பல வர்த்தக ஒப்பந்தங்களை இறுதி செய்யும் நிலையில் அமெரிக்கா!
எதிர்வரும் நாட்களில் அமெரிக்கா பல வர்த்தக ஒப்பந்தங்களை இறுதி செய்யும் நிலையில் உள்ளது.
மேலும், ஜூலை 9 ஆம் திகதிக்குள் அதிக கட்டண விகிதங்களை ஏனைய நாடுகளுக்கு அறிவிக்கும் என்று ஜனாதிபதி டொனால்ட் ட்ரம்ப் ஞாயிற்றுக்கிழமை (06) தெரிவித்தார்.
அமெரிக்க ஜனாதிபதியின் கருத்துப்படி, அதிக விகிதங்கள் ஆகஸ்ட் 1 முதல் அமலுக்கு வரும்.
பதவியேற்றதிலிருந்து, ட்ரம்ப் ஒரு உலகளாவிய வர்த்தகப் போரை ஆரம்பித்துள்ளார்.
இது நிதிச் சந்தைகளை உலுக்கியுள்ளதுடன், அமெரிக்கா மற்றும் பிற நாடுகளுடனான ஒப்பந்தங்கள் போன்ற முயற்சிகள் மூலம் கொள்கை வகுப்பாளர்களை தங்கள் பொருளாதாரங்களைப் பாதுகாக்க போராட வைத்துள்ளது.
ஏப்ரல் மாதத்தில் ட்ரம்ப் பெரும்பாலான நாடுகளுக்கு 10% அடிப்படை வரி விகிதத்தையும் 50% வரை கூடுதல் வரிகளையும் அறிவித்தார்.
ஆனால், பின்னர் 10% தவிர மற்ற அனைத்திற்கும் புதன்கிழமை (ஜூலை 07) வரை மூன்று வார கால அவகாசம் அளித்தார்.
இந்த நிலையில், நியூ ஜெர்சியில் வார இறுதி கோல்ஃப் விளையாடிவிட்டு வொஷிங்டனுக்குத் திரும்புவதற்கு சற்று முன்பு செய்தியாளர்களிடம் பேசும் போது ட்ரம்ப் மேற்கண்ட தகவலை வெளியிட்டார்.
இது தொடர்பில் தெளிவுபடுத்திய ட்ரம்ப் நிர்வாக வர்த்தக செயலாளர் ஹோவர்ட் லுட்னிக் செய்தியாளர்களிடம் கூறுகையில், அதிக கட்டணங்கள் ஆகஸ்ட் 1 முதல் அமலுக்கு வரும், ஆனால் ட்ரம்ப், கட்டண விகிதங்களையும் ஒப்பந்தங்களையும் நிர்ணயித்து வருவதாக கூறினார்.
பின்னர் ட்ரம்ப் தனது சமூக வலைத்தளத்தில் ஒரு பதிவில், திங்கட்கிழமை (06) மதியம் 12:00 மணி ET (1600 GMT) முதல் அமெரிக்கா கட்டணக் கடிதங்களை வழங்கத் தொடங்கும் என்று கூறினார்.
சமூக வலைத்தளத்தில் ஒரு தனி பதிவில் அவர், புதிய கட்டணக் கொள்கையை வெளியிட்டார், பிரிக்ஸ் வளரும் நாடுகளின் “அமெரிக்க எதிர்ப்புக் கொள்கைகளுடன் தங்களை இணைத்துக் கொள்ளும்” நாடுகளுக்கு மேலதிகமாக 10% வரி விதிக்கப்பட வேண்டும், எந்த விதிவிலக்குகளும் வழங்கப்படக்கூடாது என்றும் சுட்டிக்காட்டினார்.
2009 ஆம் ஆண்டு நடந்த முதல் பிரிக்ஸ் உச்சி மாநாட்டில் பிரேசில், சீனா, இந்தியா மற்றும் ரஷ்யா ஆகிய நாடுகளின் தலைவர்கள் கலந்து கொண்டனர்.
பின்னர் தென்னாப்பிரிக்கா இணைந்தது, கடந்த ஆண்டு எகிப்து, எத்தியோப்பியா, இந்தோனேசியா, ஈரான், சவுதி அரேபியா மற்றும் ஐக்கிய அரபு எமிரேட்ஸ் ஆகியவை இதில் சேர்க்கப்பட்டன.
ட்ரம்ப், சவுதி அரேபியா மற்றும் ஐக்கிய அரபு எமிரேட்ஸ் போன்ற சில நாடுகளின் தலைவர்களுடன் நெருங்கிய உறவுகளைக் கொண்டுள்ளார்.
மேலும், பல வாரங்களாக இந்தியாவுடன் வர்த்தக ஒப்பந்தம் செய்வதற்கான வாய்ப்பைப் பற்றிப் பேசி வருகிறார்.
ஞாயிற்றுக்கிழமை, பிரிக்ஸ் தலைவர்கள் காசா மற்றும் ஈரான் மீதான தாக்குதல்களைக் கண்டித்து, உலகளாவிய நிறுவனங்களில் சீர்திருத்தங்களுக்கு அழைப்பு விடுத்தனர் மற்றும் கட்டண உயர்வு உலகளாவிய வர்த்தகத்தை அச்சுறுத்துவதாக எச்சரித்தனர்.
எவ்வாறெனினும், ட்ரம்பின் வரி அச்சுறுத்தல் இந்தியா, இந்தோனேசியா மற்றும் பிற பிரிக்ஸ் நாடுகளுடனான வர்த்தகப் பேச்சுவார்த்தைகளைத் தடம் புரளச் செய்யுமா என்பது உடனடியாகத் தெளிவாகத் தெரியவில்லை.
