அவுஸ்திரேலிய ராணுவத்தில் பணியாற்றிய ரஷ்ய உளவாளி! … ஐங்கரன் விக்கினேஸ்வரா.

ரஷ்யாவுக்காக உளவு பார்த்ததாக பிரிஸ்பேனில் வாழ்ந்த தம்பதியினர் குற்றம் சாட்டப்பட்டதுடன், பாதுகாப்பு ரகசியங்களை அணுக முயன்றனர் எனவும் அவுஸ்திரேலிய போலீசார் தெரிவித்தனர்.

அவுஸ்திரேலிய பாதுகாப்புப் படையில் இருந்து நீண்ட கால பணி விடுப்பில் உள்ள 40 வயது பெண் மற்றும் அவரது 62 வயது கணவர் உளவு குற்றம் சாட்டப்பட்டதாக போலீசார் தெரிவித்துள்ளனர்.

அவுஸ்திரேலியாவின் உளவு மற்றும் பாதுகாப்பு நிறுவனங்களுக்கு இடையேயான கூட்டு விசாரணைக்குப் பிறகு, ரஷ்ய கடவுச்சீட்டைக் கொண்ட பிரிஸ்பேன் தம்பதியினர், புதிய உளவுச் சட்டங்களின் கீழ் குற்றம் சாட்டப்பட்ட முதல் நபர்கள் ஆவார்கள்.

அவுஸ்திரேலிய மத்திய பொலிஸ் (AFP) கமிஷனர் ரீஸ் கெர்ஷா கூறுகையில், பாதுகாப்புப் படையில் இருந்து நீண்ட கால விடுப்பில் உள்ள 40 வயதான கிரா கொரோலெவ் மற்றும் அவரது 62 வயதான கணவர் இகோர் கொரோலெவ் ஆகியோர் குற்றம் நிரூபிக்கப்பட்டால் 15 ஆண்டுகள் வரை சிறைத்தண்டனையை எதிர்கொள்ள நேரிடும் என தெரிவித்துள்ளார்.

ஒரு நாட்டின் மீது நடத்தப்படும் மறைமுக தாக்குதல்களை தடுப்பது, நாட்டில் அசம்பாவிதங்கள் ஏற்படாமல் பாதுகாப்பது என உளவு அமைப்புகளின் வேலையும், அவசியமும் ஒவ்வொரு நாட்டுக்கும் இன்றியமையாததாகும்.

நாட்டின் பாதுகாப்பு என்பது காவல்துறை மாற்றம் இராணுவத்தை மட்டும் சார்ந்ததல்ல, அந்த நாட்டின் உளவு அமைப்புகளையும் பொறுத்தது. துரதிர்ஷ்டவசமாக இவர்களைப் பற்றி யாருக்கும் தெரிவதில்லை. ஒவ்வொரு நாடும் அவர்களுக்கென ஒரே உளவு அமைப்பை வைத்திருக்கும்.

அனைவருக்கும் புரிவது போல சொல்ல வேண்டுமென்றால் இங்கு வேலை செய்பவர்கள்தான் உண்மையான கதாநாயகர்கள் ஆவார்கள். அனைத்து நாடுகளும் உளவு அமைப்பை வைத்திருந்தாலும் சில நாடுகளின் உளவு அமைப்புகள் மட்டும் அவற்றில் சிறந்தவையாகவும், பலம் வாய்ந்தவையாகவும் இருக்கும்.

அவுஸ்திரேலிய பாதுகாப்பு புலனாய்வு அமைப்பின் இயக்குநர் ஜெனரல் மைக் பர்கெஸ் (Asio – Mike Burgess) இந்த விசாரணையின் விவரங்கள் குறித்து உடனடியாக கருத்து தெரிவிக்கப் போவதில்லை என்று கூறினார்.

அவுஸ்திரேலியாவின் பாதுகாப்புக்கு அச்சுறுத்தல் “உண்மையானது” என்றும், குற்றச்சாட்டுகள் பற்றிய விசாரணை தீவிரமாக நடத்தப்படும் என்றும் பர்கெஸ் கூறினார்.

பல நாடுகள் ஆஸ்திரேலியாவின் ரகசியங்களைத் திருட முயல்கின்றன என்றும் அவர் கூறினார்.

நாங்கள் அப்பாவியாக இருக்க முடியாது, நாங்கள் மனநிறைவுடன் இருக்க முடியாது. உளவு பார்ப்பது என்பது வினோதமான கருத்து அல்ல, உளவு பார்ப்பது நமது பொருளாதாரத்தை சேதப்படுத்துகிறது. நமது மூலோபாய நன்மையை சீரழிக்கிறது. இது பேரழிவுகரமான விளைவுகளைக் கொண்டுள்ளது.

வெளிநாட்டு புலனாய்வு சேவைகள் திறமையானவை, உறுதியானவை மற்றும் பொறுமையானவை. அவர்கள் நீண்ட விளையாட்டை எங்களுடன் விளையாடுகிறார்கள். ASIO வுடன் முரண்பாடு செய்வது தான் அவர்களுக்குப் பிரச்சினையா என்றும் அவர் வினவினார்.

அவுஸ்திரேலிய இராணுவத்தில் ரஷ்யாவில் பிறந்தவரும் அவரது கணவரும் கிரெம்ளின் உளவுத்துறைக்கான முக்கியமான பாதுகாப்பு கோப்புகளை திருடியதாகக் குற்றம் சாட்டப்பட்டுள்ளனர். அவர்கள் பத்து ஆண்டுகளுக்கு முன்பு அவிஸ்திரேலியாவுக்கு குடிபெயர்ந்தனர். இருவருக்கும் அவுஸ்திரேலிய குடியுரிமை உள்ளது.

2018 ஆம் ஆண்டில் அரசாங்கத்தால் அறிமுகப்படுத்தப்பட்ட புதிய உளவு குற்றச்சாட்டுகளின் சட்டப்படி பிரிஸ்பேன் மாஜிஸ்திரேட்டால் இவர்கள் இருவரும் விசாரணைக்கு உட்படுத்தப்பட்டனர்.

குற்றஞ்சாட்டப்பட்ட கிரா கொரோலேவ் பல ஆண்டுகளாக ஆஸி ராணுவத்தில் தகவல் அமைப்பு தொழில்நுட்ப வல்லுநராக பணிபுரிந்ததாகவும், அரச பாதுகாப்புப் படையில் பாதுகாப்பு விவரங்களை பார்வையிட அனுமதி பெற்றதாகவும் கூறப்படுகிறது.

2023 இல் இராணுவத்தில் இருந்து நீண்ட கால விடுப்பில் இருந்தபோது அவர் ரஷ்யாவிற்குப் பயணம் செய்ததாகவும், அவர் வெளியில் இருந்தபோது, பிரிஸ்பேன் வீட்டிலிருந்து தனது உத்தியோகபூர்வ பணிக் கணக்கில் பாதுகாப்பு அமைப்புகளில் உள்நுழைவது எப்படி என்று தனது கணவர் இகோருக்கு அறிவுறுத்தியதாகவும் AFP குற்றம் சாட்டியுள்ளது.

அவரது கணவர் கோரப்பட்ட விவரங்களை அணுகி எடுத்து, ரஷ்யாவில் உள்ள அவரது மனைவிக்கு அனுப்புவார் என்றும் குற்றம் சாட்டப்பட்டுள்ளார். உளவுத் தரவுகள் ரஷ்ய அதிகாரிகளுக்கு வழங்கும் நோக்கத்துடன் அவர்கள் அந்தத் தகவலைத் தேடினார்கள் என்று குற்றம் சாட்டப்பட்டுள்ளனர்.

கிரா கொரோலேவின் விசாரணைக்காக சமர்ப்பிக்கப்பட்ட நீதிமன்ற ஆவணங்களில் , பாதுகாப்பு கணினி அமைப்புகளுக்கு சட்டவிரோத அணுகலை வழங்குதல், தகவல்களை நகலெடுத்தல் மற்றும் பரப்புதல் மற்றும் ரஷ்ய கூட்டமைப்பின் உளவுத்துறை சேவைகளுடன் டிசம்பர் 6, 2022 வரை மற்றும் சமீபத்தில் ஜூலை 11 வியாழன் வரையிலான உறவைப் பேணுதல் போன்ற விவரங்கள் வெளிப்படுத்தப்பட்டுள்ளன.

அவுஸ்திரேலிய பாதுகாப்பு புலனாய்வு அமைப்பின் இயக்குநர் ஜெனரல் மைக் பர்கெஸ் தெரிவிக்கையில், கிரா கொரோலெவ் ஆஸி பாதுகாப்புப் படையில் உளவு வேலை செய்யும் குறிப்பிட்ட நோக்கத்துடன் சேர்ந்தாரா, இந்த தம்பதியினர் ஒரு குறிப்பிட்ட பணிக்காக அவுஸ்திரேலியாவுக்கு வந்திருந்தால், அல்லது அவர்கள் சமீபத்தில் ஆட்சேர்ப்பு செய்யப்பட்டார்களா என்று தங்கள் உளவு நிறுவனங்கள் தற்போது விசாரித்து வருவதாகக் கூறினார்.

இவர்கள் அவுஸ்திரேலியாவில் உள்ள ரஷ்ய தூதர்களுடன் தொடர்பு கொண்டார்களா அல்லது தொடர்பில் இருந்தார்களா என்று கேட்கப்பட்ட கேள்விக்கு எவரும் பதில் தரவில்லை. 2016 இல் குடியுரிமை பெற்ற ஒரு ரஷ்ய பெண்ணின் பாதுகாப்பு அனுமதியை சரிபார்க்கும் போது எவ்வாறு இத்தகைய ஆபத்தை தவறவிட்டது என்று கேட்டதற்கு, இந்த விசாரிக்கப்படுவதாக கூறப்பட்டது.

பிரதம மந்திரி அந்தோனி அல்பானீஸ், இந்த நடவடிக்கை குறித்து தனக்கு விரிவாக விளக்கப்பட்டதாக கூறியுள்ளார்.

அவுஸ்திரேலிய பாதுகாப்புப் படை ஒரு அறிக்கையை வெளியிட்டது. அதாவது ADF உறுப்பினர் பற்றிய ஏதேனும் கடுமையான குற்றச்சாட்டுகளுக்கு பதிலளிக்கும் வகையில், அவர்களின் பாதுகாப்பு தளங்கள் மற்றும் அமைப்புகளுக்கான அணுகல் உடனடியாக ரத்து செய்யப்பட்டு உள்ளது என அந்த அறிக்கையில் தெரிவிக்கப்பட்டுள்ளது.