போர் முடிவுக்கு வரும் எந்த அறிகுறியும் இல்லை;  கப்பல் போக்குவரத்து, எரிசக்தி உள்கட்டமைப்பு மீதான ஈரான் தாக்குதல்களால் 100 டொலரை தாண்டியது எண்ணெய் விலை

கப்பல் போக்குவரத்து மற்றும் எரிசக்தி உள்கட்டமைப்பு மீதான ஈரானின் தாக்குதல் உக்கிரமடைந்திருக்கும் நிலையில்நேற்று வியாழக்கிழமை எண்ணெய் விலை பரலுக்கு 100 டொலரை தாண்டியது, அமெரிக்காவும் மற்றும் இஸ்ரேலும் பதில்தாக்குதல்களை தொடரும் நிலையில் , போர் முடிவுக்கு வருவதற்கான எந்த அறிகுறியும் இல்லை.

டுபாய் கடற்கரையில் கொள்கலன் கப்பலொன்றை ஈரான் தாக்கியது, அதேசமயம் பஹ்ரைன் சர்வதேச விமான நிலையம் அருகே தீ விபத்து ஏற்பட்டது ,மேலும் பெரிய சவுதி எண்ணெய் வயலொன்று ட்ரோன் மூலம் இலக்கு வைக்கப்பட்டது .அத்துடன் பாரசீக வளைகுடாவில் உள்ள பாஸ்ரா துறைமுகத்தைத் தாக்கிய பின்னர் ஈராக் அதன் அனைத்து எண்ணெய் முனையங்களிலும் நடவடிக்கைகளை நிறுத்தவேண்டிய கட்டாயத்திற்கு .அதனை தள்ளியுள்ளது.

குவைத் மற்றும் ஐக்கிய அரபு எமிரேட்ஸிலும் புதிய தாக்குதல்கள் பதிவாகியுள்ளன.

ஜெருசலேமில் அதிகாலையில் சைரன்கள் ஒலித்தன, ஆயினும் ஈரானிய ஏவுகணைகளை இஸ்ரேல் இடைமறித்தது, மேலும் அன்றைய தினம் நகரத்தின் மீது மற்றொரு தாக்குதலில் பலத்த சத்தம் கேட்டது.

மேலும் ஈரானுடன் தொடர்புடைய ஹிஸ்புல்லா போராளிகளை குறிவைப்பதாக இஸ்ரேல் கூறியுள்ளதுடன் தெஹ்ரான் மற்றும் லெபனானில் இஸ்ரேல் “பரந்த அளவிலான தாக்குதல்களை” நடத்தியிருக்கிறது , அதிகாலையில் இடம்பெற்ற இரண்டு தாக்குதல்களில் 11 பேர் கொல்லப்பட்டனர்.

கடந்த பெ ப்ரவரி 28 அன்று ஈரான் மீது அமெரிக்காவும் இஸ்ரேலும் தாக்குதல் நடத்தியதிலிருந்து, தெஹ்ரான் அவர்களின் தாக்குதல்களை நிறுத்த அழுத்தம் கொடுக்க போதுமான உலகளாவிய பொருளாதார வலியை ஏற்படுத்துவதில் கவனம் செலுத்தியுள்ளது.

அமெரிக்க ஜனாதிபதி டொனால்ட் டிரம்ப், அது உடனடியாக நடக்காது என்று கூறியிருந்தார் , ஈரான் “கிட்டத்தட்ட அழிக்கப்பட்டுவிட்டது” என்று அவர் கூறியதுடன் “வேலையை முடிப்பேன்” என்று உறுதியளித்திருந்தார்”நாங்கள் விரைவாக வெளியேற விரும்பவில்லை, நாங்கள் வேலையை முடிக்க வேண்டும்,” என்று அவர் கென்டக்கியில் புதன்கிழமை நடந்த ஒரு நிகழ்வில் கூறியுள்ளார்.

மோதலின் தொடக்க நாளில் கொல்லப்பட்ட ஈரானின் அதி உயர் தலைவர் அயதுல்லா அலி கமேனிக்குப் பிறகு தேர்ந்தெடுக்கப்பட்டதிலிருந்து ஈரானிய அதி உயர் தலைவர் அயதுல்லா மொஜ்தபா கமேனி இன்னும் எந்த அறிக்கையையும் வெளியிடவில்லை அல்லது காணப்படவில்லை. ஆனால் போர் முடிவுக்கு வர, உலகம் ஈரானின் “சட்டபூர்வமான உரிமைகளை” அங்கீகரிக்க வேண்டும், இழப்பீடு வழங்க வேண்டும் மற்றும் எதிர்கால தாக்குதல்களுக்கு எதிராக உத்தரவாதங்களை வழங்க வேண்டும் என்று ஈரானிய ஜனாதிபதி மசூத் பெஷேஷ்கியன் வியாழக்கிழமை இணையவழியில் தெரிவித்திருக்கிறார்

இந்தப் பிராந்தியத்தைச் சுற்றியுள்ள எரிசக்தி உள்கட்டமைப்பைத் தாக்குவதோடு மட்டுமல்லாமல், பாரசீக வளைகுடாவிலிருந்து இந்துசமுத்திரத்தை நோக்கிச் செல்லும் நீர்வழியான ஹார்முஸ் நீரிணையில் ஈரான் ஒரு பிடியைக் கொண்டுள்ளது, இதன் மூலம் உலகின் ஐந்தில் ஒரு பங்கு எண்ணெய் கொண்டு செல்லப்படுகிறது.
இந்த நீரிணையில் போக்குவரத்து நிறுத்தப்பட்டதால், சர்வதேச தரநிலையான பிரெண்ட் மசகு எண்ணெயின் விலை, ஒரு பரலுக்கு 9 சதவீதம் உயர்ந்து 100 டொலருக்கும் அதிகமாக இருந்தது, இது போர் தொடங்கியபோது அதன் விலையை விட சுமார் 38 சதவீதம் அதிகம்.

ஐ.நா. பாதுகாப்புசபை புதன்கிழமை வளைகுடா அண்டை நாடுகள் மீதான ஈரானின் “மிக மோசமான தாக்குதல்களை” நிறுத்தக் கோரும் தீர்மானத்தை அங்கீகரிக்க வாக்களித்தது, ஆனால் தெஹ்ரான் அதன் உத்தியை மாற்றுவதற்கான அறிகுறிகளைக் காட்டவில்லை.
வியாழக்கிழமை தொடங்கியபோது, பாரசீக வளைகுடாவில் ஒரு கொள்கலன் கப்பல் டுபாய் கடற்கரையில் தாக்கப்பட்டது, இதனால் ஒரு சிறிய தீ விபத்து ஏற்பட்டது என்று பிரிட்டிஷ் இராணுவத்தின் ஐக்கிய இராச்சிய கடல்சார் வர்த்தக செயல்பாட்டு மையம் தெரிவித்துள்ளது. கப்பலின் பணியாளர்கள் பாதுகாப்பாக இருப்பதாக அது கூறியது.

பஹ்ரைனில் நாட்டின் சர்வதேச விமான நிலையத்தின் தாயகமான முஹாரக் தீவில் பாரிய தீயைத் தூண்டியது. காலையில் மீண்டும் சைரன்கள் ஒலித்தன,ஈரானிய ட்ரோன் ஒரு குடியிருப்பு கட்டிடத்தில் மோதியதில் இரண்டு பேர் காயமடைந்ததாக குவைத்தின் பாதுகாப்பு அமைச்சு கூறியது . தாக்குதல்களிலிருந்து டுபாயைப் பாதுகாக்க ஐக்கிய அரபு எமிரேட்ஸ் இரண்டு முறை வான் பாதுகாப்புகளை செயல்படுத்தியதாகவும், டுபாய் க்ரீக் துறைமுகத்தில் உள்ள ஒரு கோபுரத்தில் ஒரு ட்ரோன் தாக்கிய பின்னர் தீயணைப்பு வீரர்கள் தீயை அணைத்ததாகவும் கூறியது.

தலைநகர் ரியாத்தின் இராஜதந்திர பகுதியை குறிவைத்து இயக்கப்பட்ட ஒரு ட்ரோனை சுட்டு வீழ்த்தியதாக சவுதி அரேபியா தெரிவித்துள்ளது. மேலும், அதன் ஷைபா எண்ணெய் வயலை குறிவைக்க முயன்ற குறைந்தது ஒரு ட்ரோன் உட்பட, கிழக்கில் ட்ரோன்களை சுட்டு வீழ்த்தியதாகவும் சவுதி அரேபியா தெரிவித்துள்ளது.

ஈராக்கின் பாஸ்ரா துறைமுகத்தில் புதன்கிழமை நடத்தப்பட்ட தாக்குதலில் குறைந்தது ஒருவர் கொல்லப்பட்டதைத் தொடர்ந்து, நாட்டின் அனைத்து எண்ணெய் முனையங்களிலும் செயல்பாடுகள் நிறுத்தப்பட்டதாக அதிகாரிகள் வியாழக்கிழமை தெரிவித்தனர்.
பாரசீக வளைகுடா துறைமுகத்தின் கப்பல் பரிமாற்றப் பகுதியில் ஒரு கப்பலை குறிவைத்து இந்த தாக்குதல் நடத்தப்பட்டதாக ஈராக் துறைமுகங்களுக்கான பொது நிறுவனத்தின் பணிப்பாளர் நாயகம் ஃபர்ஹான் அல்-ஃபர்டோசி தெரிவித்தார்.

ஈரான் பிராந்தியத்தில் உள்ள நிதி நிறுவனங்களை இலக்கு வைத்து அச்சுறுத்தியதால், ஐக்கிய அரபு எமிரேட்ஸில், சிட்டி பா ங்க் அதன் அனைத்து கிளைகளையும் மூடுவதாகக் கூறியுள்ளது , ஏனைய நிதி நிறுவனங்கள் தங்கள் ஊழியர்களை வீட்டிலிருந்து வேலை செய்யுமாறு வலியுறுத்தியுள்ளன.

ஜெருசலேம் மீதான தாக்குதல்களுக்கு மேலதிகமாக, ஈரான் மற்றும் ஹிஸ்புல்லாவிலிருந்து ஏவுகணைகள் ஏவப்பட்டதால் இஸ்ரேலியர்கள் டெல் அவிவ் மற்றும் லெபனானின் வடக்கு எல்லை உட்பட பல பகுதிகளில் உள்ள தங்குமிடங்களுக்கு அனுப்பப்பட்டனர்.
பெய்ரூட்டின் ஒரு முக்கிய கடலோர சுற்றுலாப் பகுதியான ராம்லெட் அல்-பெய்டாவில் வியாழக்கிழமை இஸ்ரேலிய தாக்குதலில் இடம்பெயர்ந்த மக்களில் எட்டு பேர் கொல்லப்பட்டனர் மற்றும் 31 பேர் காயமடைந்தனர் என்று லெபனான் சுகாதார அமைச்சு தெரிவித்துள்ளது.இஸ்ரேலிய இராணுவ பத்திரிகை அலுவலகம், அந்த இடத்தில் ஒரு தாக்குதல் குறித்து “தெரியாது” என்று அசோசியேட்டட் பிரஸ்ஸிடம் தெரிவித்தது.

பெய்ரூட்டில் இருந்து சுமார் 10 கி.மீ தெற்கே உள்ள அரமவுன் நகரில், மற்றொரு ஆரம்பகால இஸ்ரேலிய தாக்குதலில் மேலும் மூன்று பேர் கொல்லப்பட்டனர் மற்றும் ஒரு குழந்தை காயமடைந்தது.
தெஹ்ரானில், புதன்கிழமை இரவு பாதுகாப்புப் படை சோதனைச் சாவடிகள் முதல் முறையாக தாக்குதலுக்கு உள்ளானதாக ஃபார்ஸ் செய்தி நிறுவனம் தெரிவித்துள்ளது. ட்ரோன் தாக்குதல்களில் குறைந்தது 10 பேர் கொல்லப்பட்டனர்.தாக்குதல்களுக்குப் பின்னால் அவர்கள் இருந்தார் என்பது குறித்த கேள்விகளுக்கு இஸ்ரேலும் அமெரிக்க இராணுவத்தின் மத்திய கட்டளையும் உடனடியாக பதிலளிக்கவில்லை.

இறப்பு எண்ணிக்கை உயர்ந்துள்ளது

சமீபத்திய சண்டை தொடங்கியதிலிருந்து லெபனானில் குறைந்தது 634 பேர் கொல்லப்பட்டுள்ளதாக லெபனான் சுகாதார அமைச்சு புதன்கிழமை தெரிவித்துள்ளது. லெபனானில் குறைந்தது 7,59,000 பேர் உள்நாட்டில் இடம்பெயர்ந்துள்ளதாக ஐ.நா. அகதிகள் நிறுவனம் தெரிவித்துள்ளது.ஈரானிய அதிகாரிகள் அங்கு 1,300 க்கும் மேற்பட்டோர் கொல்லப்பட்டதாகவும், இஸ்ரேல் 12 பேர் இறந்ததாகவும் தெரிவித்துள்ளது. அமெரிக்கா ஏழு வீரர்களை இழந்துள்ளது.

ஏ பி . செய்திசேவை