வட அயர்லாந்தில் 24 மணி நேர வேலைநிறுத்தப் போராட்டத்தில் பயிற்சி மருத்துவர்கள்!

வட அயர்லாந்தில் நிலவி வரும் சம்பள முரண்பாடுகளுக்குத் தீர்வு கோரி, பயிற்சி மருத்துவர்கள் 24 மணி நேர உத்தியோகபூர்வ பணிப்புறக்கணிப்புப் போராட்டத்தில் ஈடுபட்டுள்ளனர்.

நேற்று காலை 07:00 மணிக்கு ஆரம்பமான இந்த வேலைநிறுத்தப் போராட்டம், இன்று காலை 06:59 மணி வரை இடம்பெற்றது.

கடந்த வாரம் மூத்த ஆலோசகர் மருத்துவர்கள் மற்றும் விசேட நிபுணத்துவ மருத்துவர்கள் மேற்கொண்ட வேலைநிறுத்தத்தைத் தொடர்ந்து, தற்பொழுது பயிற்சி மருத்துவர்களும் இப்போராட்டத்தில் இணைந்துள்ளனர்.

பயிற்சி மருத்துவர்களின் இந்த முழுமையான வெளிநடப்பு காரணமாகப் பொதுமக்களுக்கு ஏற்படும் பாதிப்புகளைக் குறைக்கும் நோக்கில், மூத்த ஆலோசகர்கள் மற்றும் விசேட நிபுணத்துவ மருத்துவர்கள் தற்பொழுது அவசர மற்றும் தீவிர சிகிச்சைப் பிரிவுகளுக்கு முன்னுரிமை வழங்கிப் பணியாற்றி வருகின்றனர்.

முன்னணி மருத்துவர்களைத் தொடர்ந்து தற்பொழுது இளநிலை மற்றும் பயிற்சி மருத்துவர்களும் வீதியில் இறங்கிப் போராடி வருவதனால், வட அயர்லாந்தின் பொதுச் சுகாதாரக் கட்டமைப்பு மற்றும் மருத்துவமனைச் சேவைகள் பெரும் ஸ்தம்பித நிலையை எதிர்நோக்கியுள்ளன.