முன்னர்தான் எதிர்ப்பு இந்தியாவுக்கு இன்று நாம் பூரண ஆதரவு

இந்தியாவுடனான பல திட்டங்களுக்கு நாங்கள் முன்னர் எதிர்ப்பு தெரிவித்தாலும் இந்தியா அதனை மறந்து தற்போதைய தேசிய மக்கள் சக்தி அரசாங்கத்துக்கு ஆதரவு தெரிவிப்பதாகவும் இந்தியாவுடனான ஒப்பந்தங்கள் இரு நாடுகளும் பயனடைவதாகவும் ஜே.வி.பி. பொதுச் செயலாளர் ரில்வின் சில்வா தெரிவித்துள்ளார்.

உள்ளூராட்சி மன்றத் தேர்தல் தொடர்பான பொதுக் கூட்டத்தில் உரையாற்றும் போதே இவ்வாறு தெரிவித்த அவர், இந்தியாவுடன் பல ஒப்பந்தங்களை செய்து கொண்டு அரசாங்கம் நாட்டை காட்டிக் கொடுத்துள்ளதாக சில எதிர்க்கட்சி அரசியல்வாதிகள் கூறும் கூற்றுகளையும் அவர் மறுத்துள்ளார்.

இலங்கைக்கு தீங்கு விளைவிக்கும் வகையில் ஏதேனும் ஒப்பந்தங்கள் கையெழுத்திடப்பட்டுள்ளதா என்பதை நிரூபிக்குமாறும் ரில்வின் சில்வா எதிர்க்கட்சிகளுக்கு சவால் விடுத்தார்.

இந்தியப் பிரதமர் நரேந்திர மோடியின் சமீபத்திய பயணத்தின் போது கையெழுத்திடப்பட்ட ஒப்பந்தங்கள் பொதுமக்களுக்கு வெளிப்படையாக அறிவிக்கப்பட்டுள்ளன. அவை இரு நாடுகளுக்கும் நன்மை பயக்கும். இந்த ஒப்பந்தங்களால் இலங்கையும் இந்தியாவும் பயனடைகின்றன. இலங்கை வரலாற்றில் அதிக சர்வதேச ஆதரவைப் பெற்ற அரசாங்கம் தேசிய மக்கள் சக்தி அரசாங்கம் என்பதை நிரூபித்துள்ளது.

முன்னதாக, சர்வதேச ஆதரவு அல்லது உதவி இல்லை என்று அவர்கள் கூறினர். ஆனால் இப்போது எங்களுக்கு சர்வதேச உதவி கிடைத்து வருவதால், நாங்கள் தேசத்தை காட்டிக் கொடுப்பதாகக் கூறுகிறார்கள்.

முன்னாள் ரணில் விக்ரமசிங்க தலைமையிலான அரசாங்கம், ராஜபக்ச குடும்பத்தினருடன் சேர்ந்து, உள்ளூர் பால் உற்பத்தியாளரான மில்கோவை ஒரு இந்திய நிறுவனத்திற்கு விற்க முயன்றதாகவும், ஆனால் இந்த விடயத்தில் தேசிய மக்கள் சக்தி அரசாங்கம் இந்தியாவை அணுகியதால் இந்த நடவடிக்கை நிறுத்தப்பட்டதாகவும் சுட்டிக்காட்டினார்.

கடந்த காலங்களில் பல திட்டங்களுக்கு எதிராக ஜே.வி.பி. மற்றும் தேசிய மக்கள் சக்தி ஆதரவு தெரிவித்ததாகவும் 1987 ஆம் ஆண்டு இந்திய-இலங்கை ஒப்பந்தத்தை எதிர்த்ததாகவும் இதன் மூலம் இந்திய இராணுவம் இலங்கைக்குள் நுழைந்தது, ஏனெனில் அது தேசத்திற்கு துரோகம் என்று கருதப்பட்டது என்றும் கூறினார்.

கடந்த காலத்தில் நாங்கள் இந்தியாவுக்கு எதிராக எதிர்ப்பு தெரிவித்தோம். இருப்பினும், இந்தியா இப்போது மாறிவிட்டது, உலகமும் மாறிவிட்டது.

1987 இல் நாங்கள் எதிர்ப்பு தெரிவித்ததால், அந்தக் கோபத்தை இன்னும் பிடித்துக் கொள்ள வேண்டுமா? இல்லை. அப்போது ஒரு பிரச்சினை எழுந்தது, அதற்காக நாங்கள் எதிர்ப்பு தெரிவித்தோம், பின்னர் அது முடிந்து விட்டதாகவும் குறிப்பிட்டுள்ளார்.

சில சமயங்களில், உலகளாவிய முன்னேற்றங்களுடன் நாங்கள் இணையாக இல்லை என்று கூறி அவர்கள் எங்களை குற்றம் சாட்டுகிறார்கள். ஆனால் நாங்கள் அப்படிச் செயல்படத் தொடங்கும்போது, அவர்கள் எங்களை தேசத்திற்கு துரோகம் செய்ததாகக் குற்றம் சாட்டுகிறார்கள் என்றும் குறிப்பிட்டார்.