பெருமளவிலான நாடாளுமன்ற உறுப்பினர்கள் தனக்கு ஆதரவாக உள்ளதாக பிரதமர் ஸ்டார்மர் தெரிவிப்பு!

பிரித்தானியப் பிரதமர் கீர் ஸ்டார்மர் (Sir Keir Starmer), தொழிற் கட்சிக்குள் (Labour Party) தமக்கு எதிராக எழுந்துள்ள விமர்சனங்கள் மற்றும் தலைமைத்துவ சவால்கள் குறித்த செய்திகளுக்குப் பதிலளித்துள்ளார்.

பிரித்தானியப் பிரதமர் சர் கீர் ஸ்டார்மர், தமது தலைமைத்துவத்திற்கு எதிராக தொழிற் கட்சிக்குள் அதிருப்தி நிலவுவதாகக் கூறப்படுவதை நிராகரித்துள்ளார்.

கட்சியின் “பெரும்பான்மையான” நாடாளுமன்ற உறுப்பினர்கள் தமக்கு ஆதரவாக இருப்பதாகவும், அவர்கள் ஆட்சியின் பணிகளைத் தொடரவே விரும்புவதாகவும் அவர் தெரிவித்துள்ளார்.

அமெரிக்காவிற்கான பிரித்தானியத் தூதராக லார்ட் மண்டெல்சனை நியமித்த விவகாரத்தில் ஏற்பட்ட சர்ச்சையைத் தொடர்ந்து, ஸ்டார்மரின் தலைமைக்கு நெருக்கடி ஏற்பட்டுள்ளதாக ஊகங்கள் வெளியாகின.

இது குறித்து ‘சண்டே டைம்ஸ்’ (Sunday Times) இதழுக்கு அவர் அளித்த பேட்டியில் அவர் இதனை தெரிவித்துள்ளார்.

லார்ட் மண்டெல்சனுக்குப் பாதுகாப்பு அனுமதி (Security Vetting) வழங்கக் கூடாது எனப் பாதுகாப்பு அதிகாரிகள் எச்சரித்த தகவலைத் தமக்குத் தெரிவிக்கவில்லை என்பதற்காக, வெளிவிவகார அமைச்சின் மூத்த அதிகாரி (Olly Robbins) ஆலி ராபின்ஸைப் பிரதமர் கடந்த வாரம் பதவி நீக்கம் செய்திருந்தார்.

லார்ட் மண்டெல்சன் நியமனம் தோல்வியில் முடிந்ததைத் தொடர்ந்து, எதிர்க்கட்சிகள் ஸ்டார்மரை பதவி விலகுமாறு வலியுறுத்தி வருகின்றன.

இருப்பினும், கட்சிக்குள் இருக்கும் ஆதரவையும், அதிகாரிகளின் தவறுகளைக் களைவதையும் சுட்டிக்காட்டி ஸ்டார்மர் தனது நிலையைத் தற்காத்து வருகிறார்.