உகாண்டாவில் 2 பேருந்துகள் நேருக்கு நேர் மோதி விபத்து!!; 63 பேர் பலி

உகாண்டாவில் இடம்பெற்ற விபத்து ஒன்றில் 63 பேர் உயிரிழந்துள்ளதாகவும், பலர் காயமடைந்துள்ளதாகவும் சர்வதேச ஊடகங்கள் செய்தி வெளியிட்டுள்ளன.

உகாண்டாவின் மிகவும் பரபரப்பான நெடுஞ்சாலைகளில் ஒன்றில் இரண்டு பேருந்துகள் நேருக்கு நேர் மோதிக்கொண்டதில் இந்த விபத்து இடம்பெற்றுள்ளதாக அந்நாட்டு அதிகாரிகள் இன்று தெரிவித்துள்ளனர்.

தலைநகர் கம்பாலாவிற்கும் வடக்கு நகரமான குலுவிற்கும் இடையிலான நெடுஞ்சாலையில் நள்ளிரவுக்குப் பின்னர் இந்த விபத்து நடந்துள்ளதாக அவர்கள் தெரிவித்துள்ளனர்.

எதிரெதிர் திசைகளில் இருந்து வந்த இரண்டு பேருந்துகள், லாரி மற்றும் விளையாட்டு பயன்பாட்டு வாகனம் (SUV) ஆகியவற்றை முந்திச் செல்ல முயன்றதால் இந்த விபத்து ஏற்பட்டதாக ஆரம்ப விசாரணைகள் தெரிவிக்கின்றன.

“இந்தச் செயல்பாட்டில், இரண்டு பேருந்துகளும் முந்திச் செல்லும் முயற்சியின் போது நேருக்கு நேர் சந்தித்து மோதிக்கொண்டதாக,” உகாண்டா காவல் படை தெரிவித்துள்ளது.

இந்த விபத்தில் “அறுபத்து மூன்று பேர் உயிர் இழந்தனர், உயிரிழந்த அனைவரும் பேருந்தில் இருந்தவர்கள்” என உகாண்டா காவல் படை மேலும் தெரிவித்துள்ளது.