முதல்வருக்கு பாராட்டு விழா: விஜய், அஜித் வருவார்களா?

தமிழ்நாட்டைப் பொறுத்தவரை சினிமாவையும், அரசியலையும் அவ்வளவு எளிதாக பிரித்துவிடமுடியாது. ஐந்து முதல்வர்களை தமிழ்நாட்டுக்கு திரையுலகம் பெற்றுத் தந்துள்ளது என்று சொல்பவர்கள் கூட தற்போதைய முதல்வர் மு.க.ஸ்டாலினும் திரையுலகில் ஒரு காலத்தில் வலம் வந்தவர் தான் என்பதை மறந்துவிடுகிறார்கள்.

எந்த கட்சி ஆட்சியமைத்தாலும் அவர்களுக்கு விழா எடுத்து கொண்டாடுவது தமிழ்த் திரையுலகினரின் வழக்கமாக இருக்கிறது. அதிலும் கலைஞர் கருணாநிதி முதல்வராக இருந்த போது திரையுலகினர் அவரோடு அதிக நெருக்கம் காட்டுவர். அவரும் திரையுலகின் ஒவ்வொரு துறை முக்கிய பிரபலங்களுடனும் தனிப்பட்ட முறையில் நட்புடன் பழகுவார். அதனால் அவர் ஆட்சிக் காலத்தில் திரையுலகினரின் கலை நிகழ்ச்சிகள் அதிகளவில் நடைபெற்றுள்ளன.

ஜெயலலிதா 2011ஆம் ஆண்டு மீண்டும் ஆட்சிக்கு வந்தபோது திரையுலகினர் அவரிடம் சென்று ‘அம்மா விழா எடுக்கணும்’ என்று கேட்க அவர் பதிலுக்கு ‘உங்களுக்கு இதில் சலிப்பே ஏற்படாதா?’என்று கேட்டு சிரித்துவிட்டாராம். இயக்குநர் அமீர் இதை பதிவு செய்துள்ளார்.

மு.க.ஸ்டாலின் தலைமையிலான திமுக அரசு ஆட்சிக்கு வந்து பத்து மாதங்கள் நிறைவடைந்து விட்டன. ஆனால் ஆட்சிப் பொறுப்பேற்ற சமயத்தில் கொரோனா பாதிப்பு உச்சத்தில் இருந்தது. மக்களின் இயல்பு வாழ்க்கை கடுமையாக பாதிக்கப்பட்டது. தொடர்ந்து முதல்வர் பிஸியாக வலம் வந்து கொண்டிருக்கிறார்.

தற்போது கொரோனா பாதிப்பு குறைந்து கட்டுப்பாடுகளும் பெருமளவில் விலக்கப்பட்டுள்ளது. நகர்ப்புற உள்ளாட்சித் தேர்தலிலும் திமுக வெற்றி பெற்றுள்ளது. இந்த சூழலில் முதல்வருக்கு ஒரு பாராட்டு விழா ஏற்பாடு செய்யலாம் என தமிழ்த் திரையுலகினர் முடிவெடுத்துள்ளதாக கூறுகின்றனர்.

தமிழ்த் திரைப்பட இயக்குநர்கள் சங்கத் தேர்தல் சமீபத்தில் நடைபெற்றது. அதில் ஆர்.கே.செல்வமணி தலைமையிலான புது வசந்தம் அணி வெற்றி பெற்றது. வெற்றி பெற்றவர்கள் முதல்வரை சந்தித்து வாழ்த்து பெற்றுவிட்டு அப்படியே விழா குறித்தும் கூறி முதல்வர் ஸ்டாலினிடம் சம்மதம் வாங்க திட்டமிட்டுள்ளனாராம்.

கலைஞர் முதல்வராக இருந்த போது ரஜினி, கமல் என உச்ச நட்சத்திரங்களை அழைத்து அருகில் வைத்துக் கொள்வார். கமல்ஹாசன் தனிக் கட்சி தொடங்கி அரசியலில் வலம் வரும் நிலையில் அவர் வருவாரா என்பது கேள்விக்குறியாக உள்ளது. ஸ்டாலின் முதல்வராக பொறுப்பேற்ற பின்னர் அவரை சந்தித்து பலரும் வாழ்த்து தெரிவித்தனர். ஆனால் விஜய், அஜித் ஆகிய இருவருமே அந்த பக்கம் வரவில்லை. எனவே பாராட்டு விழாவுக்காவது ஆஜர் ஆவார்களா என்ற எதிர்பார்ப்பு உருவாகியுள்ளது.