வெடிக்கும் சர்ச்சை..! உயிர்த்த ஞாயிறு தாக்குதலை தடுக்கத் தவறியவர்களுக்கு எதிராக விசாரணை கோரிக்கை

2019 ஆம் ஆண்டு இடம்பெற்ற உயிர்த்த ஞாயிறுத் தாக்குதல் தொடர்பில் சதித்திட்டம் தீட்டிய மற்றும் அதற்கு உதவி, ஆதரவு வழங்கியவர்களுக்கு நீதிமன்றம் வழங்கியுள்ள தீர்ப்பில் திருப்தியடைவதாக கத்தோலிக்க சபை தெரிவித்துள்ளது.

கத்தோலிக்க திருச்சபையின் ஊடகப் பேச்சாளர் அருட்தந்தை ஜூட் கிரிஷாந்த பெர்னாண்டோ இதனைத் தெரிவித்துள்ளார்.

2019 ஆம் ஆண்டு இடம்பெற்ற உயிர்த்த ஞாயிறுத் தாக்குதல் வழக்கின் தீர்ப்பு குறித்து ஊடகங்களுக்கு கருத்து தெரிவிக்கும் போதே அவர் இதனைக் குறிப்பிட்டுள்ளார்.

இறுதித் தீர்ப்பு
உயிர்த்த ஞாயிறு பயங்கரவாதத் தாக்குதல் சம்பவம் தொடர்பில் 15 பிரதிவாதிகள் குற்றவாளிகளாகக் கொழும்பு நிரந்தர மூவர் அடங்கிய மேல்நீதிமன்றம் இன்று (22) தீர்ப்பளித்துள்ளது.

269 பேர் உயிரிழந்ததுடன் 500க்கும் மேற்பட்டோர் காயமடையக் காரணமான உயிர்த்த ஞாயிறு பயங்கரவாதத் தாக்குதல் தொடர்பான வழக்கின் இறுதித் தீர்ப்பை அறிவித்தே இந்தத் தீர்ப்பு வழங்கப்பட்டது. எனினும், இவ்வழக்கில் குற்றம் சாட்டப்பட்டிருந்த மேலும் 9 பிரதிவாதிகளை நீதிமன்றம் விடுவித்து உத்தரவிட்டுள்ளது.

இந்தத் தீர்ப்புடன் உயிர்த்த ஞாயிறுத் தாக்குதல் தொடர்பான அனைத்து நடவடிக்கைகளும் நிறைவடைந்துவிட்டதாக கருத முடியாது எனவும் அவர் சுட்டிக்காட்டியுள்ளார்.

தாக்குதலுக்கு சதித்திட்டம் தீட்டியவர்கள் மற்றும் அதற்கு உதவி, ஆதரவு வழங்கியவர்களுக்கு அப்பால், இந்தத் தாக்குதலை பயன்படுத்தி அதிகாரத்தைப் பெற முயன்றதாக கூறப்படும் தரப்பினரையும் விசாரணைக்கு உட்படுத்த வேண்டும் என்றும் அவர் கோரிக்கை விடுத்துள்ளார்.

வெடிக்கும் சர்ச்சை..! உயிர்த்த ஞாயிறு தாக்குதலை தடுக்கத் தவறியவர்களுக்கு எதிராக விசாரணை கோரிக்கை | Fifteen Guilty In 2019 Sri Lanka Easter Bombings

அத்துடன், தாக்குதல் தொடர்பான விசாரணைகளில் அதிகாரிகளுக்கு போதுமான தகவல்கள் கிடைத்திருந்த போதிலும், தாக்குதலைத் தடுக்க நடவடிக்கை எடுக்கப்படவில்லை என்பதுடன், இந்த விடயம் தொடர்பிலும் உரிய விசாரணைகள் நடத்தப்பட வேண்டும் என்றும் அவர் வலியுறுத்தியுள்ளார்.