மயிலத்தமடு – மாதவனைபிரச்சினைக்கு 1,500 நாட்கள் கடந்தும் இன்னமும் தீர்வில்லை; சாணக்கியன் எம்.பி. கடும் விசனம்

மயிலத்தமடு – மாதவனை பகுதியில் நிலைமை மிகவும் மோசமான கட்டத்தை எட்டியுள்ளது. பாரம்பரிய மேய்ச்சல் நிலங்களைப் பாதுகாக்க வேண்டும் எனக் கோரி கால்நடை பண்ணையாளர்கள் தற்போது 1,500 நாட்களுக்கும் மேலாக அமைதியான போராட்டத்தில் ஈடுபட்டு வருகின்றனர். பல ஆண்டுகளாக போராட்டங்கள் முன்னெடுக்கப்பட்டும், தொடர்ச்சியாக வந்த அரசாங்கங்களிடம் கோரிக்கைகள் முன்வைக்கப்பட்டும், பாராளுமன்றத்தில் பிரச்சினை எழுப்பப்பட்டும், மீண்டும் மீண்டும் உறுதிமொழிகள் வழங்கப்பட்டும் இந்தப் பிரச்சினைக்கு இன்னும் தீர்வு வழங்கப்படவில்லை என இலங்கை தமிழ் அரசுக் கட்சியின் பாராளுமன்ற உறுப்பினர் சாணக்கியன் தெரிவித்துள்ளார்.

இது தொடர்பாக சாணக்கியன் மேலும் கூறுகையில்,

பாரம்பரியமாக கால்நடைகளின் மேய்ச்சலுக்குப் பயன்படுத்தப்பட்டு வந்த மேய்ச்சல் நிலங்கள் பெருமளவில் சேதமடைந்தும் ஆக்கிரமிக்கப்பட்டும் வருகின்ற நிலையில், பரந்த நிலப்பரப்புகளில் தற்போது கால்நடைகளுக்குத் தேவையான புற்கள் இல்லாத நிலை ஏற்பட்டுள்ளது.தொடர்ந்து நிலவும் மழையின்மை மற்றும் வறட்சியான காலநிலை இந்த நிலைமையை மேலும் மோசமாக்கியுள்ளது.
கால்நடை பண்ணையாளர்கள் தமது கால்நடைகளுக்குப் போதுமான மேய்ச்சல் நிலங்களைப் பெற்றுக்கொள்ள முடியாமல் பெரும் சிரமங்களை எதிர்கொள்கின்றனர். இதனால் அவர்களின் வாழ்வாதாரமும், அவர்களின் வாழ்வாதாரத்தைத் தாங்கி நிற்கும் கால்நடைகளும் கடுமையான ஆபத்தை எதிர்கொண்டுள்ளன.

பாரம்பரிய மேய்ச்சல் நிலங்களைப் பாதுகாக்க வேண்டும் எனக் கோரி கால்நடை பண்ணையாளர்கள் தற்போது 1,500 நாட்களுக்கும் மேலாக அமைதியான போராட்டத்தில் ஈடுபட்டு வருகின்றனர்.

பல ஆண்டுகளாகப் போராட்டங்கள் முன்னெடுக்கப்பட்டும், தொடர்ச்சியாக வந்த அரசாங்கங்களிடம் கோரிக்கைகள் முன்வைக்கப்பட்டும், நாடாளுமன்றத்தில் பிரச்சினை எழுப்பப்பட்டும், மீண்டும் மீண்டும் உறுதிமொழிகள் வழங்கப்பட்டும் இந்தப் பிரச்சினைக்கு இன்னும் தீர்வு வழங்கப்படவில்லை.

இந்த நிலங்கள் கால்நடைகளின் மேய்ச்சலுக்குப் பயன்படுத்தப்படுவது 1972ஆம் ஆண்டில் ஆரம்பமானதல்ல. பல தலைமுறைகளாக, சமூகத்தின் வரலாற்றுப் புரிதலின்படி பல நூற்றாண்டுகளாகவே விவசாயிகள் இந்த நிலங்களைப் பாரம்பரியமாக பயன்படுத்தி வருகின்றனர். முக்கியமாக, 1972ஆம் ஆண்டு முதல் இந்நிலங்கள் கால்நடை மேய்ச்சலுக்குப் பயன்படுத்தப்பட்டமைக்கான உத்தியோகபூர்வ ஆவணப் பதிவுகளும் காணப்படுகின்றன.

பாராளுமன்றப் பதிவுகளிலும், 1972ஆம் ஆண்டு முதல் மட்டக்களப்பு மாவட்ட பால் உற்பத்தியாளர்களுக்காக மயிலத்தமடு கால்நடை மேய்ச்சல் நிலமாக ஒதுக்கப்பட்டிருந்தமை குறிப்பிடப்பட்டுள்ளது.எனவே, 1972ஆம் ஆண்டு என்பது ஏற்கனவே நடைமுறையில் இருந்த பாரம்பரிய பயன்பாட்டுக்கான உத்தியோகபூர்வ ஆவணம், விவசாயிகள் குறித்த நிலங்களை பயன்படுத்தத் தொடங்கிய ஆண்டைக் குறிக்கவில்லை.

இந்தப் பிரச்சினையால் பாதிக்கப்பட்டுள்ள சமூகத்தின் அளவும் சில உத்தியோகபூர்வ பதிவுகளில் காணப்படும் எண்ணிக்கையை விட அதிகமாகும்.
பாரம்பரியமாக கால்நடை மேய்ச்சலுக்குப் பயன்படுத்தப்பட்ட நிலங்கள் ஆக்கிரமிக்கப்பட்டு விவசாய நடவடிக்கைகளுக்குப் பயன்படுத்தப்படுவதால் இந்தப் பிரச்சினை மேலும் தீவிரமடைந்துள்ளது.

வெளிப்பகுதிகளைச் சேர்ந்த சிலர் இந்நிலங்களை ஆக்கிரமித்துள்ளதாகவும், அதன் காரணமாக மேய்ச்சல் நிலங்கள் இழக்கப்படுவதாகவும் விவசாயிகள் தொடர்ச்சியாகக் குற்றச்சாட்டுகளை முன்வைத்து வருகின்றனர்.

கால்நடைகள் கொல்லப்பட்டும் காயப்படுத்தப்பட்டும் உள்ள சம்பவங்களும் இடம்பெற்றுள்ளதாக அவர்கள் தெரிவித்துள்ளனர்.

தொடர்ச்சியான நில ஆக்கிரமிப்பு மற்றும் பயிர்ச்செய்கைக்கு பின்னால் உள்ள சக்திகள் தொடர்பாகவும் கால்நடைப் பண்ணையாளர்கள் பாரதூரமான குற்றச்சாட்டுகளை முன்வைத்துள்ளனர்.

குறிப்பிட்ட சில பௌத்த பிக்குகள் மற்றும் முன்னாள் கிழக்கு மாகாண ஆளுநர் அனுராதா யஹம்பத் ஆகியோர் இந்த நிலங்களின் ஆக்கிரமிப்பு மற்றும் பயிர்ச்செய்கைக்கு ஆதரவளித்ததாக அல்லது அதனைத் தூண்டியதாக அவர்கள் குற்றஞ்சாட்டுகின்றனர்.