கவிதைகள்
கந்தனும் வந்தான்!… கவிதை… ஜெயராமசர்மா
கந்தனும் வந்தான் !
( 1 ம் நாள் )
சிவனின் சிந்தையில் தோன்றிய சிந்தனை
கனற் பொறியாயாகி கந்தனாய் வந்தது
சினத்தை முதலாய் கொண்ட அசுரர்
பலத்தை கந்தன் அடக்கவே வந்தான்
அசுரர் அளவிலா வரத்தைப் பெற்றனர்
கிடைத்த வரத்தை கீழாய் ஆக்கினர்
கொடிய உள்ளம் நெடிதாய் எழுந்தது
கொடுமை எங்கணும் விரிந்து பரந்தது
பக்தியை அசுரர் பழித்துமே நின்றனர்
பரமனை எதிர்த்திட துடித்துமே நின்றனர்
சக்தியின் உருவாய் கந்தனும் வந்தனன்
மொத்தமாய் அசுரர் முடங்கியே போயினார்
ஆணவம் அழிந்தது அசுரர் அடங்கினர்
அரனின் சக்தியாய் கந்தனே எழுந்தான்
பூதலம் எங்கணும் பொழுதுமே விடிந்தது
சோதனை வேதனை துடைத்தனன் கந்தனும்
பக்தியை மிதித்தார் பக்தியை அழித்தார்
பழியினைத் தாங்கியே படுகுழி வீழ்ந்தார்
பக்தியே கனலாய் எழுத்துமே வந்தது
பரமனின் குமரனாய் கந்தனும் வந்தான்
மகாதேவ ஐயர் ஜெயராமசர்மா
மேனாள் தமிழ்மொழிக் கல்வி இயக்குநர்
மெல்பேண், அவுஸ்திரேலியா
