“மேதகு” படம் சரியா?….. தவறா?…. சங்கர சுப்பிரமணியன்.

பேமிலிமேன் 2, ஜகமே தந்திரம் போன்ற பாலைவனங்களுக்கு மத்தியில் மேதகு என்ற பசுஞ்சோலையாய் தண்ணீர் தெரிகிறதே குடித்து இளைப்பாறலாம் என்றால் அது தண்ணீர் அல்ல கானல் நீர் என்று சிலர் சொன்னதால் கொம்புத்தேன் கிடைக்காத முடவனானேன். வேறு எவராவது சொன்னால் பரவாயில்லை என் இனமக்களே அதுவும் சம்பந்தப்பட்ட மக்களே சொல்லும்போது பரிசுச் சீட்டில் பத்து மில்லியன் விழுந்ததெல்லாம் பகல் கனவுதானா என்று பகீரென்றிருந்தது.

எனக்கு பத்து மில்லியன் மற்றவர்களுக்கு அது பத்து சென்ட் என்பதால் குறை என்னிடம் தான் உள்ளது என்பதை உணர்ந்தேன். இருந்தாலும் நான் கண்ட கனவு தகர்ந்ததற்கு காரணத்தை மட்டும் உங்களிடம் புலம்புகிறேன். என் புலம்பல் சரியென்றால் உங்களுக்கு ஒரு கும்பிடு. தவறென்றால் நக்கீரனாக்கி விடுங்கள்.