அமெரிக்கப் பல்கலைக்கழகத்தில் ஒன்டாரியோ மாகாண முதல்வர் கௌரவ டாக்டர் பட்டம் பெற்றார்

டக் ஃபோர்டு கனடாவின் ஒன்டாரியோ மாகாண முதல்வர் டக் ஃபோர்டிற்கு அமெரிக்காவின் மிச்சிகன் மாநிலத்தில் உள்ள சாகினாவ் வேலி மாநிலப் பல்கலைக்கழகத்தில் (Saginaw Valley State University) சனிக்கிழமை அன்று நடைபெற்ற விழாவில் கௌரவ டாக்டர் பட்டம் வழங்கப்பட்டுள்ளது.

‘டாக்டர் ஆஃப் ஹியூமன் லெட்டர்ஸ்’ (Doctor of Humane Letters) எனும் இந்தப் பட்டத்தைப் பெற்றுக்கொண்ட அவர், அங்கு கூடியிருந்த பட்டதாரி மாணவர்கள் மத்தியில் உரையாற்றினார்.

ஒரு கனேடிய அரசியல்வாதி ஏன் அமெரிக்கப் பல்கலைக்கழகத்தில் உரையாற்றுகிறார் என்ற கேள்வி எழலாம் எனக் குறிப்பிட்ட ஃபோர்டு, தனது குடும்பத் தொழிலை விரிவுபடுத்துவதற்காகத் தான் பல ஆண்டுகள் அமெரிக்காவில் வசித்து வந்ததையும், கனடா மற்றும் அமெரிக்கா இடையே நீடிக்கும் இருநூறு ஆண்டுகால ஒத்துழைப்பையும் பெருமிதத்துடன் நினைவு கூர்ந்தார்.

தனது உரையில் வர்த்தகம் மற்றும் அரசியல் பயணம் குறித்துப் பேசிய டக் ஃபோர்டு, கனடா மற்றும் அமெரிக்கா இடையே தற்போது நிலவி வரும் வர்த்தகப் பூசல்கள் குறித்து தனது கவலையை வெளிப்படுத்தினார்.

குறிப்பாக, ஆட்டோமொபைல் உற்பத்தித் துறையில் ஒன்டாரியோ மற்றும் மிச்சிகன் மாகாணங்களுக்கு இடையே உள்ள நெருங்கிய உறவைச் சுட்டிக்காட்டிய அவர், “சுங்க வரி மற்றும் வர்த்தகப் போர்களால்” இந்த நட்பு தற்போது சோதிக்கப்படுவதாகக் குறிப்பிட்டார்.

முன்னாள் அமெரிக்க அதிபர் ரானல்ட் ரீகனின் வார்த்தைகளை மேற்கோள் காட்டிய அவர், பாதுகாப்புவாதக் கொள்கைகளால் (Protectionist policies) சந்தைகள் சரிவதையும், மில்லியன் கணக்கான மக்கள் வேலை இழப்பதையும் தவிர்க்க இரு நாடுகளும் மீண்டும் இணைந்து செயல்பட வேண்டியதன் அவசியத்தை வலியுறுத்தினார்.

அமெரிக்காவின் வர்த்தகக் கட்டுப்பாடுகளுக்கு எதிராகக் குரல் கொடுத்து வரும் டக் ஃபோர்டு, ஊடகங்களால் “கேப்டன் கனடா” என்று அழைக்கப்படுகிறார்.

கடந்த காலங்களில் அமெரிக்கத் தயாரிப்புகளுக்கு எதிராகப் பதில் நடவடிக்கைகளை எடுத்தவர் என்ற போதிலும், இரு நாடுகளின் பொருளாதார வளர்ச்சிக்காகக் குழுப்பணி மற்றும் விசுவாசம் அவசியம் என்பதைத் தனது உரையின் முடிவில் மாணவர்களுக்கு அறிவுறுத்தினார்.

பல்கலைக்கழகத் தலைவர் ஜார்ஜ் கிராண்ட் ஜூனியர், டக் ஃபோர்டை ஒரு சிறந்த நண்பர் என்று புகழ்ந்ததுடன், எல்லையின் இருபுறமும் உள்ள உறவுகளை வலுப்படுத்த அவர் எடுக்கும் முயற்சிகளுக்கு நன்றியும் தெரிவித்தார்.