனுப்பிய செய்திகள் குறித்து FBI-க்குத் தகவல் அளித்ததைத் தொடர்ந்து அவர் கைது செய்யப்பட்டார். இத்தகவல் FBI மூலமாகப் பிரேசிலிய அதிகாரிகளுக்குத் தெரிவிக்கப்பட்டது.

செயற்கை நுண்ணறிவு (AI) மூலம் உருவாக்கப்பட்ட எச்சரிக்கையின் அடிப்படையில் அமைந்த இத்தகைய வழக்கு, அந்த மாநிலத்திற்கே முதல் முறை என்றும், பிரேசிலில் பதிவான மூன்றாவது வழக்கு இதுவென்றும் புலனாய்வாளர் ஒருவர் தெரிவித்தார்.

காவல்துறை அதிகாரிகளைத் தாக்குவது, பள்ளிகள் மற்றும் தேவாலயங்கள் மீது தாக்குதல் நடத்துவது மற்றும் தற்கொலை செய்துகொள்வது குறித்தும் அந்தச் சந்தேக நபர் ChatGPT-யிடம் கேட்டதாகப் புலனாய்வாளர்கள் கூறுகின்றனர்.

அவர் நச்சுப் பொருட்கள் குறித்து ஆய்வு செய்ததாகவும், ChatGPT-யின் பாதுகாப்பு அம்சங்களைத் தவிர்க்க முயன்றதாகவும் அவர்கள் தெரிவித்தனர். அவரது உடைமைகளில் நடத்தப்பட்ட சோதனைகளின் போது, அடையாளம் தெரியாத பொருட்கள் அடங்கிய நான்கு பாட்டில்களும் ஒரு கயிற்றும் காவல்துறையினர் கண்டெடுத்தனர்.

அந்த நபர் தனது மகனுக்குத் தீங்கு விளைவிக்கும் நோக்கம் தனக்கு இல்லை என்று மறுத்துள்ளார்; அவர் ஒரு Chatbot-இடம் வெறுமனே “அர்த்தமற்ற விஷயங்களைப் பேசிக்கொண்டிருந்தார்” என்று அவரது வழக்கறிஞர் வாதிட்டுள்ளார்.

54 நாட்கள் காவலில் வைக்கப்பட்டுந்த அவர், விசாரணை நடைபெறும் நிலையில் விடுவிக்கப்பட்டார். அவர் மீது இதுவரை எந்தக் குற்றச்சாட்டும் பதிவு செய்யப்படவில்லை. இருப்பினும், அவர் தொடர்ந்து மின்னணு கண்காணிப்பில் உள்ளார். மேலும், தனது மகனையோ அல்லது அந்தக் குழந்தையின் தாயையோ தொடர்புகொள்வதற்கும் அவருக்குத் தடை விதிக்கப்பட்டுள்ளது.

AI நிறுவனங்கள் தங்கள் பயனர்கள் குறித்துக் காவல்துறைக்குத் தகவல் தெரிவிக்கும் சம்பவங்கள் அரிதாகவே நடைபெறுவதாகக் கருதப்படுகிறது. உதாரணமாக, கடந்த ஆகஸ்ட் மாதம், ஃபுளோரிடாவைச் சேர்ந்த 25 வயது ஆண் ஒருவர் தனது முன்னாள் காதலியை பாலியல் வன்கொடுமை செய்து கொலை செய்வது குறித்து ChatGPT-யில் பேசியதாகக் கூறப்பட்டதைத் தொடர்ந்து, OpenAI நிறுவனம் FBI-க்குத் தகவல் அளித்தது.

குறிப்பிடத்தக்க வகையில், அடையாளம் காணக்கூடிய நபர் ஒருவருக்கு எதிரான அச்சுறுத்தலும், அது உடனடியாக நிகழக்கூடிய அபாயமும் இருப்பதை செயற்கை நுண்ணறிவு சாப்பாடுகள் கண்டறிந்தால், அது குறித்து அதிகாரிகளுக்குத் தெரிவிக்க அவர்களுக்குச் சட்டப்பூர்வ கடமை இருக்கக்கூடும் என்று நிபுணர்கள் கூறுகின்றனர்.

ஆனால், உண்மையான அச்சுறுத்தல்களையும் உணர்ச்சிவசப்பட்டு தெரிவிக்கப்படும் கருத்துக்கள், கற்பனைகள் அல்லது ஆத்திரமூட்டும் வகையிலான கூற்றுக்களையும் வேறுபடுத்திக் காணும் வகையில் பாதுகாப்பு நடைமுறைகள் தேவை என்று அவர்கள் வாதிடுகின்றனர்.