உக்ரைனை உலுக்கிடும் ஊழல்: ஜெலென்ஸ்கியின் தளபதி சிக்கினார்!…  ஐங்கரன் விக்கினேஸ்வரா

உக்ரைனின் அதிபராக 2019 ஆம் ஆண்டு ஜெலென்ஸ்கி தேர்ந்தெடுக்கப்பட்டதிலிருந்து அவர் எதிர்கொண்ட மிகக் கடுமையான ஊழல்களில் ஒன்றாக இந்த ஊழல் உருவெடுத்து இருக்கிறது.

ஐரோப்பிய ஒன்றியத்தில் உக்ரைன் உறுப்பினராவதற்கு ஊழலுக்கு எதிரான போராட்டம் முக்கிய நிபந்தனைகளில் ஒன்றாக உள்ளது. உக்ரைனிய அரசாங்கத்தின் பதிலும், ஜெரன்ஸ்கியின் தளபதி யெர்மக்கின் பதவியைத் தக்கவைக்கும் திறனும் உக்ரைனின் அரசியல் எதிர்காலத்திற்கு மிக முக்கியமானதாக தற்போது இருக்கிறது.

எவ்வாறு இருப்பினும் இது ரஷ்ய படைகளின் தாக்குதலுக்கு உக்ரைனின் எதிர்ப்பை பலவீனப்படுத்தும். உக்ரைனில் கடுமையான போர் நிலவி வரும் இந்தச் சூழ்நிலைக்கு மத்தியில், நாட்டில் ஒரு பெரும் ஊழல் வெளிச்சத்துக்கு வந்துள்ளது.

உக்ரைன் ஜனாதிபதி வொலோடிமிர் ஜெலென்ஸ்கியின் நெருங்கிய வட்டாரத்தைச் சேர்ந்த ஒருவர் இந்த ஊழலில் ஈடுபட்டிருப்பது விசாரணையில் உறுதி செய்யப்பட்டுள்ளது. இந்த ஊழல் வழக்கில் சம்பந்தப்பட்ட நபர், எரிசக்தித் துறையில் சுமார் 100 மில்லியன் அமெரிக்க டொலர் அளவுக்கு முறைகேடு செய்துள்ளதாக தெரியவந்துள்ளது.

உக்ரைனிய புலனாய்வுப் பிரிவினர் மேற்கொண்ட விசாரணைகளில் இது தொடர்பான விபரங்களை கண்டறிந்துள்ளனர். ரஷ்யாவின் தீவிர தாக்குதலுக்கு மத்தியில் நாட்டுக்கான அத்தியாவசியத் தேவைகளில் இவ்வளவு பெரிய அளவில் நிதி மோசடி நடந்திருப்பது அதிர்ச்சியை ஐரோப்பிய நாடுகள் மத்தியில் பெரும் அதிர்ச்சியை ஏற்படுத்தியுள்ளது.

ஜனாதிபதி ஜெலென்ஸ்கி ஊழலுக்கு எதிரான நிலைப்பாட்டை கொண்டுள்ளதாக கூறினாலும், இவ்வாறான நிலையில் இந்தச் சம்பவம் அவரின் கைகளும் சுத்தமாக இல்லை என்பது தெளிவாகிறது. இது உக்ரைனிய அரசியல் வட்டாரத்தில் பெரும் பின்னடைவை ஏற்படுத்தியுள்ளது.

ஊழல் செய்ததாகக் குற்றம் சாட்டப்பட்ட நபரின் மீதான விசாரணைகள் தற்போது தீவிரப்படுத்தப்பட்டுள்ளன என்று கீவ் அரசியல் வட்டாரங்கள் தெரிவிக்கின்றன. இத்தகைய குற்றச்சாட்டுகள் தொடர்பாக ஜெலென்ஸ்கியின் தலைமைப் பணியாளர் ராஜினாமா செய்துள்ளார்.

உக்ரைனின் ஊழல் எதிர்ப்புப் பிரிவினர் ஜெலென்ஸ்கியின் வீட்டில் சோதனை நடத்தியதை அடுத்து, அவரது தலைமைப் பணியாளர் ராஜினாமா செய்ததாக தகவல்கள் வெளியாகியுள்ளன.

இந்த ஊழல் விவகாரம் பல வாரங்களாக உக்ரைனை உலுக்கி வருகிறது. அத்துடன் ஜெலென்ஸ்கியின் சொந்த நிலைப்பாட்டை பலவீனப்படுத்துகிறது. மற்றும் ஒரு தீர்க்கமான நேரத்தில் அமெரிக்காவுடனான நாட்டின் பேச்சுவார்த்தை நிலைப்பாட்டை மேலும் ஆபத்தில் ஆழ்த்தியுள்ளது.

ராஜினாமா செய்த உக்ரைன் அதிபர் வோலோடிமிர் ஜெலென்ஸ்கியின் தலைமைப் பணியாளர் 54 வயதான ஆண்ட்ரி யெர்மக் ஆவார். அவர் ரஷ்யாவின் முழு அளவிலான போர் முழுவதும் ஜெலென்ஸ்கியின் நெருங்கிய ஆலோசகராக இருந்து வருகிறார். ஆனால் அதிகரித்து வரும் ஊழல் தொடர்பாக அழுத்தத்திற்கு உள்ளாகியுள்ளார். தற்போது தான் போர் முனைக்கு செல்வதாகவும் ஊடகங்கள் முன்னிலையில் காட்சிப்படுத்தி உள்ளார்.

ரஷ்யா-உக்ரைன் போரை முடிவுக்குக் கொண்டுவர அமெரிக்க அதிபர் டொனால்ட் டிரம்ப் ஒரு புதிய முயற்சியை முன்னெடுத்துச் செல்லும் நிலையில், முக்கியமான பேச்சுவார்த்தைகளுக்கு தலைமை தாங்க ஜெலென்ஸ்கி சமீபத்தில் அவரை தான் நியமித்தார்.

ஆனாலும் ஐரோப்பிய நட்பு நாடுகளின் ஆதரவுடன், உக்ரைன், அமெரிக்கா தலைமையிலான சமாதான வரைவு திட்டத்தின் விதிமுறைகளை மாற்ற முயன்றுள்ளது. ஆனால் அமெரிக்க முதலில் ரஷ்யாவை நோக்கி பெரிதும் ஆதரவில் சாய்ந்ததாகக் கூறப்படுகிறது.

பேச்சுவார்த்தை பாதையில் உக்ரைனின் நிலைப்பாடு எப்போதும் தேவைக்கேற்ப முன்வைக்கப்பட்டதற்கு ஆண்ட்ரிக்கு நான் நன்றியுள்ளவனாக இருக்கிறேன், அது எப்போதும் ஒரு தேசபக்தி நிலைப்பாடாக இருந்தது, என்று உக்ரைன் ஜனாதிபதி கியேவில் தனது வீடியோ உரையின் போது கூறியுள்ளார்.

கடந்த சில மாதங்களாக உக்ரைனின் தேசிய ஊழல் தடுப்புப் பணியகம், எரிசக்தித் துறையில் ஒரு பரந்த அளவிலான விசாரணையைத் தொடங்கியது. அரசுக்குச் சொந்தமான அணுசக்தி நிறுவனமான எனர்கோடோம் சம்பந்தப்பட்ட பரிவர்த்தனைகளில் சட்டவிரோத பணம் செலுத்துதல்களைக் கண்டறிந்துள்ளது. அத்துடன் ஆயிரக்கணக்கான மணிநேர ஆடியோ பதிவுகள் கைப்பற்றப்பட்டன. அவை எரிசக்தி மற்றும் பாதுகாப்புத் துறைகளில் செயல்படும் ஒரு உயர் மட்ட குற்றவியல் அமைப்பின் செயல்பாட்டிற்கான சான்றாகும் என்று உக்ரைனின் ஊழல் தடுப்புப் பணியக கூறியுள்ளது.

உக்ரேனிய நாட்டின் புலனாய்வாளர்களின் கூற்றுப்படி, பல அதிகாரிகள் இந்தக் குற்றம் தொடர்பான குழுவில் ஒரு பகுதியாக உள்ளனர். குற்றவியல் அமைப்பின் அடையாளம் காணப்பட்ட உறுப்பினர்களில் எரிசக்தி அமைச்சரின் முன்னாள் ஆலோசகர், கூட்டு-பங்கு நிறுவனமான எனர்கோடோமின் உடல் பாதுகாப்பு மற்றும் பாதுகாப்பிற்கான நிர்வாக இயக்குனர், ஒரு பிரபலமான தொழிலதிபர் மற்றும் நான்கு பேர் அடங்குவர் என்றும் கூறப்படுகிறது.

பணம் செலுத்துவதைத் தடுக்கவோ அல்லது விநியோக அந்தஸ்தைப் பராமரிக்கவோ, கூட்டாளர் நிறுவனங்களிடமிருந்து 10 முதல் 20 வீதம் வரை இலஞ்சம் கேட்டதாக அவர்கள் சந்தேகிக்கப்படுகிறார்கள். இந்தக் குற்றச்சாட்டுகள் குறித்து எரிசக்தி அமைச்சகமோ அல்லது எனர்கோடோமோ எந்தக் கருத்தும் தெரிவிக்கவில்லை.

பொதுமக்களின் பெரும் அழுத்தத்திற்கும் சர்வதேச அழுத்தத்திற்கும் பிறகு, ஜூலை மாதம் ஊழல் எதிர்ப்பு அமைப்புகளின் சுதந்திரம் மீட்டெடுக்கப்பட்ட பின்னர் இந்த விசாரணை தொடங்கியது.

உக்ரைனின் தேசிய ஊழல் தடுப்புப் பணியகம் (NABU) மற்றும் சிறப்பு ஊழல் தடுப்பு வழக்கறிஞர்அலுவலகம் (SAP) 100 மில்லியன் யூரோ எரிசக்தி ஒப்பந்தத்துடன் தொடர்புடைய ஊழல் திட்டத்தின் மையத்தில் இருக்கும் யெர்மக் மீது இலக்கு விசாரணையை கடுமையாக நடத்தியது. வெளிநாட்டிற்கு தப்பிச் சென்ற ஜெலென்ஸ்கியின் கூட்டாளிகளில் ஒருவர், இந்த சட்டவிரோத திட்டத்தின் முக்கிய குற்றவாளியாகக் கருதப்படுவதாகக் கூறப்படுகிறது.

இந்த சோதனை பற்றிய செய்தி வெளியானதிலிருந்து, பல நாடாளுமன்ற உறுப்பினர்களும் உக்ரேனிய அரசின் முக்கிய அதிகாரிகளின் மீது கடுமையான குற்றச்சாட்டுகள் சுமத்தப்பட்டு வருகின்றன.

அதேவேளை அரசாங்கத்திற்குள் ஊழலுக்கு எதிராக தீர்க்கமான நடவடிக்கை எடுக்க வேண்டியதன் அவசியத்தை மக்கள் வலியுறுத்தி வருகின்றனர். யெர்மக், தனது பங்கிற்கு சோதனையை உறுதிப்படுத்தினார். புலனாய்வாளர்கள் அவரது சொத்துக்களை முழுமையாக அணுக முடியும் என்று கூறினார். ஊழல் எதிர்ப்பு நிறுவனங்களின் சுயாட்சியை மட்டுப்படுத்த அரசாங்கம் சமீபத்தில் மேற்கொண்ட முயற்சிகளால் இந்த நிலைமை மேலும் சிக்கலாகியதால் பொது மக்கள் போராட்டங்களில் ஈடுபட்டனர்.

இந்த ஊழல் விசாரணை நடைபெற்று வரும் தருணம் உக்ரைனுக்கு மிகவும் கடினமான காலமாகும். பாரிய ஆயுத மோதலை மட்டுமல்ல, எரிசக்தி நெருக்கடியையும் எதிர்கொள்கிறது. ரஷ்ய தாக்குதல் அதிகரித்து வருவதுடன், மின்சார பற்றாக்குறையும், ஏற்கனவே பல ஆண்டுகளாக மோதல்களால் பாதிக்கப்பட்டுள்ள மக்களின் அதிருப்தியை அதிகப்படுத்தியுள்ளது.

உக்ரைனில் ஊழல் என்பது வெறும் அரசியல் பிரச்சனை மட்டுமல்ல. அது உக்ரைனியர்களின் அன்றாட வாழ்வில் பாரிய நேரடி விளைவுகளை ஏற்படுத்தியுள்ளது. இந்தப் பின்னணியில், மேற்கத்திய நட்பு நாடுகள், குறிப்பாக அமெரிக்கா மற்றும் ஐரோப்பிய ஒன்றியம், உக்ரைனில் நடக்கும் நிகழ்வுகளை உன்னிப்பாகக் கண்காணித்து வருகின்றன.

உக்ரைனுக்கு இராணுவ மற்றும் நிதி உதவி ஊழலை எதிர்த்துப் போராடுவதற்கான உண்மையான அர்ப்பணிப்புடன் இருக்க வேண்டும் என்ற நம்பிக்கையுடன், அதிக வெளிப்படைத்தன்மை மற்றும் பொறுப்புக் கூறலுக்கான அழைப்புகள் பெருகி வருகின்றன.

அவ்வாறு செய்யத் தவறினால், பொது மக்கள் மற்றும் சர்வதேச பங்காளிகளின் பார்வையில் ஜெலென்ஸ்கியின் அரசாங்கத்தின் சட்டபூர்வமான தன்மை குறைமதிப்பிற்கு உட்படுத்தும் என்று கருதப்படுகிறது.

2019 ஆம் ஆண்டு ஜெலென்ஸ்கி தேர்ந்தெடுக்கப்பட்டதிலிருந்து அவர் எதிர்கொண்ட மிகக் கடுமையான ஊழல்களில் ஒன்றாக இந்த ஊழல் உருவெடுத்து இருக்கிறது. தற்போது இது ரஷ்ய ஆக்கிரமிப்புக்கு உக்ரைனின் எதிர்ப்பை பலவீனப்படுத்தும் என்று கருதப்படுகிறது.