முதல்வர் விஜய்யின் மோட்டார் ஸ்போர்ட்ஸ் சிட்டி அறிவிப்புக்கு அஜித் பாராட்டு!

மோட்டார் விளையாட்டுக்கான உள்கட்டமைப்பை மேம்படுத்தும் வகையில் அரசு முன்னெடுப்புகளை அறிவித்து, மோட்டார் விளையாட்டு உட்பட அனைத்து விளையாட்டுப் பிரிவுகளுக்கும் கவனம் செலுத்தியதற்காக நடிகர் மற்றும் பந்தய வீரரான அஜித் குமார், தமிழக முதலமைச்சர் சி. ஜோசப் விஜய்க்கு நன்றி தெரிவித்து அறிக்கை ஒன்றை வெளியிட்டுள்ளார்.

அந்த அறிக்கையில் அவர்,

தமிழ்நாட்டின் இளைஞர்களை விளையாட்டுத் துறையின் பக்கம் ஈர்த்து, அவர்களிடம் உள்ள திறமைகளைக் கண்டறிந்து, அவற்றை முறையாக வளர்த்தெடுப்பதற்கான வாய்ப்புகளை உருவாக்கும் வகையில் தமிழ்நாடு அரசு மேற்கொண்டு வரும் பல்வேறு முன்னெடுப்புகள் மிகுந்த பாராட்டுக்குரியவை.

குறிப்பாக, தமிழ்நாட்டில் பிரத்யேகமான மோட்டார் ஸ்போர்ட்ஸ் சிட்டி அமைக்கப்பட உள்ளதாக அறிவிக்கப்பட்டிருப்பது எனக்கு மிகுந்த மகிழ்ச்சியை அளிக்கிறது.

தற்போது மோட்டார் ஸ்போர்ட்ஸில் ஈடுபட்டு வரும் ஒருவராக, விண்வெளி வீரர் திரு. நீல் ஆம்ஸ்ட்ராங் அவர்களின் புகழ்பெற்ற வார்த்தைகளை சற்றே மாற்றி இவ்வாறு கூற விரும்புகிறேன்:

“One small step by the Tamil Nadu Government, one giant leap for Indian motorsports (தமிழக அரசின் ஒரு சிறிய அடி, இந்திய மோட்டார் பந்தயத்துறைக்கு ஒரு மாபெரும் பாய்ச்சல்)”

மோட்டார் ஸ்போர்ட்ஸ் சிட்டி உள்ளிட்ட தமிழ்நாடு அரசின் அனைத்து விளையாட்டு முன்னெடுப்புகளும் மாபெரும் வெற்றி பெறட்டும் – என்று கூறியுள்ளார்.

தமிழ்நாடு முதலமைச்சர் சி. ஜோசப் விஜய் வியாழக்கிழமையன்று சென்னையை முழுமையாக மேம்படுத்துவதற்கான பிரம்மாண்டத் திட்டத்தை வெளியிட்டார்.

இதன்படி சென்னையில் புதிய தலைமைச் செயலக வளாகம், ஒலிம்பிக் நகரம் மற்றும் மோட்டார் விளையாட்டு நகரம் ஆகியவை அமைக்கப்படும் என்று அவர் அறிவித்தார்.

சென்னையில், சுமார் 1,200 கோடி ரூபாய் மதிப்பீட்டில், 20 லட்சம் சதுர அடி பரப்பளவைக் கொண்ட புதிய ஒருங்கிணைந்த தலைமைச் செயலகம் மற்றும் சட்டமன்ற வளாகத்தை அமைப்பதற்கான திட்டத்தை விஜய் அறிவித்தார்.

இந்த புதிய வளாகம், தற்போது செயின்ட் ஜார்ஜ் கோட்டையில் சிதறி அமைந்துள்ள மாநில அரசுத் துறைகள் அனைத்தையும் ஒரே நிர்வாக வளாகத்தின் கீழ் ஒருங்கிணைக்கும்.

அடுத்த 100 ஆண்டுகளுக்கு தமிழகத்தின் நிர்வாகத் தேவைகளைப் பூர்த்தி செய்ய இந்த நடவடிக்கை அவசியம் என்று முதலமைச்சர் கூறினார்.

அவர் ஃபோர்முலா பிஎம்டபிள்யூ ஆசியா, பிரிட்டிஷ் ஃபார்முலா 3 மற்றும் எஃப்ஐஏ ஃபார்முலா 2 சாம்பியன்ஷிப் போட்டிகளில் பங்கேற்றுள்ளார்.

அண்மையில் அவர், ‘அஜித் குமார் ரேசிங்’ என்ற தனது அணியைத் தொடங்கினார்.

இந்த அணி 24 மணி நேர துபாய் மற்றும் பிற எண்டூரன்ஸ் பந்தயங்களில் வெற்றி மேடைகளை வென்றுள்ளது.

அஜித் தனது திரைப்பட மற்றும் மோட்டார் பந்தய வாழ்க்கையைச் சமநிலைப்படுத்துவார்.

தனது தற்போதைய விளையாட்டுப் பணிகளுக்குப் பிறகு, அவர் புதிதாகத் தொடங்கப்பட்ட ‘டேர் டெவில்’ திரைப்படத்தின் படப்பிடிப்பைத் தொடங்குவார்.

‘குட் பேட் அக்லி’ புகழ் ஆதிக் ரவிச்சந்திரன் இயக்கும் இந்தப் படம், அவரது மனைவியும் முன்னாள் நடிகையுமான ஷாலினியின் முதல் தயாரிப்பு முயற்சியாகும்.