ஹீனா ரப்பானி கர்… ஞாபகம் இருக்கா?. அவரேதான்.. பாகிஸ்தானைக் கலக்கும் கெத்து அமைச்சர்!

பாகிஸ்தான் அரசியலை கடந்த 2011ம் ஆண்டு ஒரு கலக்கு கலக்கிய இளம் அமைச்சரான ஹீனா ரப்பானி கர் மீண்டும் அரசியலில் புதுப் பொலிவைப் பெற்றுள்ளார். அப்போது வெளியுறவுத்துறை அமைச்சராக அசத்தலாக செயல்பட்ட ஹீனா, இப்போது மீண்டும் அதே துறையில் இணை அமைச்சராக நியமிக்கப்பட்டுள்ளார்.

பாகிஸ்தான் பெண் அரசியல்வாதிகளில் அவ்வப்போது சிலர் சர்வதேச அளவில் புகழ் பெறுவது வழக்கம். உள்ளூர் எதிர்ப்புகள், புறக்கணிப்புகள், ஆணாதிக்க அரசியல் கூறுகள் உள்ளிட்டவற்றையும் தாண்டி இவர்கள் பேசப்படுவார்கள். என்ன ஒரு துரதிர்ஷ்டம் என்றால் இவர்களது திறமையை விட இவர்களது வெளித்தோற்றத்தைத்தான் பலரும் சிலாகித்துப் பேசுகிறார்கள் என்பதே.

ஹீனா வெளியுறவுத்துறை அமைச்சராக நியமிக்கப்பட்டபோதும் அவரது வெளித்தோற்றத்தையே பலரும் பேசினார். ஆனால் வெகு விரைவிலேயே தனது திறமையான செயல்பாடுகளாலும், புத்திசாலித்தனமான பேச்சுக்களாலும் அந்த இமேஜை உடைத்து தான் ஒரு திறமையாளர் என்பதை வலுப்படுத்தி விட்டார் ஹீனா. பாகிஸ்தான் அரசியலில் மிக மிக இளம் வயதில் வெளியுறவுத்துறை அமைச்சரான சாதனையாளர் ஹீனா. அப்போது அவருக்கு வயது 33 தான்.

பாகிஸ்தான் மக்கள் கட்சியைச் சேர்ந்தவர் ஹீனா. மறைந்த பெனாசிர் பூட்டோவின் பிரியத்தைப் பெற்றவர். பெனாசிரைப் போலவே இவரும் நல்ல ஆங்கிலப் புலமை கொண்டவர். தெளிவாக பேசக் கூடியவர். சர்வதேச அரசியலை விரல் நுனியில் வைத்திருப்பவர். 2011 முதல் 2013 வரை பாகிஸ்தான் வெளியுறவுத்துறை அமைச்சராக பதவி வகித்தார் ஹீனா. தற்போது பிரதமர் ஷபாஸ் ஷெரீப் அமைச்சரவையில் மீண்டும் ஆக்டிவான ரோலுக்குத் திரும்பியுள்ளார் ஹீனா.

ஹீனா முன்பு அமைச்சராக நியமிக்கப்பட்ட போது அவரையும், பெனாசிர் பூட்டோவின் மகன் பிலாவல் பூட்டோவையும் இணைத்து வதந்திகள் கிளம்பின. இருவரும் காதலிக்கிறார்கள், நெருங்கிப் பழகுகிறார்கள் என்றும் வதந்திகள் கிளம்பி பாகிஸ்தானை பரபரப்பில் ஆழ்த்தின . இத்தனைக்கும் ஹீனா ஏற்கனவே திருமணமானவர். அவரது கணவர் பெயர் பிரோஸ் குல்ஸார். இவர் மிகப் பெரிய கோடீஸ்வரர் ஆவார்.

பிலாவலை மணப்பதற்காக தனது கணவரை விவாகரத்து செய்யவும் ஹீனா தயாராக இருந்தார் என்றும், பிலாவலும், ஹீனாவைத் திருமணம் செய்து கொள்ள பிடிவாதம் காட்டினார் என்றும், ஆனால் அவரது தந்தை ஆசிப் அலி சர்தாரி அதை விரும்பவில்லை என்றும் அப்போது செய்திகள் கச்சை கட்டிப் பறந்தன. இந்த நிலையில்தான் தற்போது ஹீனா மீண்டும் அமைச்சராகியுள்ளார்.

அதேசமயம், இந்த அமைச்சரவையில் பிலாவல் பூட்டோவுக்கு இடம் கொடுக்கப்படவில்லை. அவர்தான் தற்போது பாகிஸ்தான் மக்கள் கட்சியின் தலைவராக இருக்கிறார். அவர் வெளியுறவுத்துறை அமைச்சராக நியமிக்கப்படலாம் என்றும் செய்திகள் அடிபடுகின்றன. அப்படி நியமிக்கப்பட்டால் அவரும் ஹீனாவும் இணைந்து செயல்படும் சூழல் உருவாகும் என்பது குறிப்பிடத்தக்கது.