Thursday, June 22, 2017

.

முருகபூபதி – படைப்பாளி – பத்திரிகையாளர் – சமூகப்பணியாளர்!

முருகபூபதி – படைப்பாளி – பத்திரிகையாளர் – சமூகப்பணியாளர்!

இலங்கையில் வடமேல் மாகாணத்தில் கடலும் கடல்சார்ந்த நிலமும் கொண்ட நெய்தல் பிரதேசமான நீர்கொழும்பில் 1951 ஆம் ஆண்டு பிறந்த லெட்சுமணன் முருகபூபதி அவுஸ்திரேலியாவில் 30 ஆண்டு காலமாக (1987 – 2017 )வசிக்கின்றார். இலங்கையில் வீரகேசரி நாளிதழில் துணை ஆசிரியராக பணியிலிருந்தவர். இலங்கை அரசின் முதலாவது ஜனாதிபதி வில்லியம் கொப்பல்லாவவிடம் 1976 இல் தனது முதலாவது சிறுகதைத்தொகுதி சுமையின் பங்காளிகள் நூலுக்கு தேசிய சாகித்திய விருது பெற்றவர். பின்னர் 2002 ஆம் ஆண்டு தனது முதலாவது நாவல் பறவைகள் நூலுக்கு அச்சமயம் இலங்கைப்பிரதமராக இருந்த ரணில் விக்கிரமசிங்கவிடமிருந்து மற்றுமொரு தேசிய சாகித்திய விருதைப்பெற்றக்கொண்டவர்.

இதுவரையில் சிறுகதை, நாவல், சிறுவர் இலக்கியம், பயண இலக்கியம், நினைவுப்பகிர்வு, கட்டுரை, நேர்காணல், விமர்சனம், பத்தி எழுத்து முதலான துறைகளில் 20 நூல்கள் எழுதியிருக்கிறார். அவருடைய பாட்டி சொன்ன கதைகள் சிறுவர் இலக்கிய நூல், தமிழ்நாட்டில் 1500 ஆரம்ப பாடசாலைகளுக்கு சிறுவர் இலக்கியவரிசையில் சேர்த்துக்கொள்ளப்பட்டிருக்கிறது.

முருகபூபதியும் ஒரு சமூகப்பணியாளர். இலங்கையில் போரில் பெற்றவர்களை இழந்த ஏழைத்தமிழ் மாணவர்களுக்கு உதவும் இலங்கை மாணவர் கல்வி நிதியம் என்ற அமைப்பை அவுஸ்திரேலியாவில் 1988 இல் உருவாக்கினார். அந்த அமைப்பு தொடர்ந்து 29 வருடகாலமாக இயங்குகிறது. அத்துடன் அவுஸ்திரேலியாவில் 2001 ஆம் ஆண்டு முதலாவது தமிழ் எழுத்தாளர் விழாவை இங்குள்ள எழுத்தாளர்கள், கலைஞர்களை இணைத்து நடத்தினார். அந்த இயக்கத்தின் ஊடாக அவுஸ்திரேலியா தமிழ் இலக்கிய கலைச்சங்கம் என்ற அமைப்பையும் உருவாக்கினார். மேற்குறிப்பிட்ட இரண்டு அமைப்புகளும் விக்ரோரியா மாநிலத்தில் பதிவுசெய்யப்பட்டு, தொடர்ந்தும் தங்கு தடையின்றி இயங்குகின்றன.

2002 ஆம் ஆண்டில் அவுஸ்திரேலியா (Australia Day) தினத்தின்பொழுது சிறந்த பிரஜைக்கான விருதை (Best Citizen Award) Darebin மாநகர சபையிடமிருந்து பெற்றுக்கொண்டார்.

அவுஸ்திரேலியாவில் விக்ரோரியா பல்லின கலாசார ஆணையத்தின் விருதை ( Multicultural Awards For Excellence) விக்ரோரியா முதலமைச்சர் Mr. Ted Bail lieu அவர்களிடம் 2011 இல் பெற்றுக்கொண்டவர்.

அவரது மதகசெவனெலி என்ற சிங்கள மொழிபெயர்ப்பு நூலில் இடம்பெற்றுள்ள சிறுகதைகள் மனிதநேயத்தையும் மனித உரிமையையும் இனநல்லிணக்கத்தையும் பற்றி ஆழமாக சிந்திக்கவைப்பவை. ஏற்கனவே அவை தமிழில் வெளிவந்து தற்பொழுது சிங்கள மொழியில் கிடைக்கிறது. மதகசெவனெலி என்ற வார்த்தையை ஆங்கிலத்தில் Shadows Of Memories என்று குறிப்பிடலாம்.

அவுஸ்திரேலியாவில் 2001 முதல் தமிழ் எழுத்தாளர் விழாவை முன்னின்று நடத்துகின்றார்.

2011 இல் கொழும்பில் நடந்த முதலாவது சர்வதேச தமிழ் எழுத்தாளர் மாநாட்டின் அமைப்பாளராகவும் இயங்கினார்.

இலங்கையில் வீரகேசரி பத்திரிகையின் நீர்கொழும்பு பிரதேச நிருபராக 1972 இல் பணியாற்றத்தொடங்கி, ஊடகவியலாளரானார். அதே காலப்பகுதியில் யாழ்ப்பாணத்திலிருந்து வெளியான மல்லிகை இதழில் கனவுகள் ஆயிரம் என்ற முதல் சிறுகதையை எழுதி படைப்பிலக்கியவாதியானார்.

நீர்கொழும்பு இந்து இளைஞர் மன்றம், நீர்கொழும்பு இலக்கிய வட்டம், விஜயரத்தினம் இந்து மத்திய கல்லூரி பழைய மாணவர் மன்றம், இலங்கை முற்போக்கு எழுத்தாளர் சங்கம் (கொழும்புக்கிளை) ஆகியனவற்றில் செயலாளராகவும் பணியாற்றினார்.

இறுதியாக வீரகேசரி நாளிதழில் துணை ஆசிரியராக பணியாற்றிவிட்டு 1987 இல் அவுஸ்திரேலியாவுக்கு புலம்பெயர்ந்து, இங்கும் உதயம் பத்திரிகையில் துணை ஆசிரியராகவும் பணியாற்றியதோடு, அவுஸ்திரேலியா தமிழர் ஒன்றியம், தமிழ் அகதிகள் கழகம், இலங்கை மாணவர் கல்வி நிதியம், அவுஸ்திரேலியா தமிழ் இலக்கிய கலைச்சங்கம் ஆகியனவற்றை உருவாக்குவதில் முன்னின்று உழைத்தார்.

இதுவரையில் நூற்றுக்கணக்கான படைப்பிலக்கியவாதிகளினதும் விமர்சகர்களினதும் வாழ்வையும் பணிகளையும் விளக்கும் கட்டுரைகளையும் எழுதியிருக்கிறார். தற்பொழுது யாழ்ப்பாணத்திலிருந்து வெளியாகும் காலைக்கதிர் பத்திரிகையின் ஞாயிறு இதழில் இலங்கையில் பாரதி என்னும் ஆய்வுத்தொடரை எழுதிவருகிறார். இவரது படைப்புகள் ஜெர்மனி தேனீ, கனடா பதிவுகள், தமிழ்நாடு திண்ணை, பிரான்ஸ் நடு, இங்கிலாந்து எதுவரை, அவுஸ்திரேலியா தமிழ் முரசு, அவுஸ்திரேலியா அக்கினிக்குஞ்சு , தமிழ்நாடு மலைகள் , இங்கிலாந்து எதுவரை, இலங்கை புதிய ஈழநாடு முதலான இணைய இதழ்களிலும் இலங்கை வீரகேசரி, தினக்குரல், தினமுரசு, காலைக்கதிர், தினகரன் முதலான பத்திரிகைகளிலும் ஞானம், ஜீவநதி தமிழ்நாடு தளம் முதலான இலக்கிய இதழ்களிலும் வெளியாகின்றன.

முருகபூபதி தொகுத்துள்ள நூல்கள் , மலர்கள் பற்றிய விபரம்:

நெய்தல் நீர்கொழும்பு வாழ்வும் வளமும் – 2015

Being Alive அவுஸ்திரேலியா எழுத்தாளர்களின் சிறுகதைகளின் ஆங்கில மொழிபெயர்ப்பு – 2011

சர்வதேச எழுத்தாளர் மாநாட்டு மலர் 2011

கட்டுரைக்கோவை ( சர்வதேச எழுத்தாளர் மாநாடு ) 2011

வானவில் – அவுஸ்திரேலியா எழுத்தாளர்களின் கவிதைகள் 2007

உயிர்ப்பு – அவுஸ்திரேலியா எழுத்தாளர்களின் சிறுகதைகள் 2005

நம்மவர் மலர் – 1997

பெற்றுள்ள இதர விருதுகள்:

விக்ரோரியா ஈழத்தமிழ்ச்சங்கத்தின் மகத்தான இலக்கியப்பணிக்கான விருது. .

மெல்பன் தமிழ்ச்சங்கத்தின் ஸ்ரீலஸ்ரீ ஆறுமுகநாவலர் விருது.

அவுஸ்திரேலியா தமிழ் இலக்கிய கலைச்சங்கத்தின் விருது.

முருகபூபதியின் நூல்கள்

1. சுமையின் பங்காளிகள் (சிறுகதைகள்)

2. சமாந்தரங்கள் (சிறுகதைகள்)

3. வெளிச்சம் (சிறுகதைகள்)

4. எங்கள் தேசம் (சிறுகதைகள்)

5. கங்கைமகள் (சிறுகதைகள்)

6. நினைவுக்கோலங்கள் (சிறுகதைகள்)

7. சமதர்ம பூங்காவில் (பயண இலக்கியம்)

8. நெஞ்சில் நிலைத்த நெஞ்சங்கள் (நினைவுகள்)

9. பறவைகள் (நாவல்)

10. பாட்டி சொன்ன கதைகள் (சிறுவர் இலக்கியம்)

11. இலக்கிய மடல் (கட்டுரைகள்)

12. சந்திப்பு (நேர்காணல்)

13. கடிதங்கள் (கடிதங்கள்)

14. .அம்பி வாழ்வும் பணிகளும் (ஆய்வு)

15. மல்லிகை ஜீவா நினைவுகள் (நினைவுகள்) 16. ராஜ ஸ்ரீகாந்தன் நினைவுகள் (நினைவுகள்)

17. உள்ளும் புறமும் (கட்டுரைகள் -நேர்காணல்கள்)

18. சொல்லமறந்த கதைகள் ( கட்டுரைகள்)

19. எம்மவர் ( அவுஸ்திரேலியா படைப்பாளிகள் பற்றிய தகவல்தொகுப்பு

20 மதகசெவனலி – சிறு கதைகள் SHADOWS OF MEMORIES ( சிங்கள மொழிபெயர்ப்பு)

About The Author

Related posts

Leave a Reply

Your email address will not be published. Required fields are marked *