அனோஜனுக்கு அடுத்து என்ன? 17ஆம் திகதியே தெரிய வரும்; அன்றுதான் மீண்டும் வழக்கு விசாரணை

சவுதி அரேபியாவில் கைது செய்யப்பட்டு மரண தண்டனை அச்சுறுத்தலை எதிர்நோக்கியிருந்த சிவராசா அனோஜனுக்கு விதிக்கப்பட்ட மரண தண்டனை தளர்த்தப்பட்டுள்ளதாகப் பிரதி அமைச்சர் அருண் ஹேமச்சந்திர தொலைபேசி ஊடாகத் தமக்கு அறிவித்ததாக அனோஜனின் சகோதரன் தெரிவித்துள்ளார்.

எனினும், எதிர்வரும் 17ஆம் திகதி(சனிக்கிழமை) இடம்பெறவுள்ள வழக்கு விசாரணையின் பின்னரே எமக்கு முழுமையான நிம்மதி கிடைக்குமா இல்லையா என்பதைத் திட்டவட்டமாகக் கூற முடியும் என்றும் அவர் சுட்டிக்காட்டியுள்ளார்.

சவுதி அரேபிய நீதிமன்றினால் அனோஜனுக்கு விதிக்கப்பட்ட மரண தண்டனை தளர்த்தப்பட்டதாக வெளியாகும் செய்திகள் குறித்துக் கூறும் போதே அவரது சகோதரன் இவ்வாறு தெரிவித்தார்.

இதன்போது ஊடகங்களுக்குக் கருத்துத் தெரிவித்த அனோஜனின் சகோதரன் மேலும் தெரிவிக்கையில்,

எனது அண்ணனுக்கு விதிக்கப்பட்ட மரண தண்டனை தளர்த்தப்பட்டுள்ள விடயம் குறித்து பிரதி அமைச்சர் அருண் ஹேமச்சந்திர தொலைபேசி மூலம் எம்மைத் தொடர்பு கொண்டு தெரிவித்தார்.இது எமக்கு ஓரளவு ஆறுதலைத் தந்த போதிலும், எதிர்வரும் 17ஆம் திகதி அண்ணனின் வழக்கு மீண்டும் விசாரணைக்கு வரவுள்ளது. அந்த வழக்கு விசாரணையின் முடிவுகள் வெளிவந்த பின்னரே எமது குடும்பத்திற்கு பூரண நிம்மதி கிடைக்குமா என்பது தெரியவரும் எனத் தெரிவித்தார்.

அனோஜனின் விடுதலைக்காகவும் உயிரைக் காப்பதற்காகவும் இலங்கை அரசாங்கம், வெளிநாட்டு அலுவல்கள் அமைச்சு, இராஜதந்திரிகள், மதத் தலைவர்கள் மற்றும் அரசியல்வாதிகள் தொடர்ந்து முன்னெடுத்து வரும் முயற்சிகளுக்குக் குடும்பத்தினர் தமது நன்றிகளையும் எதிர்பார்ப்புகளையும் வெளியிட்டனர்.