அமெரிக்க கடவுச்சீட்டில் ட்ரம்ப் முகம்: வரட்டு அகம்பாவத்தின் உச்ச திமிர் !… ஐங்கரன் விக்கினேஸ்வரா

அமெரிக்காவின் 250 ஆவது சுதந்திர தினத்தை முன்னிட்டு, அமெரிக்க ஜனாதிபதி டொனால்ட் ட்ரம்ப்பின் உருவப்படம் அடங்கிய சிறப்பு கடவுச் சீட்டுகளை வெளியிட அமெரிக்க அரசாங்கம் முடிவு செய்துள்ளது. அமெரிக்கக் கடவுச் சீட்டில் ட்ரம்பின் முகம் இடம்பெறுவது என்ற கருத்து, அரசியல், தேசிய அடையாளம், ஜனநாயக மதிப்புகள் ஆகியவற்றைச் சுற்றியுள்ள ஒரு காரசாரமான விவாதத்தை உருவாக்குகிறது. இது ஒரு நிகழ்கால அரசியல் முடிவு மட்டுமல்ல. அது ஒரு நாட்டின் அடையாளத்தையும் அதன் மதிப்புகளையும் பிரதிபலிக்கும் ஒரு சின்னமாக மாறக்கூடும்.

இந்த கடவுச்சீட்டுகளில் ட்ரம்ப்பின் உருவப்படம், அமெரிக்க சுதந்திரப் பிரகடனத்தின் வரிகள் மற்றும் அமெரிக்க தேசியக் கொடி ஆகியவை இடம்பெற்றுள்ளதுடன் ட்ரம்ப்பின் கையொப்பம் தங்க நிறத்தில் பதிக்கப்பட்டுள்ளமை குறிப்பிடத்தக்கது.

இந்த சிறப்பு பதிப்பு கடவுச்சீட்டுகளை வாஷிங்டன் கடவுசீட்டு முகவரகத்தில் (Washington Passport Agency) மட்டுமே கிடைக்கும் என்றும், விண்ணப்பிக்கும் எந்தவொரு அமெரிக்க குடிமகனும் இதனைப் பெற்றுக் கொள்ளலாம் என்றும் தெரிவிக்கப்பட்டுள்ளது.

அமெரிக்கக் கடவுச்சீட்டு என்பது வெறும் பயண ஆவணம் அல்ல. அது அமெரிக்காவின் அரசியல் மரபு, ஜனநாயகக் கொள்கைகள், மற்றும் உலகில் அதன் நிலையை எடுத்துரைக்கும் ஒரு அதிகாரப்பூர்வ அடையாளமாகும். இதன் உள்ளே பொதுவாக தேசிய சின்னங்கள், வரலாற்றுப் புகழ்பெற்ற தலைவர்கள், அல்லது அமெரிக்கக் கட்டிடக்கலைச் சின்னங்கள் போன்றவை இடம்பெறும். ஆனால் ஒரு சமகால அரசியல் தலைவரின் முகம், குறிப்பாக இன்னும் விவாதப் பொருளாக உள்ள ஒருவரின் படம் இடம்பெறுவது, பாரம்பரியத்திலிருந்து ஒரு பெரிய மாற்றமாகக் கருதப்படும்.

ட்ரம்பின் ஆட்சி காலம் அமெரிக்காவில் ஆழமான பிளவுகளை உருவாக்கியதாக பலர் கருதுகின்றனர். அவரது கொள்கைகள், குறிப்பாக குடியேற்றம், வர்த்தகம், மற்றும் வெளிநாட்டு உறவுகள் போன்ற துறைகளில், பல்வேறு கருத்து வேறுபாடுகளை ஏற்படுத்தின. இப்படிப்பட்ட ஒரு தலைவரின் முகம் கடவுச்சீட்டில் இடம்பெற்றால், அது சிலருக்கு தேசிய பெருமையை உணர்த்தினாலும், மற்றவர்களுக்கு அது அரசியல் பாகுபாட்டின் அடையாளமாகத் தோன்றலாம்.

மேலும், ஜனநாயக நாடுகளில், அரசியல் அமைப்புகள் பொதுவாக தனிநபர்களை விட நிறுவனங்களை முன்னிலைப்படுத்துகின்றன. அதாவது, ஒரு நாட்டின் அடையாளம் ஒரே ஒருவருடன் இணைக்கப்படாமல், அதன் அரசியல் அமைப்பு மற்றும் மக்களாட்சியுடன் இணைக்கப்பட வேண்டும் என்பது முக்கியமான கொள்கை. இதனால், கடவுச்சீட்டில் ஒரு குறிப்பிட்ட அரசியல் தலைவரின் முகத்தைச் சேர்ப்பது, ஜனநாயகத்தின் இந்த அடிப்படைக் கருத்துக்கு எதிரானதாக பார்க்கப்படலாம்.

உலக வரலாற்றில் அதிகார மையமாக இருந்த தலைவர்கள் தங்கள் முகத்தை நாணயங்களில், தபால் தலைகளில், பள்ளிப் புத்தகங்களில், அரச கட்டடங்களில் பதித்து தங்களை நாட்டின் உருவமாக மாற்ற முயன்றுள்ளனர். இந்தோனேசியாவில் சுகார்ட்டோ, இலங்கையில் ராஜபக்ச, வட கொரியாவில் கிம் இல் சுங்

போன்ற தலைவர்களின் அரசியல் கலாச்சாரங்களில் இது தெளிவாகக் காணப்பட்டது. ஆனாலும் மேற்குலக ஜனநாயக நாடுகள் அந்த வழியில் செல்லாமல் இருப்பதற்கான காரணம், அரசியலை ஒரு மனிதனின் புகழிலிருந்து பாதுகாக்க வேண்டிய அவசியமே என்பதாகும்.

அமெரிக்காவில் ட்ரம்ப் அரசியலில் நானே நாடு என்ற அபாயகரமான உளவியல் தொடர்ந்து கட்டமைக்க முயல்கிறார். “Make America Great Again” என்ற கோஷம் ஆரம்பத்தில் அரசியல் வாசகமாக இருந்தாலும், பின்னர் அது ட்ரம்ப் ஆதரவாளர்களின் அடையாளவே மாறியது. அரசியல் விமர்சனத்தை நாட்டுக்கு எதிரான செயல் போல காட்டும் சூழலும் உருவாக்கப்பட்டது. இதனால் ஜனநாயக அமைப்புகளுக்குப் பதிலாக தனிநபர் விசுவாசம் முக்கியமானதாக மாறியுள்ளது.

அமெரிக்க அரசியலில் இதுவரை எந்தத் தலைவரும் தம்மை நாட்டின் நிரந்தர உருவமாக நிலைநிறுத்த முயன்றதில்லை. ஜோர்ஜ் வாசிங்டன் முதல் பராக் ஒபாமா வரை பல தலைவர்கள் அதிகாரத்தை ஜனநாயக அமைப்புகளுக்குள் மட்டுமே வைத்திருந்தனர். ஆனால் ட்ரம்ப் காலத்தில் அரசியலே ஒரு தனிப்பட்ட வியாபாரமாக மாறிவிட்டது. தேர்தல் கூட்டங்கள் கூட அரசியல் நிகழ்வுகளாக இல்லாமல், ஒரு தனிநபர் ரசிகர் திருவிழாவாகவே தோன்றின.

ஆனாலும் ட்ரம்பின் ஆளுமை பற்றி குறிப்பிடும் போது அவரின் அரசியல் நடைமுறையிலும், பொதுக் காட்சியிலும் அடிக்கடி குறிப்பிடப்படும் இரண்டு முக்கிய அம்சங்கள் ஆதிக்க வெறி மற்றும் அகம்பாவம் ஆகும். இந்த குணாதிசயங்கள் அவரின் ஆதரவாளர்களுக்கும் எதிர்ப்பாளர்களுக்கும் வெவ்வேறு விதமாகத் தோன்றுகின்றன.

முதலில், ஆதிக்க வெறி என்ற விமர்சனம் எதிலிருந்து வருகிறது என்பதைப் பார்க்கலாம். ட்ரம்ப் தனது அரசியல் வாழ்க்கையில் பல முறை கடுமையான, ஒருதலைப்பட்சமான முடிவுகளை எடுத்துள்ளார். உதாரணமாக, குடியேற்றக் கொள்கைகள், ஊடகங்களை எதிர்க்கும் நிலைப்பாடு, மற்றும் சர்வதேச ஒப்பந்தங்களில் இருந்து விலகுதல் போன்றவை அவரது கட்டுப்பாட்டை வலுப்படுத்தும் முயற்சிகளாக சிலர் கருதுகின்றனர். இதனால், அவர் அதிகாரத்தை மையப்படுத்த விரும்புகிறார் என்ற குற்றச்சாட்டும் எழுகிறது.

ஆனால், இதையே அவரது ஆதரவாளர்கள் வேறு விதமாகப் பார்க்கிறார்கள். அவர்களின் பார்வையில், ட்ரம்ப் ஒரு வலுவான தலைவர் என அரசியல் முறைகளில் பழக்கமான சலிப்பை உடைத்து, நேரடியாக முடிவெடுக்கத் துணியும் நபர். அதாவது, அவர்கள் இதை ஆதிக்க வெறியாக அல்ல, திடமான தலைமைத்துவம் எனக் கருதுகின்றனர்.

அடுத்து அகம்பாவம் பற்றி பேசும்போது, ட்ரம்பின் பேச்சு முறை, தன்னை உயர்த்திப் பேசும் பழக்கம், விமர்சனங்களுக்கு எதிரான கடுமையான பதில்கள் ஆகியவை முக்கியமாகச் சுட்டிக் காட்டப்படுகின்றன. சமூக ஊடகங்களில் அவரது செயல்பாடுகள், குறிப்பாக தனது சாதனைகளை வலியுறுத்துவது, எதிரிகளை இகழ்வது போன்றவை இந்த விமர்சனத்தை வலுப்படுத்துகின்றன.

இருப்பினும், இதற்கும் எதிர்மறை பார்வை மட்டுமல்ல. சிலர் இதை தன்னம்பிக்கை எனவும், அரசியலில் வெற்றி பெற வேண்டிய ஒரு தன்மை எனவும் கருதுகின்றனர். பாரம்பரிய அரசியல்வாதிகளின் கட்டுப்படுத்தப்பட்ட மொழியை விட, அவர் நேரடியாக பேசுவதை அவர்கள் விரும்புகிறார்கள்.

ஆனாலும் ட்ரம்பின் ஆதிக்க வெறியும் அகம்பாவமும் என்பது ஒரே கோணத்தில் பார்க்க முடியாத ஒரு சிக்கலான விஷயம். அது ஒருபுறம் அதிகார மையப்படுத்தலாகவும், மறுபுறம் வலுவான தலைமைத்துவமாகவும் விளக்கப்படுகிறது. இதை எப்படி புரிந்துகொள்வது என்பது அரசியல் நோக்கு, மதிப்புகள், மற்றும் அனுபவங்களின் அடிப்படையில் மாறுபடுகிறது.

இதே நேரத்தில் ட்ரம்ப் ஆதரவாளர்கள் இந்த யோசனையை வேறு கோணத்தில் பார்க்கலாம். அவர்கள் ட்ரம்பை ஒரு வலுவான தேசியவாதத் தலைவராகக் கருதி, அவரது முகம் அமெரிக்காவின் வலிமை, தன்னம்பிக்கை, மற்றும் உலகளாவிய செல்வாக்கை பிரதிபலிக்கும் என்று வாதிடலாம். இது குறிப்பாக அவரது ஆதரவாளர்களுக்குள் ஒரு அடையாளச் சின்னமாக மாறக்கூடும்.

இதுமட்டுமின்றி, ட்ரம்ப்பின் உருவம் பொறித்த சிறப்பு தங்க நாணயங்களை வெளியிட அமெரிக்க மின்ட் (US Mint) திட்டமிட்டுள்ளது. அமெரிக்க காகிதப் பணத்தாள்களில் கையெழுத்திடும் முதல் பதவியில் இருக்கும் ஜனாதிபதிஎன்ற பெருமையை ட்ரம்ப் பெறவுள்ளார்.

அத்துடன் புகழ்பெற்ற கென்னடி கலை மையம், ‘ட்ரம்ப்-கென்னடிமையம்’ என பெயர் மாற்றம் செய்யப்படவுள்ளது. வாஷிங்டன் டிசியில் 250 அடி உயரத்தில் “ஆர்க் டி ட்ரம்ப்” (Arc de Trump) என்ற பிரம்மாண்ட வெற்றி வளைவு அமைக்கப்படவுள்ளது.

அமெரிக்கக் கடவுச்சீட்டில் ட்ரம்ப்பின் முகம் இடம்பெறுவது என்பது ஒரு சாத்தியமான நிர்வாகத் தீர்மானமாக இருந்தாலும், அது மிகப்பெரிய அரசியல் மற்றும் சமூக விளைவுகளை ஏற்படுத்தக் கூடியது. இது ஒரு நாட்டின் அடையாளம் எவ்வாறு உருவாக்கப்பட வேண்டும் என்ற அடிப்படை கேள்வியை எழுப்புகிறது. அது ஒரு தனிநபரை மையமாகக் கொண்டதா, அல்லது அதன் ஜனநாயக அமைப்பையும் பல்வகை மக்களையும் பிரதிபலிப்பதா என்பது பற்றி பல்வேறு விவாதங்கள் உள்ளன.

தற்போதுள்ள அமெரிக்க கடவுசீட்டுகளில் நிலவில் மனிதன் கால் வைத்த நிகழ்வு மற்றும் சுதந்திர தேவி சிலை போன்ற வரலாற்றுச் சின்னங்கள் இடம்பெற்றுள்ளன. இந்த நிலையில், ட்ரம்ப்பின் உருவம் பொறித்த கடவுச்சீட்டுகள் பெரும் விவாதத்தை ஏற்படுத்தியுள்ளது.