நேபாள சிறையில் இருந்து தப்பியோடிய பாகிஸ்தான் பெண் திரிபுராவில் கைது

போதைப்பொருள் கடத்தலில் ஈடுபட்ட பாகிஸ்தானிய நாட்டவர் மற்றும் நேபாள சிறையில் இருந்து தப்பியோடிய 65 வயது பெண் ஒருவர் தெற்கு திரிபுரா மாவட்டத்தில் உள்ள சப்ரூம் என்ற எல்லை நகரத்தில் கைது செய்யப்பட்டுள்ளார்.

லூயிஸ் நிகாத் அக்தர் பானோ என்று தன்னை அடையாளப்படுத்திக் கொண்ட அந்தப் பெண், சப்ரூம் புகையிரத நிலைய காவல்துறையினரால் தடுத்து வைக்கப்பட்டு, பின்னர் உள்ளூர் காவல் நிலையத்தில் விசாரணைக்காக ஒப்படைக்கப்பட்டதாக சப்ரூம் காவல் அதிகாரி நித்யானந்தா சர்க்கார் தெரிவித்துள்ளார்.

“அவர் எல்லையில் வங்கதேசத்திற்கு கடக்கும் நோக்கத்துடன் வந்திருக்கலாம் என்று சந்தேகிக்கப்படுகிறது. அவரது நடமாட்டம் மற்றும் நோக்கங்கள் குறித்து கூடுதல் தகவல்களை சேகரிக்க காவல்துறை மற்றும் பிற பாதுகாப்பு நிறுவனங்கள் அவரிடம் விசாரணை நடத்தி வருகின்றன” என்று நித்யானந்தா சர்க்கார் குறிப்பிட்டுள்ளார்.

பானோ பாகிஸ்தானின் ஷேக்குபுராவில் வசிக்கும் எம்.டி. கோலாஃப் ஃபராஜ் என்ற நபரின் மனைவி என்று கூறப்படுகிறது. அவர் 12 ஆண்டுகளுக்கு முன்பு பாகிஸ்தான் பாஸ்போர்ட்டைப் பயன்படுத்தி நேபாளத்திற்குள் நுழைந்து போதைப்பொருள் கடத்தலைத் தொடங்கினார்.

2014ம் ஆண்டு, 1 கிலோ பிரவுன் சுகர் போதைப்பொருளை (Brown Sugar) எடுத்துச் சென்றதற்காக நேபாள காவல்துறையினரால் அவர் கைது செய்யப்பட்டார், பின்னர் 15 ஆண்டுகள் சிறைத்தண்டனை விதிக்கப்பட்டார்.

கடந்த மாதம் வரை காத்மாண்டு சிறையில் தண்டனை அனுபவித்து வந்த அவர், நேபாளத்தில் பரவலான அமைதியின்மைக்கு மத்தியில் தப்பிச் சென்றதாகக் கூறப்படுகிறது.

செப்டம்பர் 2025ல், வன்முறை அரசாங்க எதிர்ப்பு போராட்டங்களுக்கு மத்தியில் நேபாளம் முழுவதும் 13,000க்கும் மேற்பட்ட கைதிகள் தப்பிச் சென்றனர். அவர்களில் பலர் பின்னர் இந்தியாவிற்குள் தப்பிச் செல்ல முயன்றபோது கைது செய்யப்பட்டனர்.