ஆரம்பம் முடிவை நோக்கி! முடிவுலிருந்து ஆரம்பம்!!….3…..சங்கர சுப்பிரமணியன்.

நம்மிடமுள்ள இருமுனைக் கோளாறு பற்றி காண்போம்.சான்றாக பல சொல்லலாம். குமரிக்கண்ட வரலாற்றுப் பின்புலம் கொண்டவர்கள் சங்க இலக்கியம் படைத்தவர்கள் என்கிறோம். சேர சோழ பாண்டிய வரலாறு பேசுகிறோம்.

உலகம் முழுதும் சிதறிக்கிடந்த ஒரு இனம் இன்று உலகையே கட்டுக்குள் வைத்துள்ளதை எல்லாம் மறந்து விடுகிறோம். இது போன்றவை எல்லாம் தாழ்வு மனப்பான்மை.

தமிழர் தன்னிலை உணரவேண்டும். வீரத்துடன் விவேகத்தையும் வளர்க்கவேண்டும். மதுவுக்கு அடிமையாவதை விட்டு மதிநுட்பத்தை பெருக்கும் கல்வியில் வீறுகொண்டு எழவேண்டும்.

ஒரு துறையில் மட்டும் கல்வியில் கவனம் செலுத்தாது தனக்கு எத்துறையில் சிறக்க இயலுமோ அத்துறையை தேர்ந்தெடுத்து அத்துறையில் முன்னேறி உலகைத் தன் பக்கம் திருப்பவேண்டும்.

இரத்தத்தை பார்த்தாலே மயக்கும் வரும் தனது மகனிடம் சமுதாயத்துக்காகவும் போலிக் கௌரவத்திற்காகவும் அல்லது தனது ஆசைக்காகவும் மருத்துவ படிப்பை திணிக்க கூடாது. மருத்துவம் படித்தா மேதகு ஆனார். மருத்துவம் படித்தா பில்கேட்ஸ் பெருஞ் செல்வத்தர் ஆனார். அப்துல்கலாம் என்ன படித்து இரவாப் புகழ்பெற்றார்.

திறமை இல்லாவிடில் எத்துறை சிறந்தது என்று தேர்ந்தெடுத்து கற்றாலும் திறமைசாலிகள் ஆவதில்லை. எத்தனை வழக்கறிஞர்கள் நீதியரசராகாமல் தொடர்ந்து வழக்கறிஞர்களாகவும்

பொறியாளர்கள் இறுதிவரை அதே நிலையிலும் மருத்துவர்கள் அறுவைசிகிச்சை வரை முன்னேறாது அடிப்படை மருத்துவம் மட்டுமே செய்கிறார்கள்.

எனவே பெற்ற துறையில் பெயரெடுக்க வேண்டும். தமிழர் எல்லா துறையிலும் சிறந்து விளங்க வேண்டும். பொருளாதாரத்திலும் கல்வியிலும் சிறந்து விளங்க வேண்டும். இனப்பற்றை அதிகரித்துக் கொள்ள வேண்டும்.

கல்வி, பொருளாதாரம் மற்றும் இனப்பற்று என்ற இத்த மூன்றும் இணைந்த இனமே உலகை ஆள்கிறது. தலைசிறந்து விளங்குகிறது. இனப்பற்றை ஒரு குறுகிய வட்டத்துக்குள் அடைக்க நினைக்கும் எந்த இனமும் இக்காலச்சூழலில் தலைசிறந்து விளங்க இயலாது.