அமெரிக்கா – சீனா இடையே தீவிரமாகும் பனிப்போர்!
சீன ராணுவ அதிகாரிகளை உளவாளிகளாக தேர்வு செய்யும் நோக்கில் அமெரிக்காவின் உளவு அமைப்பான சிஐஏ வெளியிட்ட வீடியோ இருநாடுகளுக்கு இடையிலான பனிப்போரை தீவிரப்படுத்தியுள்ளது.
சீனாவில் கடந்த 10 நாட்களுக்கு முன்பு அந்நாட்டின் உயர்மட்ட ராணுவ தளபதி ஜாங் யூக்ஸியா மற்றும் மூத்த ராணுவ அதிகாரி லியூ ஜென்லி பதவி நீக்கம் செய்யப்பட்டனர்.
இதற்கான காரணத்தை சீன அரசு இதுவரை அதிகாரப்பூர்வமாக தெரிவிக்காத நிலையில், இந்த சூழலை அமெரிக்க உளவு அமைப்பான சிஐஏ தனக்கு சாதகமாக்கிக் கொள்ள முயற்சித்துள்ளது.
அதாவது, சீன ராணுவத்திற்குள் இருக்கும் அதிகாரிகளை உளவாளிகளாக தேர்வு செய்யும் நோக்கில் சிஐஏ வீடியோ ஒன்றை வெளியிட்டுள்ளது. அதில், ஒரு சீன ராணுவ அதிகாரிக்கு தனது அரசாங்கத்தின் மீது இருக்கும் அச்சத்தையும், நம்பிக்கையின்மையையும் வெளிப்படுத்தும் வகையில் வீடியோ சித்தரிக்கப்பட்டுள்ளது.
மேலும் தலைமைப் பண்பு கொண்டவர்கள், சந்தேகத்திற்கு உள்ளாக்கப்பட்டு, இரக்கமின்றி பதவியில் இருந்து நீக்கப்படுவார்கள் என்று சீன அதிகாரிகளை அந்நாட்டு அரசு எச்சரிப்பது போன்ற வசனங்கள் அதில் இடம் பெற்றுள்ளன.
