இரண்டாது அரகலய போராட்டம் சிறைச்சாலைகளில் வெடிக்கும் அபாயம்!

இலங்கையின் அடுத்தகட்ட அரகலய அல்லது மக்கள் போராட்டம் சிறைச்சாலை அமைப்பை மையமாகக் கொண்டு தொடங்குவதற்கான தீவிர அபாயம் நிலவுவதாக ஜனாதிபதி சட்டத்தரணியும் மத்திய மாகாணத்தின் முன்னாள் ஆளுநருமான மைத்திரி குணரத்ன தெரிவித்துள்ளார்.

நீதிபதிகளின் ஓய்வுபெறும் வயதை உயர்த்த அரசாங்கம் மேற்கொண்டுள்ள முயற்சிகள் குறித்து மல்வத்து மற்றும் அஸ்கிரிய மகாநாயக்க தேரர்களுக்குத் தெளிவுபடுத்துவதற்காக கண்டிக்கு விஜயம் செய்திருந்தபோதே, ஊடகங்களுக்குக் கருத்துத் தெரிவிக்கையில் அவர் இவ்வாறு எச்சரித்துள்ளார்.

சிறைச்சாலைகளில் நிலவும் கடுமையான இடநெருக்கடி மற்றும் அங்குள்ள சீர்கேடுகள் குறித்து அவர் கருத்து வெளியிட்டுள்ளார். சிறைச்சாலைகளில் நிலவும் பிரச்சினைகளுக்கு அரசாங்கம் உரிய முறையில் தீர்வு காணத் தவறினால், நாட்டின் அடுத்தகட்ட மக்கள் போராட்டத்தின் (அரகலய) ஆரம்பப் புள்ளியாக அதுவே அமையும் என தெரிவித்துள்ளார்.

நீதிபதிகளின் ஓய்வுபெறும் வயதை உயர்த்த முன்மொழியப்பட்டுள்ள அரசியலமைப்பு திருத்தத்தைக் கடுமையாக விமர்சித்த மைத்திரி குணரத்ன, ஏனைய அரசு ஊழியர்களுக்கு இல்லாத ஒரு சிறப்புச் சலுகையை நீதிபதிகளுக்கு மட்டும் வழங்குவது நியாயமற்றது என குறிப்பிட்டுள்ளார்.

இராணுவ அதிகாரிகள் 55 வயதிலும், ஏனைய சிவில் அரசு ஊழியர்கள் 60 வயதிலும் ஓய்வுபெறும்போது, நீதிபதிகளுக்கு மட்டும் சேவைக்காலத்தை நீடிப்பது ஏன் என்று அவர் கேள்வி எழுப்பியுள்ளார்.

ஒரு குறிப்பிட்ட நபரின் சேவைக்காலத்தை அரசாங்கம் நீட்டித்தால், அந்தத் தீர்மானத்தை எடுத்த தரப்பிற்கு அவர் நன்றியுடையவராகச் செயல்படக்கூடும். இது நீதித்துறையின் சுயாதீனத்திற்கு நேரடிப் பாதிப்பை ஏற்படுத்தும் என்றும் அவர் சுட்டிக்காட்டியுள்ளார்.

இந்த அரசியலமைப்பு திருத்தம் 2028-ஆம் ஆண்டிற்குப் பிறகு நடைமுறைப்படுத்தப்பட்டால் அதில் எந்தப் பிரச்சினையும் இல்லை எனவும், தற்போதைய அரசியல் சூழலில் இத்தகைய அவசரத் தீர்மானங்களை எடுப்பதற்குப் பின்னால் மறைமுக நோக்கங்கள் இருக்கலாம் எனவும் அவர் சந்தேகம் வெளியிட்டுள்ளார்.